Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> سیب تے انار دی ہار

سیب تے انار دی ہار

December 7th, 2010

تسیں انگریزی اکھان سنیا ہونا اے اک سیب روزانہ تہانوں ڈاکٹر کولوں بچاؤندا ہے۔ انج ہی ایہہ وی پڑھیا ہونا اک انار سو بمار۔

پر ہن ڈاکٹر کولوں نہ تے تہانوں سیب بچا سکدا ہے تے نہ ہی انار سگوں صحت مند حیاتی لنگھاؤن دا اوہ اصول وی بے اثر ہو گیا جیہدے وچ آکھیا گیا سی روز پنج پھل تے سبزیاں ورت کے تسیں بماریاں توں بچ سکدے او۔

اک نویں کھوج توں پتہ لگا ہے پئی پھلاں تے سبزیاں دے روز ورتن نال وی تہانوں کینسر ورگی بھیڑی بماری توں بچن لئی کوئی بہتی مدد نہیں ملدی۔ برطانیہ دی آکسفورڈ یونیورسٹی وچ ہون والی اک نویں کھوج وچ کہیا گیا ہے پئی پھل تے سبزیاں دے روز ورتن نال کینسر دے خطرے وچ دس فیصد توں بہتی گھاٹ نہیں آؤندی۔

رپورٹ وچ ایہہ وی دسیا گیا پئی جے تسیں آپنے آپ نوں کینسر دے خطرے توں بچاؤنا چاہندے او تے اپنے وزن تے کنٹرول کرو تے شراب نہ پیو۔ نویں دہاکے وچ، جدوں کہ انسان بہتیاں بماریاں تے قابو پا چکیا ہے کینسر اک وڈے خطرے دی شکل وچ ساہمنے آگئی ہے تے ایس بھیڑی مرض دیاں نت نویاں قسماں ساہمنے آ رہیاں نیں۔

نویں کھوج وچ کہیا گیا ہے جو طبی ماہراں نوں چاہیدا جو اوہ لوکاں نوں ایہہ دسن پئی کینسر دا سانگا ایہدے نال نہیں جو تسیں کیہ کھا رہے او سگوں ایہدے نال ہے جو کنا کھا رہے ہو۔ دس سال تیکر جاری رہن والی ایس کھوج وچ ماہراں نے سجرے پھل تے سبزیاں کھان تے کینسر دا روگ لگن وچ سانگے نوں پرکھیا۔ کھوجی ٹیم دا کہنا ہے پئی دوہاں وچکار کوئی وڈا سانگا ظاہر نہیں ہویا۔

پر کھوج وچ رلتی سائنسدان ایہدے تے اک نیں جو تماکو ہن وی کینسر دا سب توں وڈا کارن ہے۔ اوہناں دا کہنا ہے جو تماکو پین وچ وادھے نال کینسر ہون دا خطرہ پنجاہ فیصد تیکر ودھ جاندا ہے۔ جدوں کہ پھل تے سبزیاں دا ورتنا ایس خطرے نوں اُکا دس فیصد تیکر گھٹا سکدا ہے۔

ریسرچ وچ دسیا گیا ہے پئی حدوں بہتا وزن رکھن والے لوکاں دا جسم اُچیچے ہارمون پیدا کردا ہے جیہڑے کینسر دے خطرے ودھا دیندے نیں اُچیچا چھاتی دے کینسر دا۔ رپورٹ موجب سروے وچ رلتی حساب کتاب نال برطانیہ وچ کینسر دے پندراں ہزار توں بہتے مریضاں دا پتہ لگیا جیہڑے بہتی شراب نال ایس مرض دا نشانہ بنے سن جدوں کہ موٹاپے تے وزن دے بہتا ہون پاروں کینسر دے روگیاں دی گنتی اُنی ہزار توں بہتی سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels