Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> لمی عمر دا راز ۔۔۔ ویاہ

لمی عمر دا راز ۔۔۔ ویاہ

February 2nd, 2011

سارے جگ وچ انج دے جڻے گھٹ ہی ہوڻ گے جیہناں نوں آپڻی تیویں نال کوئی شکایت نہ ہووے۔ اوہناں نوں جتھے کِتے موقع ملدا ہے بھاویں لطیفیاں تے مخول وچ ہی سہی، شکایتاں منہ تے لے آؤندے نیں۔ تے ایسے طرحاں انج دیاں تیویں وی گھٹ ہی نیں جیہناں نوں آپڻے کھسم نال کوئی گلہ نہ ہووے ۔

پر ایس حقیقت دا دوجا پاسا ایہہ ہے جو ویاہ اوہناں دی عمر ودھا دیندا ہے تے ویاہے بندے عام طور تے بہتی عمر ہنڈاؤندے نیں۔ اک نویں سائنسی کھوج وچ دسیا گیا ہے جو ویاہے بندے، اکلیاں حیاتی لنگھاؤڻ والیاں نالوں لمی عمر ہی نہیں پاؤندے سگوں اوہ صحت مند حیاتی دے فیدے وی پاؤندے نیں۔

ماہراں دا کہڻا ہے جو ویاہ بندے لئی کئی فیدے لیاؤندا ہے۔ مثال دے طور تے بہتیاں تیویاں آپڻے کھسم دی صحت دا بہتا خیال رکھدیاں نیں جدوں کہ مرداں دی وڈی گڻتی آپڻی صحت بارے لاپرواہ ہوندی ہے۔

ماہراں دا کہڻا ہے جو ویاہ زنانیاں دیاں نفسیاتی حالتاں نوں ٹھیک رکھڻ وچ اہم کردار ادا کردا ہے تے اوہناں نوں کئی نفسیاتی گنجھلاں توں بچائی رکھدا ہے۔ کیوں جو زنانیاں بہتیاں سوہل ہوندیاں نیں تے اکلاپا اوہناں دے نفسیاتی مسئلیاں وچ پیڻ دے ڈر نوں ودھا دیندا ہے۔

برطانیہ دی ویلز کاؤنٹی دے یونیورسٹی ہاسپٹل دے سکول آف میڈیسن وچ انسانی حیاتی تے ویاہ دے اثراں تے کئی سالاں توں جاری کھوج دے سٹے حالیں جاری کیتے گئے نیں۔ ایس جائزے وچ یورپی یونین دے ست ملکاں دے ہزاراں بندیاں دی طبی حالت دا مطالعہ کیتا گیا۔جیہدے نال ایہہ ظاہر ہویا پئی ویاہے بندے اکلیاں حیاتی لنگھاؤڻ والیاں دے مقابلے وچ دس توں پندراں سال بہتا جیوندے نیں۔

ویاہے ورے بندیاں نوں وسیب وچ بہتا بھروسے جوگ سمجھیا جاندا ہے جیہدے نال اوہناں نوں ہور وسیبی فیدے ملدے نیں۔ ویاہے ورے جوڑے کیوں جو اک دوجے دے ساری عمر دے ساتھی ہوندے نیں ایس لئی اک دوجے دے بارے اوہناں دے وچار بڑے خلوص والے ہوندے نیں۔ جدوں کہ ویاہ دے بنا اکٹھے رہڻ والے جوڑیاں وچکار آپوں وچ دا وساہ گھٹ ہوندا ہے تے اوہ ہمیش آپڻے فیدیاں نوں پہل دیندے نیں۔ کیوں جو اوہناں دے لاشعور وچ ایہہ ڈر موجود ہوندا ہے اوہناں دا سنگی اوہناں نوں چھڈ کے جا سکدا ہے۔

ماہراں دا کہڻا ہے ویاہ چھڑا دو جیاں وچ اک سمجھوتا نہیں ہے سگوں قانون تے وسیب ایہدے لئی موجود رہندے نیں جیہڑے ایس سانگے نوں سوکھیاں ٹٹڻ نہیں دیندے۔ ایہہ اوہ کارن نیں جیہڑے ویاہے بندیاں دی حیاتی وچ سکون ، خوشی تے توازن لیاؤندے نیں تے عمر ودھاؤندے نیں۔

پر ڈیوڈ گیلشر دا کہنا ہے جو ضروری نہیں ہے پئی سارے ویاہے ورے جوڑے خوشی نال زندگی دا چس ماڻ رہے نیں۔ ذہنی پاڑ تے کئی دوجے کارن ویاہی حیاتی نوں عذاب بڻا سکدے نیں تے ایہدے نال جنم لیڻ والے گنجھل تے دباء بندیاں نوں کئی بماریاں ول ودھک سکدے نیں۔ کیوں جو کجھ ماہر کہندے نیں پئی جھیڑے والی حیاتی نالوں اکلیاں حیاتی لنگھاؤڻا کوئی بھیڑا سودا نہیں ہے۔

پر ڈیوڈ گیلشر ایس رائے نوں نہیں من دے۔ اوہ کہندے نیں جو سانگے چاہے کنے ہی بھیڑے کیوں نہ ہوڻ، ویاہی حیاتی بہرحال اکلاپے توں چنگی ہے تے مندے سانگیاں دے نقصاناں دے مقابلے وچ ویاہی حیاتی دے فیدے بہرحال بہتے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels