Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> ویزا دیڻ لئی کوارپڻے دے ٹیسٹ

ویزا دیڻ لئی کوارپڻے دے ٹیسٹ

وچار ڈیسک
May 10th, 2011

1970 دے دھاکے وچ برطانیہ دے ویزا قانوناں ہیٹھ دکھڻی ایشیائی زنانیاں دے کواپڻے دی پرکھ بارے کجھ نویاں حقیقتاں ساہمڻے آئیاں جیہناں توں پتہ لگدا ہے پئی ویزا دیڻ لئی کڑیاں دے کوار پڻے دی پرکھ دا معاملہ جنا سمجھیا جارہیا سی ایہدے توں کِتے بہتا وڈا ہے۔

فروری 1979 وچ کوار پڻے دی پرکھ بارے ہنگامیاں توں مگروں برطانوی سرکار نے ایہدے تے روک لا دتی سی۔ حکومت نے ایہہ منیا سی پئی انج دے اک دو معاملے ہوئے سی پر آسٹریلیائی کھوجیاں دے ہتھ کجھ انج دیاں فائلاں آئیاں نیں جیہناں توں پتہ لگدا ہے پئی گھٹو گھٹ 80 ہندوستانی زنانیاں نوں برطانیہ آؤن لئی ایس بے عزتی والے کم چوں لڻگھڻا پیا سی۔

ایس بھیت دے مگروں ہڻ ایہہ منگ کیتی جارہی ہے پئی برطانوی حکومت معافی منگے۔

برطانوی قانون ہیٹھ تریہہ سال لڻگھڻ دے مگروں انج دیاں فائلاں دی کاپی کڈھڻ دی اجازت مل جاندی ہے۔ ایہدے ہیٹھ آسٹریلیائی کھوجیاں نے کئی محکمیاں چوں لکھتاں لئیاں نیں۔

ایہناں لکھتاں توں پتہ لگدا ہے جو دکھڻی ایشیائی ملکاں وچ ویاہ کر کے برطانیہ وچ جا کے وسڻ والیاں زنانیاں دے کوار پڻے دی پرکھ دیاں اک دو نہیں سگوں کئی واپریاں ہوئیاں سی تے ایہہ پرکھ سرکاری پالیسی دا حصہ سی۔

لندن توں چھپن والے اخبار '' گارڈین '' وچ خبر چھپڻ توں مگروں فروری 1979 وچ برطانوی وزارت خارجہ تے وزارت داخلہ نے پرکھ دے کم تے روک لا دتی سی۔ ایڈیلیڈ یونیورسٹی دے شعبہ قانون دے کھوجی اے ون سمتھ نے وسیلیاں نوں دسیا پئی ایس ویلے برطانوی حکومت نے بس اک دو انج دیاں واپریاں دی گل منی سی پر ایہہ سچ نہیں سی۔

سمتھ نے کہیا ' برطانیہ دی وزارت خارجہ، وزارت داخلہ تے وزیر اعظم دے دفتر توں اسیں جیہڑے کاغذ لئے اوہناں توں ایہو پتہ لگدا ہے پئی 1970 دے دھاکے وچ ہندوستان وچ دلی تے ممبئی وچ 80 زنانیاں دی پرکھ پڑچول ہوئی سی۔ ' ساڈے کول پاکستان تے بنگلہ دیش دے حساب کتاب نہیں ہیڻ پر اینا ضرور ہے جو جنا سمجھیا جارہیا سی ایہہ معاملہ اوہدے توں واہوا وڈا ہے۔'

فروری 1979 وچ ایس معاملے دے ساہمڻے آؤڻ تے جوائنٹ کاؤنسل آن ویلفیر آف مائگرینٹس نے ایہدی بڑی مخالفت کیتی سی۔

1960 وچ بنائے گئے ایس ادارے دی قانونی معاملیاں دی پردھان حنا ماجد نے وسیلیاں نال گل کردیاں ہوئیاں کہیا ایہہ بہت ہی نموشی والا معاملہ ہے تے جیہدے لئی حکومت نوں معافی مڻگڻی چاہی دی ہے۔

اوہ کہندیاں نیں ' اسیں چاہونے آں جو سرکار دکھڻی ایشیائی زنانیاں نال ہوڻ والیاں ایہناں زیادتیاں تے معافی منگے کیوں جو ایہہ نموشی تے نفرت والی گل سی۔ ایس گل نوں سرکاری طور تے منیا جانا چاہی دا پئی کیوں جو ایہہ کم زنانیاں، مائیگرینٹس تے انسانی حقاں دی توہین سی'۔

آسٹریلیائی کھوجیاں دا کہنا ہے جو ہندوستانی جوان کڑیاں دے کوار پڻے دی میڈیکل پرکھ دیاں واپریاں دلی تے ممبئی وچ ویزا دفتراں وچ تے کئی واپری بربانیہ اپڑن تے ہیتھرو ائیر پورٹ تے وی ہوئیاں سی۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels