Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> برڈ فلو دے بعد کیہ ہووے گا؟

برڈ فلو دے بعد کیہ ہووے گا؟

وچار ڈیسک
February 14th, 2013

'' ایشیا دے مختلف علاقیاں وچ روگ کھلارن والے پنچھیاں دے انفلوائنز دی پھُٹن والی وباء انسانی صحت لئی اِک خطرہ تے زرعی پیداوار لئی تباہ کن ثابت ہو سکدی اے'' ایس خطرے دا اظہار اقوام متحدہ دے خوراک دے ادارے جنوراں دی صحت دی عالمی تنظیم تے عالمی ادارا صحت نے اپنے اِک سانجھے بیان وچ کیتا اے۔ ایہناں تنظیماں دے مطابق ایہہ روگ کھلارن والی اِک نہایت شدید قسم دی وباء اے جیہنے حالے شدت اختیار نہیں کیتی اے پر ایہدے خطرے ضرور ہین۔ ایہہ روگ انسانی صحت اِک وڈا چیلنج ثابت ہو سکدا اے۔
عالمی ادارا صحت دے ڈائریکٹر جنرل نے ایس سلسلے وچ کہیا اے کہ چین توں شروع ہون والا روگ سارس وانگوں ایس روگ نال نبڑن لئی وی متاثرہ مُلکاں دے نال سارے بین الاقوامی اداریاں دا ویلے سِر تعاون تے ملن ورتن بڑا ضروری ہو گیا اے۔ سارس اُتے قابو پان وچ جیس توجہ تے تعاون دا مظاہرہ کیتا گیا' ایس وباء نال نبڑن لئی وی ایس اندازے دا اختیار کرنا ضروری اے۔
ماہرین دے مطابق انساناں تے زرعی جنوراں وچ ایس روگ دی بہت زیادہ عرصے تک موجودگی نال ایس گل دا اندیشہ اے کہ انفلوئنزا دی اِک ایہو جیہی قسم جنم لوے گی جیہڑی ساری دنیا وچ کھلر جاوے گی۔ ایس توں اڈ ایہہ مرغ بانی دی صنعت تے چھوٹے پولٹری فارماں لئی معاشی تباہی وی بن سکدی اے۔ ایہنوں کھلرن توں روکن لئی مرغیاں وڈے پیمانے اُتے ہلاکت نال ہون والے نقصانات دا پورا کرنا وی ضروری ہو جاوے گا۔
ایوین انفلوئنزہ کیہ اے؟ : ایس انفوائنزہ دے وایرس دی شناخت پہلی واری اِک سو ورھے پہلاں اٹلی وچ ہوئی سی۔ عالمی ادارا صحت نے ایس گل دی تصدیق کر دِتی اے کہ انفلوئنزہ دے وائرس ایچ5 این1 (H5N1) دے نال ویت نام وچ پنج موتاں ہو چکیاں نیں۔ ایس قسم دا تعلق اُنج تے پنچھیاں دے انفوائنزہ دیاں قسماں نال ای اے پر خطرہ اے کہ ویلا لنگھن دے نال ایہہ انساناں وچ سرایت کر کے بڑی تیزی دے نال اِک توں دوجے انسان وچ کھلر کے وبائی شکل اختیار کر سکدا اے۔ پنچھیاں دے وائرس دی ایس قسم دی ترتیب تے تسلسل دی نشاندہی ہو چکی اے۔ ایہناں وِچوں کم دے مورثے (Genes) ایوین قسم دے نیں پر ویلا لنگھن دے نال ایہہ انسانی موروثاں وچ داخل ہو سکدے نیں۔
ہُن تک انفلوائنزہ دیاں پندرھاں ذیلی قسماں دی کھوج لائی جا چکی اے۔ ذیلی قسم ایچ5 تے ایچ7 وی ایہناں وچ شامل اے۔ انفلوئنزہ دے مختلف وائرس دے جینیاتی جز موروثاں دی ضد (Antigenes) دے نال ادل بدل کر کے اپنے آپ نُوں بدل لیندے نیں جیہدی وجہ توں پہلے موثر ثابت ہون والے ٹیکے (ویکسین) بے اثر ہو جاندے نیں۔
ایوین فلو دی پچھلی وبا 1997 وچ ہانگ کانگ وچ پھُٹ پئی سی' پر ساڈے 15 لکھ مرغیاں نوں فوری ہلاک کر دین دی وجہ توں ایہہ اوتھے ای ختم کر دِتی گئی۔ ایہہ ریکارڈ کم 3 دِناں وچ مکمل کر دِتا گیا سی۔ ایوین فلو دیاں ساریاں قسماں وچ این5 این1 بڑی تیزی نال تبدیل ہوندی اے۔ دسمبر 2003 وچ جمہوریا کوریا وچ ایہنے انساناں نُوں اپVی لپیٹ وچ لِتا فیر جنوری 2004 وچ ویت نام ایہدی لپیٹ وچ آیا۔ ایہدا مقابلہ کرن لئی نویں ٹیکے دی تیاری وچ گھٹو گھٹ چار مہینے لگ جان گے۔
افلوئنزہ یاں فلو' نزلا وبائی اے جیہڑا اصل وچ پھیپھڑیاں تے ساہ دیاں نالیاں وچ انفیکشن دا کارن بن جاندا اے جہدے نال بخار ہون دے علاوہ نک وگدا اے' گلے وچ خارش' کھنگ سِر تے پٹھیاں وچ پِیر ہوندی اے۔ روگی اپنے آپ نُوں بڑا بیمار محسوس کردا اے۔ انسانی فلو دے وائرس دور ہوندے نیں۔ یعنی الف تے ب' ایہناں وچوں ہر اِک دیاں اپنیاں مختلف قسماں ہوندیاں نیں پر ایہناں ساریاں دی وجہ توں لاحق ہون والیاں علامتاں اِک ورگیاں ہوندیاں نیں۔
انفلوئنزہ عام نزلے توں بالکل مختلف ہوندا اے' کیوں جے عام نزلے دے بر خلاف ایہدا وائرس خلیات وچ بہتی سرایت کر کے ساہ دیاں نالیاں نُوں متاثر کر کے نمونیے دا کارن بن کے روگ نُوں پچیدہ کر دیندا اے۔ ایہہ ایس روگ دی اِک بڑی عام پچیدگی تے تکلیف اے۔ ایہدے توں بچن لئی حفاظتی ٹیکے دا استعمال مناسب ہوندا اے۔ وبائی صورت وچ خاص طور اُتے ٹیکا لوا لینا چاہیدا اے۔ ٹیکے دے علاوہ دو نویاں دواواں اوسلٹا میویر تے زنا میویر وی الف تے ب قسم دے فلو لئی مؤثر ثابت ہوندیاں نیں۔ ایہناں دے پہلوئی اثرات وی بڑے گھٹ ہوندے نیں۔ روگ دے دوران بیکٹیرہ وی حملہ آور ہون تے ایہو جیہی صورتحال وچ اینٹی بایوٹکس دواواں وی دتیاںجاندیاں نیں۔





Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels