Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> "تھک گئی آں"

"تھک گئی آں"

وچار ڈیسک
April 22nd, 2011

سپریم کورٹ دے فیصلے توں مگروں، مختاراں مائی دی کتھا مک گئی، یاں صرف اک باب بند ہویا ہے ؟ فیصلے دے مگروں کجھ چر، صوبہ پنجاب دے ضلع مظفر گڑھ وچ آپڻے پنڈ میر والا توں مختاراں بی بی نے بی بی سی نال گل بات کیتی۔ کدی اوہدی آواز وچ مایوسی سی، کدی کاوڑ تے کدی اوہ رو پیندی سی۔

میں اوہناں نوں پچھیا کیہ تسیں مڑ جھات دی اپیل کرو گے؟

مینوں نہیں لگدا۔ میں تھک گئی آں ایہناں عدالتاں توں۔ دس سال ہو گئے نیں کھجل ہوندیاں ہوئیاں۔ ہڻ سپریم کورٹ نے فیصلہ دتا ہے تے ہڻ کیہڑی عدالت رہندی ہے۔ ہڻ صرف رب دی عدالت ہے۔ میں اوہدے تے آس لائی آ۔ مینوں رب نیاں دیوے گا''۔

نیاں لئی مختاراں نے کئی عدالتاں دے بوہے کھڑکائے۔ کدی انسداد دہشت گردی عدالت نے 14 وچوں 6 ملزماں نوں موت دی سزا سڻائی تے اٹھاں نوں چھڈ دتا۔ کدی لہور ہائی کورٹ دے ملتان بنچ نے اوہناں چھیاں وچوں پنجاں نوں چھڈ دتا، تے کدی وفاقی شرعی عدالت نے لہور ہائی کورٹ دے ایس فیصلے نوں معطل کیتا۔ کدی ملزماں نوں پھڑ لیا جاندا تے کدی چھڈ دتا جاندا۔

ایس کہاڻی دے ہر موڑ تے مختاراں نوں آپڻی جان نوں خطرہ محسوس ہوندا ہے۔

' مینوں ڈر ہے میرے خاندان نوں خطرہ ہے۔ جے کوئی نقصان ہویا تے ذمے وار سپریم کورٹ تے سرکار ہووے گی'۔

پر مختاراں خطرے نال کھیڈڻ دی عادی ہے۔ اوہناں دے کیس دیاں حقیقتاں آپڻی تھاں، اوہناں نے آپڻے علاقے دے وڈے جاگیرداراں، یعنی مستوئی قبیلے دے کجھ بندیاں دے خلاف ایف آئی آر درج کرا کے وَیر لے لیا۔

اگے دا دا ردعمل تے مختاراں نے نہیں طے کیتا۔ 'میں ساریاں بھیڻاں نوں کہواں گی، ساریاں ستھاں نوں کہواں گی، میڈیا نوں کہواں گی ساڈا ساتھ دیڻ۔ ایس نظام نوں بدلنا چاہوندی آں جتھے لوکاں نوں عورتاں دی قدر دا پتہ نہیں ہے، جیہڑے وڈیریاں دے فیصلیاں نوں ترجیح دیندے نیں'۔

جنسی زیادتی دیاں شکار زنانیاں دی تے پاکستان وچ بدنامی ہوندی ہے، پر مختاراں نے اوہنوں عزت تے وقار دا وسیلہ بڻایا۔ مختاراں آپڻا مقدمہ ہی نہیں لڑدی رہی، اوہنے عورتاں دی بھلیائی لئی ستھ بڻائی۔ اوہنوں ایوارڈ ملے، بین الاقوامی پدھر تے شہرت ملی، آپڻے پنڈ وچ عزت ودھی۔ اوہدی ہمت نال تے زنانیاں دا وی حوصلہ ودھایا۔

اک طرحاں مختاراں مائی ہڻ اک عورت دا ناں نہیں رہیا۔ اوہ اک نشانی بڻ گئی ہے۔ اک انج دی ہستی جیہڑی پاکستان دیاں خامیاں تے خوبیاں دی نمائندگی کردی ہے۔

اک پاسے ملک دے کئی نظام نیں، پنچائیت، جاگیردارانہ، جرگہ، متوازی عدالتاں دے تے دوجے پاسے اک عورت ہے تے ایہدی مسلسل جدوجہد۔ انج دی عورت دی کہاڻی اک فیصلے نال نہیں مکدی۔

بی بی سی دے تھوہرے نال


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels