Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> چاء یاں امرت دھارا

چاء یاں امرت دھارا

وچار ڈیسک
April 9th, 2011

جے تہاڈا بھار ودھ رہیا ہے تے تہانوں کھاڻ پیڻ توں ہتھ کھچڻ، دوڑاں لاؤڻ، جم جاڻ یاں بھارگھٹاؤڻ والیاں دوائیاں کھاڻ دی لوڑ نہیں۔ ایہدا سوکھا حل ہے صرف چاء دے تن چار کپ روزانہ، پر چنگا ایہو ہے جو اوہدے وچ ددھ تے کھنڈ نہ پائی جاوے۔ کیوں جو ددھ چاء دے مفید اثراں نوں گھٹا دیندا ہے تے کھنڈ وزن ودھاؤن وچ اک وڈا کارن سمجھی جاندی ہے۔

اک نویں کھوج توں ظاہر ہویا ہے جو چاء وچ انج دے قدرتی مرکباں دی اک وڈی مقدار موجود ہے جیہڑی جسم وچ چربی پگھلاؤڻ تے خون وچ کولیسٹرول دی پدھر گھٹاؤڻ وچ مدد دیندے نیں۔ خون وچ کولیسٹرول دا وادھا دل دیاں بماریاں تے اسٹروک دا اک وڈا کارن ہے۔ تے ایہدا مطلب ہے چاء دی ہر پیالی ایس خطرے توں دور کھڑن وچ مدد دے سکدی ہے۔

چاء دے فائدیاں دا سلسلہ صرف ایتھوں تیکر نہیں سگوں طبی ماہراں دا کہڻا ہے پئی چاء خون دا دبا گھٹاؤڻ وچ وی فیدے مند ہے تے ایہدے وچ موجود antioxidants مدافعتی نظام نوں چنگا بڻا کے انفکشن توں بچاء وچ ساڈی مدد کردے نیں۔

چاء دنیا دا سب توں پراڻا مشروب ہے تے کوئی 5 ہزار ورھیاں توں ورتیا جا رہیا ہے۔ چاء سادے پاڻی توں مگروں سب توں بہتا پیتا جاڻ والا مشروب ہے۔ اک اجوکی سائنسی کھوج موجب Theaflavins تے Thearubigin دی ہوندا دا پتہ لگیا ہے۔ ایہہ دوویں مرکب بھار گھٹاؤن وچ مدد دیندے نیں۔ سائنسداناں نے ایہہ مرکب اوہناں چوہیاں نوں دتے جیہناں نوں پہلوں توں مرغن خوراک دتی جا رہی سی تے اوہناں دا ودھدا ہویا وزن رک ہی نہیں گیا سگوں ایہہ گھٹ وی گیا۔

تجربیاں وچ سائنسداناں نوں پتہ لگیا ہے پئی جدوں چوہیاں نوں گھٹ مقدار وچ چاء دے اجزاء والی خوراک دتی گئی تے اوہناں دے خون وچ کولیسٹرول دی پدھر گھٹاؤڻ دے نال نال چربیلے مرکب وی گھٹ گئے۔

ہندوستانی ریاست آسام وچ چاء دے اک کھوجی اڈے جورہات دے اک سائنسدان ڈاکٹر دیواجیت بورتھاکور دا کہڻا ہے پئی چاء دے فیدے اودوں تیکر برقرار رہندے نیں جدوں تیکر اوہدے وچ ددھ نہیں پایا جاندا۔ ددھ نال قہوے وچ موجود وزن تے کنٹرول کرن والے اجزا متاثر ہوندے نیں تے اسیں چاء دے فیدیاں توں وانجھے جانے آں۔

حالیں جریدے نیوٹریشن وچ چھپڻ والی اک رپورٹ وچ دسیا گیا ہے پئی جاپان دے اک کھوجی ادارے وچ کیتی جان والی پڻ چھاڻ توں ایہہ ظاہر ہوندا ہے جو چاء دی پتی وچ موجود اجزا خون وچ رل کے چربیلے مادیاں نوں آپڻے وچ سمو لیڻ دی خوبی رکھدے نیں۔

جاپانی سائنسدان ڈاکٹر ہیرواکی یابی ما دا کہڻا ہے پئی کالی چاء وچ انج دے اجزا ہوندے نیں جیہڑے خون وچ چربیلے مادیاں نوں آپڻے وچ جذب کر کے اوہناں نوں جسم چوں خارج کر دیندے نیں۔

ماہراں دا کہڻا ہے پئی جسم چوں چربی کڈھڻ تے آپڻے بھار نوں قابو وچ رکھڻ لئی کالی چاء، سبز چاء نالوں بہتی فیدے مند ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels