Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> بھلک نوں گوشت دی تھاں کیڑے مکوڑے

بھلک نوں گوشت دی تھاں کیڑے مکوڑے

وچار ڈیسک
January 25th, 2011

ہالینڈ دے سائنسدان کیڑے مکوڑیاں نوں جانوراں دے گوشت دی تھاں ورتن لئی اک کھوج وچ رُجھے نیں۔ ایہناں سائنسداناں موجب کیڑے مکوڑے کھانا صحت لئی چنگے تے پروٹین دا بہتا ماحول دوست وسیلہ نیں۔

ایس کھوجی منصوبے دے پردھان آرنلڈفان ہوئس موجب ' اک دن آوے گا جدوں بگ میک اک سو ویہہ یورو وچ ملے گا جدوں کہ کیڑیاں مکوڑیاں نال بنیا برگر یاں بگ میک صرف باراں یورو وچ'۔

ہوئس موجب کیڑے مکوڑے کھان دے حوالے نال سب توں چنگا کم ایہہ ہے جو تسیں ایہناں نوں اک واری کھا کے ویکھو۔ ایس مقصد لئی وسطی ہالینڈ دی واگننگن یونیورسٹی وچ کئی حشرات نال بنائیاں گئیاں ڈشاں نال لوکاں دی سیوا وی کیتی گئی۔ اوہناں وچ تھائی مصالحیاں وچ بنے ہرے مکوڑے تے بھنوریاں نال بنی سویٹ ڈش وی رلتی سی۔ ایہہ ڈشاں لوکاں نوں اینیاں پسند آئیاں پئی ویکھدیاں ہی مک گئیاں۔

یونیورسٹی دے حشرات الارض دے شعبے دے پردھان مارسل ڈکی موجب کیڑے مکوڑے نہ کھان دی وجہ صرف ذہنی ہے کیوں جو لوک سمجھدے نیں پئی ایہہ گندے نیں۔ ڈکی موجب دوجا وڈا مسئلہ ایہناں نال جڑیا ڈر وی ہے۔

ہالینڈ وچ ایس ویلے تناں فارماں وچ کیڑے مکوڑے کھان دے شوقین بندیاں لئی کئی حشرات پیدا کر رہے نیں۔ انج دے شوقین بندیاں دی گنتی حالی بھاویں گھٹ ہے پر ایہدے وچ وادھا ہورہیا ہے۔

مارسل ڈکی موجب لہندے دے لوکاں کول ہن ایہدے توں اڈ کوئی چارہ نہیں جو اوہ کیڑے مکوڑے کھان دے حوالے نال اپنی وچار بدلن۔ کیوں جو اقوام متحدہ دے خوراک تے زراعت دے ادارے دی پیش گوئی موجب زمین تے سال دو ہزار پنجاہ تیکر انسانی آبادی نو ارب تیکر اپڑ جاوے گی جدوں کہ زرعی زمین پہلوں ہی گھٹ پیندی جارہی ہے۔

ڈکی موجب یاں تے سانوں گوشت گھٹ کھان دی عادت پاؤنی ہووے گی یاں فیر ایہدے متبادل لبھنے پین گے۔

واگننگن یونیورسٹی دی کھوج موجب حشرات وچ عام گوشت نالوں ودھ پروٹین جدوں کہ چکنائی گھٹ ہوندی ہے۔ ایس کھوج موجب دس کلو خوراک ورتن نال حشرات دا چھ توں اٹھ کلو گرام گوشت لیا جاسکدا ہے جدوں کہ خوراک دی اینی مقدار نال جانوراں دا اک کلو گرام گوشت ہی حاصل ہوندا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels