Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> مصنوعی طریقے نال انسانی ددھ پیدا کرڻ دے جتن

مصنوعی طریقے نال انسانی ددھ پیدا کرڻ دے جتن

وچار ڈیسک
June 11th, 2011

چین وچ سائنسداناں نے گاں دے خلیے وچ انسانی خلیے دے دو انج دے جز رلا کے اوہدے ددھ وچ اوہ طاقت پیدا کرڻ دا کارنامہ کیتا جیہڑ ہڻ توں پہلوں صرف انسانی ددھ وچ پائی جاندی سی۔

بیجنگ وچ چائینز ایگریکلچرل یونیورسٹی دے ننگ لی موجب گاں دے خلیے وچ لائیسوزائم ناں دی پروٹین داخل کیتی گئی ہے۔ ایہہ پروٹین انسانی ددھ وچ وادھو مقدار وچ پایا جاندا ہے جیہدے وچ بھرویں غذائیت تے طاقت پائی جاندی ہے۔ ایس منصوبے تے کھوج کرڻ والے دستے دے پردھان ننگ لی موجب ایہہ ددھ ورتڻ نال بالاں وچ غذائیت دی کمی نوں سوکھیاں ہی پورا کیتا جاسکے گا۔

ننگ لی تے اوہناں دے سنگیاں دی کوشش ہے جو پرکھ پڑچول دے مگروں تن سال دے وچ وچ ایس ددھ نوں لوکاں لئی پیش کیتا جاسکے۔

انج امریکی ملک ارجنٹائن وچ وی سائنس دان ایسے کوشش وچ نیں جو کسے طرحاں گاں دے ددھ وچ انسانی ددھ ورگی طاقت پیدا کیتی جاسکے۔ بیونس آئرس وچ ایگروبزنس ٹیکنالوجی دے انسٹیٹیوٹ دے کھوجیاں نے اک کلون کیتے وچھے وچ دو انسانی خلیے متعارف کروائے جیہڑے دو انج دے پروٹین دی پیداوار دا کارڻ بنن گے جیہڑے انسانی ددھ وچ پائے جاندے نیں۔ ایہہ پروٹین لیکٹو فیرن تے لائسوزائم نیں۔ ایہہ دوہویں پروٹین نکے بالاں وچ بیکٹیریا تے وائرس دے خلاف بہت کم کردے نیں۔

روزیٹا ناں دی ایہہ وچھی چھ اپریل نوں پیدا ہوئی سی تے دو سال توں مگروں ددھ دیڻ جوگی ہووے گی۔ بھاویں ارجنٹائن وچ روزیٹا دے وڈے ہوڻ نوں اڈیکیا جارہیا ہے پر کیوں جو چینی سائنسدان ایہہ کم کرچکے نیں ایس لئی بحث دا دائرہ ایس ددھ دے محفوظ ہوڻ تیکر کھلر چکیا ہے۔ یونیورسٹی آف کیلی فورنیا دی ایلزبتھ میگا دا کہڻا ہے جو انسانی ددھ وچ گاں یاں بکری دے ددھ دے مقابلے وچ سولاں گڻا بہتا لائسوزائم ہوندے نیں۔ میگا دا کہڻا ہے جو کئی تجربیاں نال ایہہ وی ثابت ہو گیا ہے پئی انج دے بالاں دا مدافعتی نظام بہتا مضبوط ہوندا ہے جیہناں ماں دا ددھ پیتا ہووے۔

مصنوعی طریقے نال انسانی ددھ دی پیداوار بارے میگا نے دسیا پئی ہڻ تیکر ایس ددھ نوں انسانی ورتوں وچ لیا کے آزمایا نہیں گیا پر حالی ایہدے محفوظ ہوڻ بارے کجھ وی یقین نال نہیں کہیا جاسکدا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels