Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> جنسی مارا ماری دیاں شکار پاکستانی زنانیاں نیاں لبھ رہیاں نیں

جنسی مارا ماری دیاں شکار پاکستانی زنانیاں نیاں لبھ رہیاں نیں

وچار ڈیسک
March 25th, 2011

ہڑھ نال تباہ اک پنڈ دی ریحانہ یاسمین دا خیال سی جو بڑیاں مہربان نظر آؤڻ والیاں زنانیاں خورے اوہدی مدد لئی آئیاں سی پر اوہناں نے یاسمین نوں دو جڻیاں دے حوالے کر دتا جیہناں اسلحہ وکھا کے اوہدی عزت لٹی۔

پچھلے سال دے تباہی دے ہڑھ مارے گبھلے پنجاب دے اک قصبے راجڻ پور نال سانگا رکھڻ والی 19 ورھیاں دی ریحانہ یاسمین موجب 3 زنانیاں اوہنوں اوہدے گھروں ایہہ آکھ کے اپنے نال لے گئیاں پئی ہڑھ ماریاں لئی امداد ونڈی جا رہی ہے تے اوہ اوہنوں خوراک لے کے دیڻ گیاں۔ 'پر اوہ مینوں اک ہور گھر وچ لے گئیاں جیہڑا میرے گھر توں دور سی تے مینوں اوہناں وچوں اک زنانی دے دو پتراں دے حوالے کر دتا گیا۔'

نقاب دے پچھے لکیاں ہنجواں نال بھریاں لال اکھیاں دے نال یاسمین نے فرانسیسی خبراں دے ادارے اے ایف دے رپورٹر نوں دسیا پئی اوہناں دوہاں مرداں نے اسلحہ وکھا کے اوہدے نال نکاح دے کاغذاں تے زوریں دستخط کرائے تے فیر دو واری اوہنوں جنسی مارا ماری دا نشانہ بڻایا۔ یاسمین موجب ایہناں دوہاں مرداں دا کہڻا سی جو ایہہ اوہدے پیو دی ہڑھ ماریاں لئی بڻائی گئی امدادی کمیٹی وچ رلت دا بدلہ سی۔

"اوہناں دی میرے پیو دے نال دشمڻی سی، جیہناں نوں ساڈے پنڈ دے ہڑھ ماریاں دی مدد لئی بڻائی گئی ریلیف کمیٹی دا رکن بڻایا گیا سی۔ اوہ اوہناں نوں سبق سکھاؤڻا چاہوندے سی۔ '' یاسمین موجب "اوہناں نے مینوں کہیا ، جدوں تیرا پیو آپڻی دھی دی راکھی نہیں کرسکدا تے اوہ پنڈ دے لوکاں دی مدد کیویں کرے گا۔"

سال 2010 وچ پاکستانی تاریخ دے سب توں بھیڑے ہڑھ دے سٹے وچ 2000 دے نیڑے بندے مارے گئے تے اک کروڑ توں بہتے بندے متاثر ہوئے۔ خبراں دے ادارے اے ایف پی نے پاکستان وچ زنانیاں دے حقاں لئی کم کرن والی اک ستھ 'عورت فاؤنڈیشن' دے حوالے نال دسیا ہے جو پچھلے سال پاکستان وچ نیڑے تیڑے 1000 زنانیاں نوں جنسی زیادتیاں دا نشانہ بڻایا گیا۔ 2000 نوں اغوا کیتا گیا جدوں کہ 1500 دے نیڑے زنانیاں نوں قتل کر دتا گیا۔

عورت فاؤنڈیشن موجب ایس گڻتی توں اڈ 500 ہور زنانیاں کاروکاری یعنی عزت دے ناں تے قتل دا شکار ہو گئیاں۔ عورت فاؤنڈیشن دے بڻائے اک گھر وچ پناہ لیڻ والی گلشن بی بی آپڻے پیو دے مخالفاں ولوں ناجائز سانگیاں دے الزام دے مگروں انج دے ہی انجام دا شکار ہوئی۔ گلشن موجب: '' جدوں کارو کاری دی گل ہوجاندی ہے تے فیر ایس گل دی اُچیچتا نہیں رہندی پئی ایہدے وچ کنی سچائی ہے سگوں الزام اُچیچے ہو جاندے نیں۔''

پاکستانی صوبہ سندھ نال سانگا رکھڻ والی گلشن بی بی دے خلاف اوہدے پیو دے مخالفاں دے الزاماں دے مگروں اوہدے پیو نے گلشن نوں پنڈ دی پنچائت دے حوالے کرن دی تھاں اوہنوں دوجی تھاں گھل دتا تاں جو اوہناں دی جان بچائی جا سکے۔ پر بدنصیبی نال اوہ پنڈ دے سردار دے ہتھ آگئی ،جیہنے اک سال تیکر اوہنوں اپنے اوتھے قید رکھیا تے جنسی مارا ماری دا نشانہ بڻاؤندا رہیا۔ اخیر پولیس نے اوہنوں ایس سردار دی قید توں رہائی دوائی۔

عورت فاؤنڈیشن ولوں حالیں جاری حساب موجب پچھلے اک سال وچ پاکستان وچ 600 زنانیاں نے آپ ہتیا کیتی۔ جدوں کہ 500 دے نیڑے زنانیاں نوں گھروکی مارا ماری دا نشانہ بڻایا گیا۔ اوہناں وچوں 70 زنانیاں تے تیزاب سٹیا گیا۔ حساب موجب 8000 زنانیاں نوں کئی جرماں دا نشانہ بڻایا گیا پر عورتاں دے حقاں لئی کم کرن والیاں ستھاں موجب اصلی گڻتی ایہدے توں کِتے بہتی ہے۔

عورت فاؤنڈیشن دی ملکی پدھر تے کوآرڈینیٹر ربیعہ ہادی موجب "پاکستان وچ اصلی مسئلہ قانون ورتڻ دے حوالے نال ہے۔ لوک قانون نوں غلط ورتدے نیں۔''

گلشن بی بی نے جیہڑے مرکز وچ پناہ لئی ہے اوہ مختاراں بی بی نے بڻایا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels