Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> بہتا پاڻی پیڻا وی صحت لئی چنگا نہیں

بہتا پاڻی پیڻا وی صحت لئی چنگا نہیں

وچار ڈیسک
March 16th, 2011

اک کھوج موجب بہتا پاڻی پیڻا صحت لئی اونا ہی خطرناک ہے جنا کہ لوڑ توں گھٹ پاڻی پیڻا۔ انج کیوں ہے پئی اسیں آپڻے دفتر دے سنگیاں نوں ہتھاں وچ دو لٹر پاڻی دی بوتل پھڑے لنچ ٹائم وچ جاگنگ کردے ویکھدے ہاں۔ دوجے پاسے لمی دوڑ وچ حصہ لیڻ والے کھڈاری 42.1 کلو میٹر دا پینڈا دوڑن وچ گھٹ گھٹ پاڻی ورتدے نیں؟

ایہہ سوال اک بجھارت ہی نہیں سگوں میلبورن یونیورسٹی دے کھوجی ایرک سیل موجب اک پریشانی والی گل ہے۔ آسٹریلیا دے میڈیکل جرنل وچ اجوکی چھپڻ والی اوہناں دی رپورٹ وچ خبردار کیتا گیا ہے جو بہتا پاڻی پیڻا صحت لئی اونا ہی بھیڑا ہو سکدا ہے جنا لوڑ نالوں گھٹ پاڻی پیڻا۔

کھوج موجب لوڑ نالوں بہتا پاڻی ورتڻ نال اک انج دی حالت پیدا ہوندی ہے جیہنوں طبی اصلاح وچ Exercise-associate hyponatraemia کہندے نیں۔ ایہہ اک انج دی حالت ہے، جیہدے وچ بہتا پاڻی پیڻ نال جسم وچ موجود سوڈیم دی لوڑیندی مقدار خطرناک حد تیکر پتلی ہو جاندی ہے جیہڑی الٹیاں، سرسام ایتھوں تیکر موت دا کارن وی بڻ سکدی ہے۔

آپڻی ایس کھوج لئی سیل تے اوہناں دے بیلیاں نے ایہناں آسٹریلوی وسنیکاں دے صحت بارے مسئلیاں نوں پرکھیا، جیہناں نے پاپوا نیو گینیا وچ Kokoda Trail دا 96 کلو میٹر پینڈا پیدل کیتا سی۔

اوہناں دی کھوج وچ 48 سالاں دی اک انج دی زنانی دا کیس کھول کے دسیا گیا ہے جیہناں نوں ایہہ پینڈا پیدل کرن دے دوجے دن سر وچ بہت پیڑ دی شکایت پیدا ہو گئی سی۔ ایس خطرے پاروں اوہنوں ڈی ہائڈریشن یاں جسم وچ پاڻی دی تھوڑ دا ساہمڻا سی۔ زنانی نے 7 لیٹر پاڻی کجھ گھنٹیاں وچ پی لیا۔ ایہدے مگروں الٹیاں تے سر چکراؤڻ دی شکایت دے مگروں اوہ کوما وچ چلی گئی۔ اوہناں دے نال موجود ڈاکٹراں نے اوہناں دی ایس حالت پاروں EAH تشخیص کیتی پر ویلے سر طبی امداد دیڻ دے مگروں ایس زنانی دی جان بچ گئی۔

آپڻی کھوجی رپورٹ وچ سیل دا کہنا ہے Kokoda Track تے 2009 وچ چار ہائکرز دیاں ہوڻ والیاں موتاں اُکا اُس حالت وچ ہویاں جیہڑی اُس زنانی سی سی۔ ایہو کارن ہے جو ہڻ ایس گل دی لوڑ ودھ گئی ہے پئی لوکاں وچ لوڑ توں بہتا پاڻی پیڻ تے EAH دے حوالے نال جاڻکاری پیدا کیتی جاوے۔

سیل موجب مرداں دے مقابلے وچ زنانیاں EAH توں متاثر ہوڻ والے خطرے دا بہتا ساہمڻا کردیاں نیں تے ایس صورتحال وچ انرجی ڈرنکس دا ورتڻا بہتا خطرناک رخ دے سکدا ہے۔

سیل تے اوہناں دے سنگیاں نے ایس صورتحال توں بچڻ لئی صلاح دتی ہے جو پاڻی، تریہہ دے حساب نال ہی پیڻا چاہیدا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels