Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> کول کٹ: ڈاکٹر ثمر مبارک دی سائنسی ٹھگی

کول کٹ: ڈاکٹر ثمر مبارک دی سائنسی ٹھگی

وچار ڈیسک
August 20th, 2012
2.5 / 5 (2 Votes)

دنیا دی کوئی اجیہی گٹھ نہیں جیس وچ ٹھگی نہ ہوندی ہووے۔ ایہہ ٹھگیاں پیسہ ودھاون دیاں سکیماں توں لے کے جعلی سائنسی ٹوٹکیاں تیکر عام سدھارن لوکاں نوں لٹن لئی بنایاں جاندیاں ہین۔ ایہہ ٹھگی چتر چالاک بندے لکا چھپا کے کردے ہین پر پاکستان دنیا نالوں وکھیرا ہے کیوں جو ایتھے ٹھگی دا قومی پدھر تے ہوندی ہے تے حکومت اوسدا مکو ٹھپن دی تھاں اوس وچ رلتی ہوون تے مجبور ہو جاندی ہے۔ جیویں واٹر کٹ وچ ہویا یا جیویں میزائلی ڈاکٹر ثمر مبارک تھر وچوں کولہ کڈھن تے دس پندرہ ملین گوا چکے ہین تے قومی پدھر تے کوئی اوہناں نوں جھوٹھا نہیں کردا۔ چلو ایس بہانے اسیں تھر وچ کوئلے دے مسئلے نوں کھولدے ہاں تے ویکھنے ہاں جو ٹھگی کیہہ ہو رہی ہے۔
 
تھر وچ ان مونہے کوئلے دی دھم تے بڑے چِر توں ہے پر اوتھے کجھ ہویا نہیں۔ ورلڈ بینک نے ایس منصوبے دی کاہڈ دس ملین ڈالر لا کے کروائی سی۔ اوس دے مطابق ایس کوئلے نوں کڈھ کے تے ورت کے بجلی بناون دے منصوبے تے دس سال تے کوئی دس باراں بلین ڈلر لگن گے۔اوس دی وجہ ایہہ ہے جو کوئلہ زمین یا ریت توں دو سو گز ہیٹھ ہے۔ کوئلہ کڈھن لئی سرنگاں بنایا جاندیاں ہین پر تھر وچ انج ہو نہیں سکدا کیوں ریت وچ سرنگ بن نہیں سکدی۔ ایس لئی کوئلہ کڈھن لئی پہلاں اتوں دو سو گز ریت ہٹاونی پوے گی تے ایس تے دو تن سال تے کئی بلین ڈالر لگن گے۔

دوجا کوئلہ کڈھن لئی بہت سارے پانی دی لوڑ ہوندی ہے جیہڑا کہ کسے نہر نال ہی ایتھے آسکدا ہے۔ ایہہ نہر زمین توں اتے اچی اسارنی پوے گی (زمین وچ کڈھ کے نہیں ) کیوں جو تھر سندھ دریا دے پانی توں اچی تھاں تے ہے۔ ایس نہر نوں وی بناون لئی کجھ سال تے کئی بلین ڈالر چاہیدے ہین۔ پھیر جد کوئلہ نکل آیا تے بجلی بناون لئی وڈھی مشینری دی لوڑ ہے۔ ایہہ سارا کم ہو تے سکدا پر ایس تے ویلا لگے گا ۔

۱۹۹۷ وچ اک چینی کمپنی نے تھر دے اک حصے توں کوئلہ کڈھ کے بجلی بناون لئی گیاراں سینٹ دی بولی لائی سی۔ مطلب اوہ گیاراں سنٹاں وچ ریت وی ہٹاون گے ، پانی وی لیاون گے تے پھیر کوئلے توں بجلی بنا کے پاکستان نوں گیاراں سنٹاں دی ویچن گے۔ پاکستان نے ایس نوں مہنگا سودا سمجھ کے نہیں سی منیا۔ہُن چودہ سالاں دی مہنگائی توں مگروں اوہو چینی کمپنی پندراں سولاں سینٹ منگے گی۔ پاکستان دا تے مسئلہ ہی ایہہ ہے جو اینی مہنگی بجلی وارا نہیں کھاندی۔جے ایہو کرنا ہووے تے پھیر مسئلہ ہی کوئی نہیں کیوں جے پاکستان وچ لوڑوں ودھ بجلی پیدا کرن دے سادھن (ڈیزل پلانٹ) ہین پر اوہناں دی بجلی بہت مہنگی ہو جاندی ہے۔

ڈاکٹر ثمر مبارک دا دعوی ہے جو اوہ کوئلہ باہر کڈھن دی تھاںاوس نوں نوں زمین دے اندر ہی گیس بنا دین گے تے ایس گیس نال بجلی پیدا ہووے گی۔ انج ہوندا تے ہے تے ہو وی سکدا پر ایس تے خرچا کئی سو گنا ودھ آوے گا تے جو بجلی بنے گی اوس دا مُل بہت ہی اتے ہووے گا۔ایہہ منیا جاندا ہے جو پاکستان وچ بجلی ست سینٹ فی یونٹ تیکر وارا کھا سکدی ہے ۔ ایہہ ست سینٹ تے بجلی وی ایس طرحاں رکھی جا سکدی ہے جو اوس وچ پانی توں بنی بجلی رلتی ہوندی ہے جیہڑی اک توں ڈیڑھ سینٹ فی یونٹ نال پیدا ہوندی ہے۔ ڈیزل نال بنائی جان والی بجلی گیاراں باراں سینٹاں نال پیدا ہوندی ہے۔ جے پاکستان ایس بھاہ تے بجلی ورت سکے تے پاکستان وچ بجلی دی کوئی گھاٹ نہیں ۔ مسئلہ تے ایہہ ہے ایس مل تے بجلی وارا ہی نہیں کھاندی تے ڈاکٹر ثمر مبارک سستی بجلی بناون دی ٹھگی لا رہے جیہڑی سائنس دے پکھ نال ناممکن ہے۔ اوہناں دے طریقے نال بنن والی بجلی ہو سکدا ہے سولاں توں ودھ سنٹاں وچ بنے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels