Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> بنگلہ دیش: نکی عمر دیاں کڑیاں دے ویاہ دا مسئلہ

بنگلہ دیش: نکی عمر دیاں کڑیاں دے ویاہ دا مسئلہ

وچار ڈیسک
April 13th, 2011

بنگلہ دیش !! دکھڻی ایشیا دی انج دی سرزمین جتھے غریبی نے کوساں دور تیکر تے سالاں توں ڈیرے لائے ہوئے نیں۔ ایتھے غریبی اک دو نہیں کئی مسئلیاں نوں جنم دیندی ہے۔ ایہناں مسئلیاں وچ نکی عمرے ویاہ وی اک وڈا مسئلہ ہے۔ حکومتاں تے غیر سرکاری اداریاں دیاں کئی کاروائیاں دے مگروں وی ایس مسئلے نوں ہڻ تیکر وس وچ نہیں کیتا جاسکیا۔ اج وی سیکڑیاں ماپے اپنیاں دھیاں دا ویاہ نکی عمرے ہی کر دیندے نیں۔

خبراں دے ادارے ارن موجب ملک دی سب توں وڈی غیر سرکاری ستھ فیملی پلاننگ ایسوسی ایشن آف بنگلہ دیش دے پروجیکٹ مینجر غیاث الدین دا کہڻا ہے: نکی عمرے ویاہ بنگلہ دیش دا اک بڑا وڈا مسئلہ ہے۔ جے ہن وی ایسے مسئلے نوں نہ نبیڑیا گیا تے زچہ بچہ دیاں موتاں نوں روکڻا بہت اوکھا ہو جاوے گا۔

یونیسف ولوں سال دو ہزار گیاراں لئی جاری کیتی اک رپورٹ موجب بنگلہ دیش دی ویہہ توں چویہہ سال دی اک تہائی کڑیاں دے ویاہ پندراں سال دی عمر وچ کر دتے جاندے نیں دو ہزار نو وچ دو فیصد کڑیاں نے اٹھارویں سالگرہ توں پہلوں ہی ویاہ دی سالگرہ منائی۔

ماپیاں دے نیڑے نکی عمرے ویاہ دے کارناں وچ داج گھٹ دینا تے کڑیاں نوں جنسی طور تے دھمکاؤڻ توں بچاؤڻا ہے۔ ماپے ایہناں مسئلیاں نوں بچڻ لئی اکلا حل ایہو سمجھدے نیں پئی کڑیاں دا نکی عمرے ہی ویاہ کر دتا جاوے تاں جو کڑیاں دیاں ذمے واریاں توں بچ سکڻ۔ اوہ غریبی پاروں کڑیاں نوں چنگا بھلک نہیں دے سکدے ایس لئی کڑیاں دی ذمے واری چکڻ دی تھاں اوہناں دا گھٹ عمر وچ ویاہ کر دینا اپنے مسئلیاں دا حل سمجھدے نیں۔ گھٹ عمر ہوڻ دی صورت وچ اوہناں نوں داج وی گھٹ دیڻا پیندا ہے۔

نیشنل چائلڈ میریج ریسٹرین ایکٹ 1929 ہیٹھ اٹھاراں سال توں تھوڑی عمر دے بالاں دے ویاہ غیر قانونی نیں پر قانون تے چنگے انداز وچ عمل درآمد نہ ہوسکڻ پاروں نکی عمرے ویاہواں دی ریت زور پھڑ دی جارہی ہے۔ پولیس تے پربندھیاں دیاں کوششاں نال کئی ویاہواں نوں عین موقعے تے روکیا وی گیا ہے پر کئی واری غیر قانونی ویاہ ہو جاندے نیں۔

نکی عمرے ویاہ نال کڑیاں نوں بماریاں گھیر لیندیاں نیں۔ کئی واری کڑیاں دی صحت اینے جوگی نہیں ہوندی جو اوہ اپنے ہون والے بالاں نوں پال سکڻ۔ نتیجہ ایہہ پئی زچہ بچہ دوہویں مر جاندے نیں۔ انج دے کیساں دی گنتی ودھ رہی ہے۔

زنانیاں تے بالاں دے پربندھاں دی وزارت دے سیکرٹری طارق الاسلام موجب حکومت نے نکی عمرے ویاہواں نوں روکڻ لئی کئی مہماں شروع کیتیاں ہوئیاں نیں جیہناں راہیں وڈے پیمانے تے لوکاں وچ جانکاری پیدا کیتی جارہی ہے۔ ایس توں اڈ حکومت ایس سلسلے وچ چنگی قانون سازی تے پہلوں توں موجود قانون نوں صحیح طریقے وچ لاگو کرن دا وی ارادہ رکھدی ہے پر صورتحال تے قابو پاؤڻ وچ ویلا لگ سکدا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels