Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> انھیاں لئی اکھاں

انھیاں لئی اکھاں

وچار ڈیسک
November 22nd, 2010

اک امریکی بایو ٹیکنالوجی کمپنی باراں انھیاں بندیاں دی بینائی موڑن لئی اوہناں دی اکھاں وچ انسانی سٹیم سیل مطلب مڈھلے خلیے واڑھن دا تجربہ شروع کرن والی ہے۔ چوہیاں تے کامیاب آزمائش دے مگروں بندیاں تے ایس تجربے دی منظوری امریکہ دے خوراک تے دوائیاں دے ادارے نے دتی ہے۔

تجربہ کرن والی کمپنی ایڈوانس سیل ٹیکنالوجی دے وڈے ایگزیکٹو نے دسیا پئی چوہیاں تے کیتی گئی آزمائش وچ اوہناں دی نظر سو فیصد ودھی ہے۔ اوہناں دا کہنا سی جو ایہہ تجربہ سٹیم سیل کاہڈ وچ اک نویں دور دا مڈھ ہے۔

پہلوں جیہڑے باراں مریضاں تے تجزبہ کیتا جاوے گا اوہناں دی نظر بحال ہون دا امکان نہیں ہے سگوں ایس تجربے دا مقصد ایہہ ویکھنا ہے پئی ایہہ علاج کنا محفوظ ہے۔ تجربہ جے کامیاب ہوندا ہے تے سٹیم سیل دا ایہہ علاج جوان مریضاں تے آزمایا جاوے گا تاں جو اوہناں دی نظر پوری طرحاں مکن توں بچائی جا سکے۔

سٹیم سیل وچ ایہہ خوبی ہوندی ہے جو اوہ کسے دوجی قسم دے خلیاں وچ ڈھل سکدے نیں تے کئی سائنسداناں دا خیال ہے جو سٹیم سیلز دی ایس خوبی دے مڈھ تے ایہہ ہوسکدا ہے جو اوہناں نوں کئی ٹشوز وچ ڈھال کے جثے دے وچ متاثرہ اننگاں دی مرمت تے بماری دا علاج کیتا جاسکے۔

سٹیم سیل ٹرانسپلانٹ دے مگروں جثے وچ کسے وی طرحاں دے خلیے وچ بدلے جاسکدے نیں تے حالیں اک ہور امریکی کمپنی نے ریڑھ دی ہڈی وچ سٹ دا شکار لوکاں دے علاج لئی انسانی مڈھلے خلیاں دے ورتون دے تجربے وی شروع کیتے ہین۔

سائنسداناں دا پینترا ہے جو سٹیم سیل تے ہور کاہڈ نال انسانی جثے لئی ' سپیر پارٹس ' لئے جاسکن گے۔ سائنسدان کہندے نیں جو سٹیم سیل تے ہور کاہڈ نال کئی ناقابل علاج بماریاں جیویں شوگر، رعشہ، تے الزئمر دے علاج وچ وی مدد مل سکدی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels