Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> دماغ دا دشمڻ کوڻ ؟

دماغ دا دشمڻ کوڻ ؟

August 12th, 2011

انسان بڑے چراں توں کدی بادام تے اخروٹ کھا کے، کدی ذہنی آزمائش دیاں ورزشاں کر کے تے کدی ون سونیاں دوائیاں تے طریقیاں نال اپڻا دماغ ودھاؤڻ دیاں کوششاں کررہیا ہے۔ پر دوجے پاسے کوئی ہولی ہولی اوہدا دماغ کھائی جاندا ہے اوہ وی انج جیویں چوہا شیواں کتردا ہے۔

ساڈا دماغ اپڻیاں ساریاں کاروائیاں اُچیچے خلیاں راہیں جیہناں نوں نیوران کہیا جاندا ہے، پوریاں کردا ہے، اک گویڑ موجب انسانی دماغ وچ نیوران دی گڻتی اونی ہی ہے جنی ایس کائنات وچ موجود سیارے تے ستارے یعنی اک کھرب نالوں ودھ۔

ساڈا دماغ اک کمپیوٹر چپ وانگوں ہے جیہدے وچ کروڑاں سرکٹ نیں جیہڑے بجلی تے کم کردے نیں۔ دماغ اپڻی لوڑ دی بجلی آپوں پیدا کردا ہے۔ ساڈے دماغ وچ موجود برقی قوت دا گویڑ ایہدے توں لایا جاسکدا ہے جو ایہہ مقدار دس توں تئی واٹ دا بلب بالڻ لئی بڑی ہے۔

دماغ نوں اپڻے کماں نوں پورا کرڻ لئی گلوکوز تے آکسیجن دی لوڑ ہے، جیہڑی اوہنوں خون دیندا ہے۔ ساڈے خون دی ویہہ فیصد گردش دماغ ول ہوندی ہے۔ ساڈا جثہ خوراک توں جنی گلوکوز پیدا کردا ہے اوہدا پنجھی فیصد دماغ خرچ کر دیندا ہے تے ساڈے پھیپھڑے اپڻے اندر جنی آکسیجن جذب کردے نیں ایہدا وی ویہہ فیصد حصہ دماغ لئی ہی ورتوں وچ آؤندا ہے۔

سوال ایہہ ہے جو ساڈے دماغ نوں کوڻ کتر رہیا ہے ؟ سائنس داناں دا کہڻا ہے جو ساڈے دماغ دے خلیاں نوں کوئی ہور نہیں آپوں ساڈا اپڻا دماغ کھا رہیا ہے۔ ایہدا کارن ایہہ ہے پئی اوہ سارا کجھ جھل لیندا ہے، سوائے اپڻی بھکھ دے۔ جدوں اوہنوں کجھ چر خوراک نہیں ملدی تے اوہ چھیکڑلے چارے لئی اپڻے ہی دماغ دے خلیاں نوں کھاڻا شروع کردیندا ہے۔

سانوں بھکھ دا احساس معدہ کراؤندا ہے، پر سوادی گل ایہہ ہے جو بھکھ معدے نوں نہیں سگوں دماغ نوں لگدی ہے۔ جدوں گلوکوز دی پدھر گھٹڻ لگدی ہے تے دماغ معدے نوں سنیہا گھلدا ہے، تے معدیاں دیاں حرکتاں سانوں بھکھ دا احساس دواؤڻا شروع کردیندیاں نیں۔ ایس لئی کئی واری معدہ بھریا ہوڻ دے مگروں وی سانوں بھکھ لگ جاندی ہے تے کئی واری ڈھڈ ویہلا ہوڻ دے مگروں وی بھکھ دا احساس نہیں ہوندا۔

دماغ لئی گلوکوز دی اوہی حیثیت ہے جیہڑی گڈی لئی پٹرول دی ہے۔ ایس توں پہلوں پئی دماغ لئی ایندھن دی سوئی صفر تے اپڑے، اوہ اپڻے خلیاں نوں کھا کے اپڻی طاقت دی لوڑ پوری کرنا شروع کر دیندا ہے۔

فاکس نیوز دی ویب سائٹ تے چھپڻ والی اک رپورٹ موجب نیو یارک دے الرٹ آئن سٹائن کالج آف میڈیسن دے سائنسداناں نوں داائٹنگ تے کھوج وچ ایہہ پتہ لگیا پئی بہت بھکھ دی حالت وچ دماغ دا اک مخصوص حصہ اوہی کم کردا ہے جیہڑا ساڈا جثہ کردا ہے۔ ساڈا جثہ خوراک نہ ملڻ تے اپڻی توانائی دیاں لوڑاں چربی نوں ساڑ کے پا لیندا ہے۔ جیہدے نال وزن گھٹ تے انسان پتلا ہوجاندا ہے۔ خیال ایہہ سی پئی دماغ انج نہیں کردا، پر چوہیاں تے سلسلے وار تجربیاں نال ایہہ ظاہر ہویا ہے جو گلوکوز نہ ملڻ تے دماغ دا اک حصہ، جیہڑا نیندر، جسم دا درجہ حرارت، بھکھ تے پیاس ورگے کئی کم کردا ہے۔ اپڻے ہی خلیے کھاڻا شروع کردیندا ہے۔

کھوجی ٹیم دے پردھان ڈاکٹر رجت سنگھ دا کہڻا ہے جو بھکھ دے کارناں تے سائنسی کھوج دے سٹیاں نال صحت مند حیاتی لنگھاؤڻ تے اپڻے بھار تے قابو رکھڻ وچ مدد مل سکدی ہے۔ اوہناں دا کہڻا ہے پئی اپڻی خوراک وچ انج توازن قائم کرن نال، جیہدے نال دماغ دی طاقت دیاں لوڑاں پوریاں ہوندیاں رہیاں،جثے دی وادھو چربی نوں ساڑیا جاسکدا ہے۔

ایس لئی ڈائٹنگ کرن والے خبردار رہڻ پئی ڈائٹنگ بھاویں جثے دی وادھو چربی کھاوے یاں نہ کھاوے، پر اوہناں دے دماغ نوں کھا سکدی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels