Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> ہوا نال بجلی پیدا کرن دا سب توں وڈا پلانٹ

ہوا نال بجلی پیدا کرن دا سب توں وڈا پلانٹ

وچار ڈیسک
September 28th, 2010

پاکستان بجلی دے پھردول نوں وس وچ کرن لئی بہتے تھرمل بجلی گھراں دے منصوبیاں دے سر تے چل رہیا ہے جیہدے نال پیدا ہون والی بجلی بہت مہنگی ہوندی ہے تے ایہدے نالوں وڈے پیمانے تے گرین ہاؤس گیساں وی نکلدیاں نیں جیہڑیاں ہوا نوں گندیاں کرن تے گلوبل وارمنگ دا اک وڈا کارن سمجھیا جاندا ہے۔ جدوں کہ دوجے پاسے تقری وچ پچھونہے ملک توانائی دے انج دے منصوبے اگے ودھا رہے نیں جیہناں نال بہت گھٹ لاگت تے ماحول دوست بجلی بنائی جاسکدی ہے۔

ماہر ہوا نال بجلی لین نوں اک گھٹ خرچے والا تے محفوظ وسیلا سمجھدے نیں تے دنیا دے کئی ملکاں وچ ہوا نال چلن والے ٹربائن لائے جارہے نیں۔

ٹیلی گراف دی اک رپورٹ موجب ہوا نال چلن والیاں ٹربائناں دا دنیا دا سب توں وڈا پراجیکٹ حالیں برطانیہ وچ پورا ہویا ہے۔ رودبار انگلستان دے ساحلی علاقے کینٹ وچ بنائے جان والے تھانٹ ونڈ فارم وچ سو بہت ہی طاقت ور ٹربائن لائے گئے نیں۔ ماہراں دا کہنا ہے جو ایتھوں ملن والی بجلی دو لکھ توں بہتے گھراں دی توانائی دی لوڑ پوری کرن لئی بہت ہووے گی۔

کئی ساحلی علاقیاں وچ بہتیاں تیز ہواواں چلدیاں نیں جیہناں دی مدد نال بجلی پیدا کرن والے ٹربائن سوکھیاں چلائے جاسکدے نیں پاکستان دی ساحلی پٹی وچ انج دے منصوبیاں لئی بڑی گنجائش ہے۔

ماہراں دا کہنا ہے جو ایس ویلے سارے جگ وچ ہوائی چکیاں راہیں جنی بجلی پیدا کیتی جارہی ہے تھانٹ ونڈ فارم ایہدے اک تہائی دے برابر بجلی پیدا کرن دی خوبی رکھدا ہے۔

برطانیہ دے توانائی دے وزیر کرس ہیون دا کہنا ہے جو ایس نویں ٹیکنالوجی دی مدد نال صرف ماحول نوں نقصان اپڑاؤن والیاں کاربن گیساں دا نکلنا گھٹے گا سگوں ایہدے نال ماحول دوست روزگار دے کئی نویں موقعے وی پیدا ہون گے۔

ایس نویں بجلی دے پلانٹ نوں بناؤن دے مگروں برطانیہ دے ساحلی علاقیاں وچ وڈے سائز دیاں بجلی دیاں ٹریناں دی گنتی ودھ کے 436 ہو گئی ہے، جدوں کہ ڈھائی ہزار توں بہتے نکے ٹربائن دوجے کئی علاقیاں وچ پہلوں توں ہین۔

ہوا دی طاقت نال بجلی پیدا کرن وچ برطانیہ دے سواد دا گویڑ ایہدے توں لایا جاسکدا ہے پئی ساحلی علاقیاں وچ ہور اک ہزار ٹربائناں لائیاں جارہیاں نیں تے 2300 دی منصوبہ بندی کیتی جارہی ہے۔ برطانوی حکومت اگلے کجھ سالاں وچ اپنے ساحلاں تے چھ ہزار جدوں کہ سمندر دے وچ چار ہزار ٹربائن لاؤن دا ارادہ رکھدی ہے۔

توانائی دے ادارے دی پردھان ماریہ مک کیفری دا کہنا ہے جو اگلے دھاکے تیکر برطانیہ وچ بجلی دی کل پیداوار وچ ہوا نال پائی جان والی بجلی دا حصہ ودھا کے کوئی تریہہ فیصد ہو جاوے گا تے اسیں ایہنوں برآمد کر سکاں گے۔ جدوں کہ ایس ویلے ایہہ دُر چار فیصد ہے تے ایہناں توں کوئی پنج ہزار میگا واٹ بجلی پیدا کیتی جارہی ہے۔

ماہراں دا کہنا ہے جو تھانٹ ونڈ فارم دے پورے ہون نال ایہہ دُر پنج فیصد ہو جاوے گی تے جیہڑی نیڑے نیڑے تن لکھ گھراں نوں روشن کرن لئی بہت ہے۔ پاکستان وچ جتھے اک پاسے بجلی دی بہت تھوڑ ہے اوتھے عالمی بینک دی اک رپورٹ موجب حالی تیکر 47000 پنڈ بجلی توں وانجھے نیں تے پاکستان وچ توانائی دیاں لوڑاں پوریاں کرن لئی اگلے پنجاں سالاں وچ کوئی ڈیڈھ ارب ڈالر دی سرمایا کاری دی لوڑ ہے۔

پاکستان توانائی دے پھردول تے قابو پاؤن لئی بجلی دے ایس وٹاندرے دے وسیلے توں فیدا چک سکدا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels