Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> ہڑھ والے علاقیاں وچ پین دا پانی صاف کرن لئی مقامی دوائی بنا لئی گئی

ہڑھ والے علاقیاں وچ پین دا پانی صاف کرن لئی مقامی دوائی بنا لئی گئی

وچار ڈیسک
August 25th, 2010

وفاقی وزارت سائنس تے ٹیکنالوجی دا کہنا ہے جو اوہنے مقامی طور تے اک انج دا پاؤڈر بنایا ہے جیہڑا ہڑھ والے علاقیاں وچ گندے توں گندے پانی نوں صاف کر کے پین لئی محفوظ بنا سکدا ہے تے انج گندا پانی پین نال ہون والیاں موتاں دے خطرے نوں بہت حد تیکر گھٹایا جاسکدا ہے۔

پانی صاف کر کے پاؤڈر دے نال نال وزارت نے بالاں دیاں غذائی لوڑاں نوں پورا کرن لئی اک '' انسٹنٹ بے بی پاؤڈر ' وی بنایا ہے جیہدے وچ سارے ضروری جز رلتی نیں تے ایہناں دوہواں دے نمونے وفاقی وزیر خان سواتی نے اسلام آباد وچ اک نیوز کانفرنس وچ ساہمنے لیاندے۔

اوہناں نے ملکی تے غیر ملکی امدادی اداریاں تے سردے پچدے لوکاں تے زور دتا جو اوہ بوتل والے پانی دی خرید تے پیسے لاؤن دی تھاں سارے ملک وچ وزارت دے ذیلی اداریاں ، لیبارٹریاں توں پانی صاف کرن دا پاؤڈر مفت لین جیہناں دیاں اپنیاں ٹیماں وی ایہنوں متاثرہ علاقیاں تیکر اپڑا رہیاں نیں تاں جو بہتے توں بہتے لوک فیدا چکن۔

اعظم سواتی دا کہنا سی جو پانی صاف کرن والا ایہہ پاؤڈر لیبارٹری توں ٹیسٹ کیتا ہویا ہے تے ایس گل دی ضمانت دیندا ہے جو ایہدا اک پیکٹ پنج لیٹر پانی نوں صاف کر سکدا ہے۔

ماہر ایس ڈر دا وکھالا کر رہے نیں جو ہڑھ توں متاثر آبادی وچ گندا پانی پین نال وڈی گنتی ود موتاں دا ڈر حالی وی موجود ہے۔ جدوں کہ اجوکے دناں وچ گیسٹرو تے دوجیاں بماریاں نال کئی موتاں وچ ہوئیاں نیں۔

وفاقی وزیر نے خبردار کیتا ہے جو ہڑھ والے علاقیاں دے لوک پانی ابال کے ورتن تے کسے وی حال وچ ہڑھ دا گندا پانی نہ پین۔
اعظم سواتی نے کہیا '' انسٹنٹ پاؤڈر '' دا جیہڑا پیکٹ ساہمنے لیاندا جارہیا ہے ایہدے وچ سارے ضروری وٹامن تے پروٹین موجود نیں تے ایہہ پنج سال تیکر یاں ایہدے توں وڈے بالاں نوں پانی یاں ددھ وچ پا کے دتا جاسکدا ہے جیہڑا اوہناں لئی پوری غذا دا کم کرے گا۔

وزارت دے جاری کیتے اک بیان موجب پاکستانی کونسل فار ریسرچ اینڈ واٹر ریسورسز تے پاکستان کونسل فار سائینٹفک اینڈ انڈسٹریل ریسرچ تے دوجے اداریاں ولوں ہڑھ والے علاقیاں وچ ایس ویلے چالی توں ودھ ٹیماں کم کر رہیاں نیں تے ہن تیکر پنجاہ لکھ جیاں نوں کلورین نال صاف کیتا گیا پانی دتا جاچکیا ہے جدوں کہ اوہناں دا ہدف سارے متاثر ہون والے دو کروڑ لوکاں تیکر اپڑن دا ہے۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels