Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> مچھی بہتی کھاڻ نال فالج دا خطرہ گھٹ

مچھی بہتی کھاڻ نال فالج دا خطرہ گھٹ

وچار ڈیسک
September 27th, 2011
3 / 5 (2 Votes)

ہفتے وچ کجھ واری مچھی کھاڻ والے بندیاں وچ فالج دے دورے دا ڈر اوہناں بندیاں نالوں کجھ گھٹ ہوجاندا ہے جیہڑے اُکا مچھی نہیں کھاندے یاں بہت گھٹ کھاندے نیں۔ ایہہ گل سویڈن دے کیرولنسکا انسٹیٹیوٹ دے کاہڈواں سوزانہ لارسن تے نکولا تے سنی دے کاہڈو اخبار '' اسٹروک '' وچ چھپڻ والی نویں کاہڈ وچ دسی گئی ہے۔

کاہڈواں دا کہڻا ہے پئی مچھی وچ موجود اومیگا تھری فیٹی ایسڈ نال بلڈ پریشر تے کولیسٹرول تے چنگے اثر پیندے نیں جیہدے نال فالج دے خطرے گھٹ ہوندے نیں۔ایہہ نکھیڑا امریکہ، یورپ ، جاپان تے چین وچ ہوڻ والے پندراں کاہڈو مطالعیاں دا ہے۔ اوہناں وچوں ہر مطالعے وچ لوکاں نوں ایہہ پچھیا گیا جو اوہ ہفتے وچ کنی واری مچھی کھاندے نیں تے فیر 4 توں 30 سال وچ ایہہ ویکھیا گیا جو اوہناں وچ کنیاں نوں فالج ہویا سی۔

امریکہ دے ہارورڈ اسکول وچ وبائی بماریاں دے کاہڈو دار یوز مظفرئین نے کہیا ''میرے خیال وچ مچھی وچ کل اومیگا تھری سڻے واہوا غذائی اجزا موجود ہوندے نیں جیہدے نال ایس خطرے وچ کمی ہوندی ہے''۔

مظفرئین نے کہیا مچھی وچ موجود وٹامن ڈی، سلینیم تے کجھ ہور پروٹیناں نال وی فالج وچ فیدا ہوندا ہے۔اوہناں کہیا ایس گل دے بڑے ثبوت ملے نیں پئی ہفتے وچ دو تن واری مچھی کھاڻا چنگا ہے۔

نکھیڑے دے انکڑے 30 توں 103 سال دیاں عمراں دے 4 لکھ بندیاں توں لئے گئے نیں۔ ہرہفتے مچھی دیاں تن بہتیاں خوراکاں کھاڻ والے بندیاں وچ فالج دے خطرے وچ 6 فیصد کمی ویکھی گئی۔

ہر مطالعے وچ بہتی مچھی کھاڻ والے بندیاں وچ فالج دا خطرہ اوہناں بندیاں نالوں 12 فیصد گھٹ ویکھیا گیا جیہڑے بہت گھٹ مچھی کھاندے نیں۔ مظفرئین دی کھوج نال اک گل ساہمڻے آئی جو تلی ہوئی مچھی یاں فش سینڈوچ کھاڻ والے بندیاں نوں فالج وچ کوئی بہتا فیدا نہیں اپڑیا پر اوہناں موجب حالیں کاہڈ نال ایہہ ثابت ہوڻا ہے جو بناء تلی ہوئی مچھی کھاڻ نال فالج دے خطرے وچ بہتی کمی ہوندی ہے۔

اوہناں دا ایہہ وی کہڻا سی جو فالج دے خطرے نوں گھٹاؤڻ لئی صحت مند غذا کھاڻا، بہتی ایکسرسائز کرنا تے لوکاں وچ آپڻی صحت دا معائنہ کراؤڻ دا بہتا شعور کھلارنا وی فیدے مند ہوندا ہے۔ ایہہ وی خیال ہے جو ایہدا فیدا اوہناں نوں ہووے گا جیہڑے ایس ویلے اُکا مچھی نہیں کھاندے یاں بہت گھٹ کھاندے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels