Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> ہندوستان وچ کڑیاں دا کال

ہندوستان وچ کڑیاں دا کال

وچار ڈیسک
April 4th, 2011

ہندوستان وچ منڈیاں نالوں کڑیاں دی در بہت نیویں پدھر تے اپڑ گئی ہے۔ نویں حکومتی حساب کتاب موجب ایس ویلے ہندوستان وچ 6 سال توں گھٹ عمر دے اک ہزار منڈیاں دے مقابلے وچ کڑیاں دی گڻتی 914 ہو گئی ہے۔

1947 وچ آزادی دے مگروں ہندوستان وچ کڑیاں دی ایہہ گڻتی سب توں گھٹ دسی گئی ہے۔ 10 سال پہلوں ہر اک ہزار منڈیاں دے مقابلے وچ کڑیاں دی گڻتی 927 سی۔ ہندوستانی وسیب وچ منڈیاں نوں کڑیاں تے ترجیح دتی جاندی ہے تے اوتھے کئی واری ماپے ایہہ پتہ لاؤڻ دے مگروں پئی اوہناں دے گھر وچ جمڻ والا بال کُڑی ہووے گی، حمل ضائع وی کروا دیندے نیں۔

حساب کتاب موجب ہندوستان وچ بالڑیاں نوں قتل کرن دی ریت بڑی پراڻی ہے۔ اوتھے کئی ماپے بالڑیاں نوں بھار سمجھدے نیں تے غریب ماپے آپڻیاں بالڑیاں دے ویاہ لئی داج دا پربندھ وی نہیں کرسکدے، ایس لئی اوہناں دی کوشش ہوندی ہے پئی اوہناں دے گھر کوئی کڑی نہ جمے۔ ہندوستان وچ وڈی گڻتی وچ ویاہیاں زنانیاں نوں ایس بارے بہتا دبا دا ساہمڻا وی ہوندا ہے پئی اوہ منڈیاں نوں ہی جنم دیڻ۔

اجکل ہندوستان وچ حاملہ زنانیاں الٹرا ساؤنڈ راہیں آپڻے ہوڻ والے بال دی جنس دا پہلوں ہی پتہ لا لیندیاں نیں تے جدوں اوہناں نوں پتہ لگدا ہے پئی ہوڻ والا بال اک کڑی ہے تے حمل ڈیگ دتا جاندا ہے۔

1961 توں ہی ہندوستان وچ کڑیاں دی در گھٹ رہی ہے۔ ایس ویلے ہر اک ہزار منڈیاں دے مقابلے وچ کڑیاں دی گڻتی 976 سی۔ واسودیو موجب ایہہ نواں حساب ایس گل دی وڈی نشاندہی کردے نیں پئی کڑیاں نوں بچاؤڻ نوں یقینی بناؤڻ وچ ہندوستان سانجھیاں ناکام ہو گیا ہے۔

عالمی پدھر تے اک ہزار منڈیاں دے مقابلے وچ کڑیاں دی گڻتی اک ہزار پنجاہ بڻدی ہے۔ ہندوستانی وزارت داخلہ دے سیکریٹری جی کے پلائی نے کہیا جو ایس معاملے نوں نبیڑن لئی فیملی پلاننگ دی پالیسی نوں فیر پرکھیا جاڻا بہت ضروری ہے۔ اوہناں نے منیا پئی پچھلے 40 سال توں بھاویں ایس حوالے نال کئی کاروائیاں کیتیاں گئیاں نیں پر لوڑیندے سٹے حاصل نہیں ہوسکے ہیڻ۔ اک محتاط گویڑ موجب ہندوستان وچ ہر سال گھٹو گھٹ پنج ملین بالڑیاں نوں ماں دے رحم وچ ہی مار دتا جاندا ہے۔

نویں دلی دی جواہر لال نہرو یونیورسٹی نال جڑے ڈیموگرافی دے ماہر پی کلکامی موجب ہندوستان وچ نہ صرف پنڈاں تھاواں وچ بالڑیاں دے جمڻ نوں مندا سمجھیا جاندا ہے سگوں اوتھے کئی پڑھے لکھے لوک وی آپڻے گھر جمڻ والے بالاں دی جنس دا پتہ کراؤندے نیں تاں جو کڑیاں ہوڻ دی صورت وچ اوہناں نوں ایس دنیا وچ ہی نہ آؤڻ دتا جاوے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels