Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> سعودی زنانی ڈرائیونگ سیٹ تے

سعودی زنانی ڈرائیونگ سیٹ تے

وچار ڈیسک
May 19th, 2011

سعودی عرب وچ زنانیاں نوں کار چلاؤڻ دی اجازت نہیں ہے پر اک سعودی زنانی اپنی کار آپوں چلاؤندیاں نیں تے اوہناں نے ایس روک نوں چیلنج کیتا ہے۔

نجلہ حریری نے مشہور شہر جدہ دے آلے دوالے پچھلے ہفتے ہی ڈرائیونگ شروع کیتی ہے۔ کہیا جاندا ہے جو کسے سعودی شہر وچ مسلسل گڈی چلاؤڻ والی اوہ اکلی زنانی ہے۔

45 سالاں دی نجلہ حریری کہندی ہے جو اوہناں نوں ایہہ حوصلہ مشرق وسطیٰ وچ ہوڻ والے حکومت مخالف وکھالیاں توں ملیا ہے۔ اوہناں نے کہیا ' ہڻ بڑی ہو گئی ، مینوں ڈرائیونگ دا تے حق ہے '۔

حریری دے کول مصر تے لبنان دے ڈرائیونگ لائسنس نیں تے ایہہ اوہناں نے ملک توں باہر رہندیاں ہوئیاں لئے سی۔ اوہناں دے کول اک انٹرنیشنل لائسنس وی ہے جیہنوں اوہ یورپ وچ ڈرائیونگ لئی ورت دیاں نیں۔

اوہ کہندیاں نیں 'زنانیاں نوں گڈی چلاؤڻ توں باز رکھڻ لئی کوئی قانون نہیں ہے، ایہہ وسیب دیاں ریتاں نیں جیہڑیاں کہندیاں نیں پئی عورت نوں گڈی نہیں چلاؤڻی چاہی دی۔'

نجلہ پنج بالاں دی ماں ہے تے اوہناں نوں ایس معاملے وچ اوہناں دے کھسم دی حمایت حاصل ہے۔ اوہ کہندیاں نیں پئی اوہناں دی دھی تے اوہناں دے سنگی اوہناں تے ایس لئی فخر کردے نیں۔ حالانکہ اوہ ایہہ جاندیاں نیں پئی ایہدے لئی پولیس اوہناں نوں کدی وی راہ وچ روک سکدی ہے۔ ' ایس وسیب وچ تھوڑی بہتی بہادر آں میں ڈر دی نہیں آں'۔

سعودی عرب دے دور دے علاقیاں وچ کدی کدی زنانیاں گڈی چلاؤندیاں ویکھیاں جاندیاں نیں پر انج دے وڈے شہر وچ زنانی دی ڈرائیونگ دیاں واپریاں گھٹ نیں۔ جیہڑے لوک زنانیاں دی ڈرائیونگ دے مخالف نیں اوہ کہندے نیں جو زنانیاں لئی ایہہ محفوظ طریقہ ہے پئی اوہ کار وچ اپڻے نال کسے مرد نوں رکھو تے اوہ زنانیاں نوں ایس ذمے واری توں آزاد کر کے اوہناں دی عزت ودھاؤندے نیں۔

پر نجلہ ایس دعوے نوں رد کردیاں نیں۔ ' اوہ اپنے آپ نال جھوٹ بولدے نیں۔ زنانیاں لئی بہتا تحفظ ایہدے وچ ہے پئی اوہ آپوں ڈرائیو کرڻ۔ ساڈے ملک وچ چالی لکھ باہرلے ڈرائیور نیں، اسیں اوہناں توں چھٹکارا پاؤڻا چاہونے آں تے آپوں گڈی چلاؤڻا چاہونے آں ۔'

حریری دے گھر وچ دو کاراں سی تے خاوند تے پتر دے گھر وچ نا رہڻ توں اوہناں کول ڈرائیور نہیں سی۔ ' پر میں چنگے ویلے نوں اُڈیکیا میں ایس گل نوں اُڈیکیا پئی پہلوں دوجیاں زنانیاں ایہدے وچ پہل کرڻ '۔ پر جدوں کوئی وی اگے نہیں ودھیا تے اوہناں نے فیصلہ کیتا پئی ہڻ ویلا آگیا ہے ایس توں پہلوں تسیں سعودی عرب وچ وکھالیاں دی گل وی نہیں سڻی ہووے گی۔ پر جو وی مشرق وسطیٰ وچ ہویا ہے ایہدا میرے تے بڑا اثر پیا ہے'۔

سعودی سماج وچ زنانیاں دی بہتی سانجھ تے اوہناں دے کردار دے حوالے نال جیہڑیاں کوششاں ہورہیاں نیں، نجلہ حریری دی کوشش وی ایہدا اک حصہ ہے۔

فیس بک تے اک صفحے تے مہم چل رہی ہے پئی زنانیاں ستاراں جون نوں وڈی گڻتی وچ باہر نکلڻ تے ڈرائیو کرڻ۔ستمبر وچ ہوڻ والے میونسپل چوناں وچ زنانیاں دے ووٹ دیڻ دے حق لئی وی مہم چلائی جارہی ہے تے زنانیاں نوں قانونی لکھتاں تے دستخط کرڻ دی اجازت لئی بیداری مہم وی چل رہی ہے۔

ایہدے لئی جیہڑیاں آن لائن کوششاں ہورہیاں نیں اوہدے وچ انی سالاں دی یونیورسٹی دی پڑھیار عالیہ اہم کردار نبھا رہیاں نیں۔ اوہ کہندیاں نیں ' اسیں اپنی گل کھلارڻ تے بیداری پیدا کرڻ دی کوشش وچ نیں۔ ایتھے زنانیاں اپنے حقاں توں واقف نہیں ہیڻ'۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels