Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> مصری انقلاب وچ زنانیاں دا کردار

مصری انقلاب وچ زنانیاں دا کردار

وچار ڈیسک
April 15th, 2011

مصر وچ اجوکا انقلاب بس انج ہی برپا نہیں ہو گیا سگوں ایس بدلی لئی ورہیاں توں مرد تے زنانیاں کارکناں نے انتھک کوششاں کیتیاں سی۔ ایتھے سماج دے کئی میلاں دی نمائندگی کرن والیاں انج دیاں پنج زنانیاں دے خیال پیش کیتے جارہے نیں جیہناں نے ایس انقلاب دی مہاڑ متھڻ تے اوہنوں اخیر تیکر اپڑاؤڻ وچ اہم پاتر نبھایا ہے۔

اوہناں وچوں اک جوان بلاگر، اک گذریل اخوان المسلمین دے رکن دی دھی، اک کوپٹک عیسائی ڈاکٹر، اک جمہوریت نواز کارکن تے اک مزدوراں دی ستھ نال سانگا رکھڻ والی زنانی ہے۔ ایہہ زنانیاں دسدیاں نیں پئی اوہناں لئی ایس انقلاب دی کیہ اُچیچتا ہے۔

دالیہ
جدوں میں پہلی واری دالیہ زیادہ نوں ملیا سی تے اوہ اک روش خیال سائبر کارکن سی تے آپڻے بلاگز راہیں ساریاں شہریاں لئی، اُچیچا زنانیاں دے حقاں لئی کم کر رہی سی ہڻ 3 سال توں مگروں اوہ اک مشہور ماہر بلاگر تے مہم جو ہستی نیں۔

پر جدوں تحریر سکوائر وچ اوہ اک غریب تے ان پڑھ زنانی دے موڈھے نال موڈھا لا کے کھلوتی اودوں اوہنوں احساس ہویا پئی اوہ کسے وڈی چیز دا حصہ بڻی ہے۔ جدوں میں اوس زنانی نوں پچھیا پئی اوہ اوتھے کیوں آئی ہے تے اوہدا جواب سی بدلی لئی تے اودوں میں سمجھ گئی پئی انقلاب دا مڈھ رکھیا گیا ہے'۔

پر ہڻ ایس وہم توں پردھ اٹھ گیا انقلاب وچ ایس شے دی اُچیچتا نہیں سی پئی تسیں بڈھے او یاں جوان، مرد او یاں زنانی۔ صرف ایہدی اُچیچتا سی جو تسیں مصری او۔ پر ہڻ ساڈے وچ فیر جھیڑے پھٹ رہے نیں تسیں مرد او تے اوہ زنانی۔ سانوں کہیا گیا ہے جو اسیں کسے شے وچ مداخلت نہ کرئیے تے جیویں پہلوں ہر مسئلے تے بولدے سی انج گلاں نہ کرئیے۔ حقی گل ہے جو ایہہ ساڈے دل لئی بے دل کرن والی تے خوفناک گل ہے۔

زہرا
چھیکڑلی واری تن بالاں دی ماں زہرا نال میں دو ہزار اٹھ وچ ملیا سی اوہ اک سکول دی مہتمم نیں۔زہرا دی ملنی آپڻے پیو تے خاوند نال جیہڑے دوویں روک لگی ستھ اخوان المسلمین دے رکن نیں حالیں ہوئی ہے جیہناں نوں رات نوں چھاپا مار کے کاروائی وچ پھڑیا گیا سی۔

زہرا اوہناں دی رہائی لئی آپڻی جدوجہد لئی پرعزم سی۔ اوہ حکومت نوں ایہدے لئی عرضی دیندیاں رہیاں تے میڈیا نوں وی اپیل کردیاں رہیاں۔

ہڻ جدوں کہ اوہ آزاد نیں زہرا نے آپڻی طاقت تعلیم دے پچھے لاؤڻی شروع کیتی ہے، ایس انقلاب دی سب توں وڈی چیز ایہہ ہے جو اوہنے مصر نوں نویں آس تے آزادی دتی ہے۔

اوہ آکھدیاں نیں پئی اوہ وکھرے وچار لئی بالاں نوں حوصلہ دے رہیاں نیں کئی منصوبیاں تے کئی قدراں وچ یقین لئی۔ ایہہ بہت اہم ہے'۔

مونا
مونا ڈاکٹراں دی اک ستھ دی آگو ہے۔ اوہ چار سال توں ڈاکٹراں نوں چنگی تنخواہ تے چنگے ماحول وچ کم کرن دے حق وچ لڑدیاں رہیاں سڻ۔ پر حسنی مبارک دے بے ایمان تے ظلمی دور وچ اوہناں نوں ایس لڑائی وچ کامیابی نہیں ملی۔

ہڻ اوہ ایس موقعے نوں ضائع کرنا نہیں چاہوندیاں۔ اوہ وی تحریر سکوائر تے سڻ پر ڈر ہے جو کتے ایس انقلاب دی چوری نہ ہو جاوے تے اوہی پراڻے ورتارے فیر نہ شروع ہو جاڻ۔

اوہ کہندیاں نیں آزادی دا احساس شروع ہویا ہے پر حالی پورا نہیں ہے، لمے راہ دا ایہہ پہلا قدم ہے۔ حالی حقیقی آزادی لئی تے ہور کئی شیواں دا ہوڻا رہندا ہے۔

اوہ کہندیاں نیں جو اوہ تے اوہناں دے ہور تحریر اسکوائر دے وکھالی سنگی جے لوڑ پئی تے ایس انقلاب نوں جیوندا رکھڻ لئی آپڻی جان دے دیڻ گے۔

جمیلہ
جمیلہ ٹی وی دی مشہور پریزینٹر سڻ جدوں اوہناں نے تے اوہناں دے کھسم ایمن نور نے حسنی مبارک نوں کھل کے چیلنج کیتا سی۔ ایمن نور نے صدارتی چوڻاں وچ وی حصہ لیا سی تے اوہ ہار گئے سی۔ ایہدے مگروں اوہناں نوں جیہڑی پارلیمانی چھوٹ سی اوہنوں مکا کے جیل گھل دتا گیا سی۔

تیویں مرد دے بینک اکاؤنٹ سیل کر دتے گئے سی۔ جمیلہ نوں اوہناں دی نوکری نوں کڈھ دتا گیا تے کھسم دی رہائی دیاں کوششاں لئی اوہناں نوں ڈرایا گیا سی۔

مصر نے جیہڑی کامیابی پائی ہے جمیلہ ایہدے تے فخر کردی ہے تے اوہنوں برلن کندھ دا ڈگڻا کہندی ہے '' اسیں آپوں انقلاب لیاندا ہے تے مصر دے لوک کسے دے قرض دار نہیں ہیڻ پہلی واری ایہہ ساڈا ملک ہے تے اوہناں دا (حکمراناں) دا نہیں ہے۔

عائشہ
عائشہ عبدالعزیز دریائے نیل دے ڈیلٹا وچ اک کسان نیں تے مزدوراں دی پربندھک وی۔ کواری عائشہ آپڻے گھر دی میز تے بیٹھدیاں نیں اوہ کئی طرحاں پنڈاں تھاواں دیاں زنانیاں نالوں اڈ نیں۔ 2008 وچ اوہناں زنانیاں نوں مرداں دے برابر مزدوری دیڻ لئی تماکو دی فیکٹری دے نوکراں دی اک ہڑتال کیتی سی تے ایہدے وچ کامیابی وی پائی سی۔

پر پچھلے سال پارلیمانی چوڻاں وچ دھاندلی دے پاروں اوہ پارلیمنٹ دی اک سیٹ جتڻ وچ کامیاب ہو گئیاں سی اوہ وی آؤڻ والیاں چوڻاں وچ حصہ لیڻ گیاں۔

اوہ جتڻ یاں ہارڻ پر چنگا سکول، ہسپتال، چنگیاں سڑکاں تے صاف پاڻی لئی اوہ لڑدیاں رہڻ گیاں۔ میں اک زنانی آں تے رب دا شکر ہے میں آپڻے حقاں توں خبردار آں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels