Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> جنگل دے بادشاہ تے اوکھا ویلا

جنگل دے بادشاہ تے اوکھا ویلا

جمیل اختر
July 14th, 2010
3 / 5 (1 Votes)

سارے جگ وچ شیر کالھی نال گھٹ رہے نیں۔ جنگلی حیات نوں بچاؤن دی عالمی ستھ ورلڈ وائلڈ لائف دی اک نویں رپورٹ وچ دسیا گیا ہے پئی ایس ویلے سارے جگ وچ شیراں دی گنتی اپنی سب توں گھٹ پدھر تے ہے۔ رپورٹ وچ خبردار کیتا گیا ہے پئی شیراں دی نسل نوں زمین توں مٹن توں بچاؤن لئی سارے جگ دے کول صرف باراں سال رہندے نیں۔

شیر نوں جنگل دا بادشاہ کہیا جاندا ہے پر 1900 توں مگروں صنعتی ترقی دی لہر نے شیر تے انسان دوہواں دی بادشاہی نوں تباہ کر دتا۔ اک صدی پہلوں سارے جگ وچ تھاں تھاں بادشاہیاں سن۔ ہن ایہناں دی گنتی اُکا انگلیاں تے گنی جاسکدی ہے۔ انج 1900 وچ سارے جگ دے جنگلاں وچ شیراں دی گنتی دا تخمینہ اک لکھ سی۔ جدوں کہ وائلڈ لائف دی سجری رپورٹ موجب ہن ایہہ گنتی گھٹ کے صرف 3200 رہ گئی ہے۔

ایس ویلے دنیا وچ بچ جان والے کئی شیر صرف ناں دے شیر نیں کیوں جو اوہ جنگلاں دی تھاں چڑیا گھراں، قدرتی پارکاں ،سرکساں تے کجھ لوکاں دے کول پالکی جانور دے طور تے رہ رہے نیں تے اوہ اپنا شکار آپوں کرن دی تھاں اوہناں دے دتے گئے گوشت تے ہی گزارا ہی نہیں شکر وی ادا کردے نیں۔

ماہر کہندے نیں پئی بلی دی شکل نال رلدے ایس شیر یاں ٹائیگر دی نسل نوں ، جیہنوں کجھ علاقیاں وچ جنگلی بلا آکھیا جاندا ہے، ساری جگ وچ مٹن دا خطرہ ہے تے ایہنوں بچاؤن لئی جھبدے کاروائیاں کرن دی لوڑ ہے۔ جیہناں وچ اوہناں دے شکار تے چھیتی روک لاؤنا رلتی ہے۔

ورلڈ وائلڈ لائف دا کہنا ہے جو ایس ویلے شیراں دی اک نکی گنتی چین، ہندوستان، بنگلہ دیش، نیپال، انڈونیشیا، تے ملائشیا وچ موجود ہے۔ ادارے نے ایہناں ملکاں نوں بینتی کیتی ہے جو اوہناں دی اجوکی گنتی نوں 2022 تیکر دونا کرن دی کاروائی کرن تاں جو ایس نسل نوں مٹن توں بچایا جاسکے۔

عالمی ادارے دا کہنا ہے پئی ملائشیا تے انڈونیشیا دے جنگلاں وچ رہن والی شیراں دی اک نایاب قسم نوں پام آئل ، ربڑ تے کاغذ بناؤن والیاں کمپنیاں توں خطرہ ہے۔ جیہڑیاں اوتھے جنگلاں نوں وڈے پیمانے تے وڈھ رہیاں نیں۔

عالمی ادارے دا ایہہ وی کہنا ہے جو شیراں دی نسل نوں اوہناں شکاریاں توں وی خطرہ ہے جیہڑے اوہناں دی کھل ہڈیاں تے جسمانی اننگاں لئی اوہناں نوں مار دنیدے نیں ۔ کجھ ملکاں وچ شیر دیاں ہڈیاں تے جثے دے اننگاں نوں دوائیاں بناؤن وچ ورتیا جاندا ہے۔

جنگلی حیات دے ماہر کہندے نیں جو شیراں دی نسل نوں پیش اک خطرہ آب وہوا وچ عالمی پدھر تے ہون والیاں بدلیاں نیں جیہدا اک وڈا نشانہ بنگلہ دیش دے سندر بن دے جنگل بن رہے نیں، جیہڑا نایاب شیراں دی تھار ہے۔

چین وچ پائے جان والے شیراں دیاں تن قسماں بارے ماہراں دا کہنا ہے پئی اوہناں نوں چھیکڑلی واری اُنی سو چالی وچ ویکھیا گیا سی جدوں کہ اک چوتھی نایاب قسم دے بارے دسیا گیا ہے پئی ایس نسل دے شیر وچ پچھلے پنجھی سال توں نظر نہیں آئے تے ڈر ایہو ہے جو اوہناں دی نسل وی دنیا توں مٹ گئی ہے۔

ایس سال دے شروع وچ جاری ہون والی اک رپورٹ وچ دسیا گیا سی جو چین دے جنگلاں وچ ہن اُکا پنجاہ شیر رہ گئے نیں۔سوادی گل ایہہ ہے پئی ایس ویلے چڑیا گھراں ، مصنوعی پارکاں تے نجی طور تے رکھے ہوئے شیراں دی گنتی آزاد فضاواں وچ شیراں ورگی زندگی لنگھاؤن والے شیراں توں کتے ودھ ہے۔ ماہراں موجب صرف امریکہ وچ اوہناں دی گنتی دا گویڑ پنج ہزار توں ودھ ہے۔

شیراں دی نسل نوں مٹن توں بچاؤن لئی اجوکا سال ، شیراں دے تحفظ دے سال دے طور تے منایا جارہیا ہے۔ ایس سلسلے وچ ستمبر وچ سینٹ پیٹربرگ وچ شیراں نوں بچاؤن تے پہلی عالمی پردھان کانفرنس رکھی جارہی ہے جیہدے وچ دنیا دے اوہ تیراں ملک شامل ہون گے جتھے شیر پائے جاندے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels