Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> امریکہ دیاں ' سائبر فوج' بناؤڻ دیاں تیاریاں

امریکہ دیاں ' سائبر فوج' بناؤڻ دیاں تیاریاں

وچار ڈیسک
February 6th, 2011

امریکہ انٹرنیٹ راہیں کسے دھاڑے توں بچاء لئی اگلی پیڑھی دے کمپیوٹر ماہراں نوں لبھ رہیا ہے جیہناں نوں ' سائبر واریئر ' یاں سائبر جنگ باز آکھیا جا سکدا ہے۔

انٹرنیٹ راہیں جرم تے دھاڑیاں دی روک لئی بڻے امریکی سنٹر فار انٹرنیٹ سیکورٹی ولوں اک مقابلہ رکھیا گیا ہے۔ ایس سائبر چیلنج نوں 'سائبر فاؤنڈیشن' مقابلے دا ناں دتا گیا ہے۔ ایس مقابلے دا مقصد انج دے ہزار پڑھیاراں نوں لبھڻا ہے، جیہڑے سائبر سیکورٹی وچ وڈے کارنامے انجام دیڻ دی جوگتا رکھدے ہوڻ۔

سنٹر فار انٹرنیٹ سکیورٹی دے چیف ایگزیکٹو آفیسر ولیم پبلگرن موجب ''ساڈے انفارمیشن دے نظام تے ڈیجیٹل انفراسٹرکچر دے بچا لئی تخلیقی طریقے لبھڻ دی جنی لوڑ اج ہے ، پہلوں کدی نہیں سی۔ '' پیلگرن نے ایس مقابلے دے مقصد بیان کردیاں ہوئیاں کہیا ' سائبر فاؤنڈیشن'مقابلے راہیں اصل وچ سانوں سارے امریکہ دے اسکولاں وچ موجود انج دے ٹیلنٹ نوں لبھڻ دا موقع ملے گا، جیہڑا انٹرنیٹ سیکورٹی ول رجھان رکھدا ہے تے آپڻیاں خوبیاں نوں چنگے طریقے نال کم وچ لیاؤڻ دی سدھر رکھدا ہے۔''

ایس مقابلے وچ انج دے سوال پچھے جاڻ گے، جیہناں دا اک متھے ویلے دے وچ وچ جواب دیڻا ہووے گا۔ ایہہ سوال کمپیوٹر سائنس دے انج دے شعبیاں تے کیٹیگریز بارے ہوڻ گے، جیہڑے نیٹ ورک تے سسٹم دی سیکورٹی دے حوالے نال مڈھلی اُچیچتا رکھدے نیں۔ ایس مقابلے وچ سب توں بہتے نمبر لیڻ والے پڑھیاراں نوں انعام دتے جاڻ گے۔ ایہدے توں اڈ انج دے پڑھیاراں نوں حکومت تے کمپیوٹر انڈسٹری دی وڈی ہستی نال وی ملوایا جاوے گا۔

سائبر چیلنج پروگرام اصل وچ کمپیوٹر دی نویں تعلیم راہیں پڑھیاراں دیاں خوبیاں نوں اُگیڑن توں اڈ ایس صنعت وچ نوکریاں دیڻ والیاں تے کالجاں وچکار چنگا رابطہ پیدا کرن وچ وی مدد گار ہووے گا۔

ایس مقابلے وچ رلت لئی پڑھیار اٹھاراں فروری تیکر آپڻے آپ نوں رجسٹر کروا سکدے نیں۔ ایس سلسلے وچ آن لائن جانکاری uscybersecuritychallenge.org تے ملدی ہے۔

امریکی سینیٹر تے سینٹ وچ ہوم لینڈ سیکورٹی دی سب کمیٹی دے چیئرمین تھومس کارپر موجب ''ساڈے وسیب وچ سائبر سیکورٹی بارے ودھدے ہوئے چیلنجاں نال نبڑن لئی ایہہ بہت ہی ضروری ہے پئی آؤڻ والی نسل وچ انج دیاں مہارتاں نوں یقینی بڻایا جاوے پئی اوہ ساڈے ملک دا چنگا دفاع کر سکڻ۔''


ایس مقابلے دی وکالت کردیاں ہوئیاں امریکی کانگریس دے رکن جم لینگون دا کہڻا ہے جو سانوں ہڻ ایس گل تے پورا گوہ کرنا چاہیدا ہے پئی اسیں انج دے ماہر تیار کرسکیئے جیہڑے کہ کالھی نال قومی ترجیح بڻ دے جا رہے سائبر نیٹ ورکس دی سلامتی دیاں لوڑاں پوریاں کر سکڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels