Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> زنانیاں دے ہنجواں وچ 'اج نہیں' دا سنیہا: نویں کھوج

زنانیاں دے ہنجواں وچ 'اج نہیں' دا سنیہا: نویں کھوج

وچار ڈیسک
January 11th, 2011

اسرائیلی کاہڈواں موجب جدوں اک زنانی روندی ہے تے اوہدے ہنجو اصل وچ اک انج دا کیمیائی سنیہا گھلدے نیں جیہڑے مرد دی جنسی سدھر تے پاڻی پھیر دیندا ہے۔

ایہہ کھوج اسرائیلی شہر ریہووٹ وچ بڻے وائزمین انسٹیٹوٹ آف سائنس وچ کیتی گئی۔ کھوجیاں نے ایس مقصد لئی سب توں پہلوں کھوج وچ رلتی زنانیاں نوں 1979 وچ ریلیز ہوڻ والی اک بہت غمگین تے دل دکھاؤڻ والی انگریزی فلم ' دی چیمپ ' دے سین وکھائے جیہدے وچ اک جوان منڈا اپنے باکسر پیو دے چلاڻا کرجاڻ تے ہنجو وہاؤندا ہے۔

آس دے عین موجب فلم ویکھڻ والیاں زنانیاں دیاں اکھاں وچوں وی دکھ دے مارے ہنجو وگڻ لگے، جیہناں نوں کھوجیاں نے اُچیچیاں بوتلاں وچ اکٹھا کر لیا۔ ایہہ ہنجو تئی توں بتی سال دی عمر دے چویہہ مرداں دے ساہمڻے لیاندے گئے جیہناں نوں ایس گل دا کوئی پتہ نہیں سی پئی ایہناں بوتلاں وچ کیہ ہے۔

اوہناں وچوں کجھ مرداں نوں انج دیاں بوتلاں سنگھڻ لئی کہیا گیا جیہناں وچ اک لونا محلول سی تے جیہدی کوئی خشبو نہیں سی، جدوں کہ رہندیاں نوں زنانیاں دے ہنجواں نال بھریاں بوتلاں سنگھڻ لئی دتیاں گئیاں جیہڑیاں ظاہر وچ کسے قسم دی خشبو توں پاک ہی سڻ۔

ایہدے مگروں تجربے وچ رلتی مرداں نوں زنانیاں دے چہریاں دیاں تصویراں وکھائیاں گئیاں۔ انج دے مرداں نوں جیہناں نے زنانیاں دے ہنجواں نوں سنگھیا ایہہ تصویراں بہت گھٹ من کھچویاں محسوس ہوئیاں اوہناں مرداں دی نسبت جیہناں نے لُوڻا محلول سُنگھیا سی۔

کھوجیاں نے تجربے وچ رلتی مرداں دے جذباتی ردعمل نوں وی پرکھ لیا۔ ایہدے لئی اوہناں توں سوال کیتا گیا پئی اوہ زنانیاں دے چہریاں دیاں جیہڑیاں تصویراں ویکھ رہے نیں اوہناں تے موجود دکھ تے ہرکھ دا گویڑ لاؤڻ۔ سائنسداناں نوں پتہ لگیا جو ہنجو سنگھڻ نال مرداں دے جذباتی ردعمل تے کوئی فرق نہیں پیا تے ایہہ اُکا انج ہی سی جیویں ہور بندیاں دا۔

ایہدے توں اڈ تجربے وچ رلتی سارے مرداں نوں اک غمگین فلم وکھا کے وی جذباتی ردعمل نوں پرکھیا جیہدے نال فیر ثابت ہویا پئی ہنجو سنگھڻ والے مرداں دے جذباتی ردعمل وچ کوئی بدلی پیدا نہیں ہوئی۔

پر دوجے پاسے زنانیاں دے چہرے ویکھ کے ایہناں مرداں وچ بہت گھٹ جنسی تحریک یاں بیداری پیدا ہوئی زنانیاں دے ہنجو سنگھ چکے سڻ۔امریکی جرنل سائنس وچ چھپن والی ایس کھوجی رپورٹ موجب تجربے وچ رلتی مرداں دے طبی ٹیسٹ نال ایہہ وی ثابت ہویا جو ہنجو سُنگھڻ والے مرداں دے ٹیسٹورون ناں دے ہارمون وچ وی کمی ہوئی۔ ایہہ ہارمون جنسی تحریک بارے ہے۔

ایہناں نتیجیاں اتے ذہن دے اسکین نال پتہ لگیا جو ہنجو سنگھڻ دے مگروں ایہناں مرداں دے ذہن دے ایہناں حصیاں وچ سرگرمی بہت گھٹ ہو گئی، جیہناں دا سانگا جنسی بیداری تے تحریک نال ہوندا ہے۔

کھوجیاں موجب، حالی ایس پاسے وچ ہور کاہڈ دی لوڑ ہے پئی ہنجواں وچ اوہ کیہڑا کیمیائی جز موجود ہوندا ہے جیہڑا ایس ردعمل دا کارن بڻیا۔ ایہدے توں اڈ بالاں دے ہنجواں دے وڈیاں تے پیڻ والے اثراں دا وی جائزہ لیا جا سکدا ہے۔'

وائزمین انسٹیٹوٹ دے شعبے نیورولوجی دے پروفیسر نوم سوبل موجب 'ایہہ کھوج ایس خیال دی تصدیق کردی ہے پئی انسان دے کیمیائی سگنل کسے دوجے جی دے ورتارے تے اثر انداز ہوندے نیں، بھاویں اسیں اوہناں توں خبردار ہوئیے یاں نہ'۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels