Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> اکلاپا۔۔۔۔ چپیتا قاتل

اکلاپا۔۔۔۔ چپیتا قاتل

وچار ڈیسک
October 12th, 2010

تسیں اپنا ویلا کیویں لنگھاؤندے او ؟ ٹبر نال یاراں بیلیاں نال یاں تہانوں اکلیاں رہنا چنگا لگدا ہے۔ جے تہانوں اکلاپا پسند ہے تے اپنی ایہہ عادت جھبدے چھڈن بارے وچارو کیوں جو اک نویں کھوج نال پتہ لگیا ہے پئی اکلاپا تہاڈی حیاتی گھٹاؤندا ہے تے اکلیاں رہن والیاں دی عمر اوہناں لوکاں نالوں گھٹ ہوندی ہے جیہڑے یاراں بیلیاں نال رل کے ویلا ٹپاؤندے نیں۔

رپورٹ موجب اکلے حیاتی لنگھاؤن والیاں دے مرن دا امکان ویلے توں پہلوں پنجاہ فیصد بہتا ہوندا ہے۔

امریکی یونیورسٹیاں یوٹاہ تے نارتھ کیرولائنا وچ کیتی جان والی ایس کھوج وچ تن لکھ جیاں دے حیاتی دے حالات تے عادتاں نوں پرکھیا گیا۔ اوہناں بارے جانکاری ایس حوالے نال پچھلے تریہہ سال وچ کیتے جان والے 148 جائزیاں توں لئی گئی۔

ایس کھوج نال ظاہر ہویا پئی جیہڑے لوک نویں یار بیلی بناؤنا تے دوجیاں نال رلنا ملنا پسند کردے نیں ، اوہناں دی عمر اکلیاں رہن والیاں نالوں پونے چار سال بہتی ہوندی ہے۔

رپورٹ وچ کہیا گیا ہے پئی یار بیلی بناؤنا تے لوکاں دے نال ویلا لنگھاؤنا صحت لئی اینا ہی فیدے مند ہے جنا تماکو پین دی عادت چھڈنا۔ کاہڈو ٹیم دے پردھان پروفیسر برٹ یوچینو دا کہنا ہے پئی یار بناؤن تے لوکاں دے نال رل مل کے حیاتی لنگھاؤن نال سوکھتاں پیدا ہوندیاں نیں تے اوکڑاں مکاؤن وچ مدد ملدی ہے جیہدے نال ایس ذہنی دبا تے اعصاب تے پین والے پریشر وچ کمی آؤندی ہے جیہڑے صحت نوں نقصان دیندے نیں۔

پروفیسر یوچینو کہندے نیں پئی بندہ عام سنگیاں دیاں گلاں تے کجھ نہ کجھ دھیان ضرور دیندا ہے۔ مثال دے طور تے اکلا بندہ بمار ہو جاوے تے اوہ ڈاکٹر دے کول جان تے دوائی لین توں آلکس کر لیندا ہے پر جے تسیں یاراں بیلیاں تے ساکاں وچ ہوو تے اوہ تہانوں وار وار صحت دا خیال رکھن دا کہندے رہندے نیں۔

اوہ کہندے نیں یار بیلی رکھن والا بندہ نفسیاتی طور تے آپنے آپ نوں بہتا محفوظ سمجھدا ہے۔ اوہنوں ہسن کھیڈن دے موقعے ملدے نیں۔ اوہ یاراں نال اپنیاں پریشانیاں ونڈھ سکدا ہے ۔ اپنے دل دا بھار ہولا کر سکدا ہے۔ تے ایہہ کارن انج پرسکون بناؤن وچ مدد کردے نیں۔

کاہڈو ٹیم دے ماہراں دا کہنا ہے پئی ایس کاہڈ نال ایہہ وی ظاہر ہویا ہے اکلاپے تے موت وچکار سانگا ہر عمر دی عورت تے مرد لئی اکو جیا سی بھاویں اوہناں دی صحت کیویں دی ہی کیوں نہ ہووے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels