Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> ریڈیو دوربیناں راہیں کائنات وچ ذہین مخلوق لبھی جا رہی ہے

ریڈیو دوربیناں راہیں کائنات وچ ذہین مخلوق لبھی جا رہی ہے

وچار ڈیسک
June 10th, 2010

سائنس دی ترقی دے نال نال دھرتی توں باہر دی دنیا نوں وس وچ کرن لئی کائنات بارے ہور جانن دا بھس ودھ رہیا ہے۔ حالیں یورپی سائنس داناں نے ماڈرن ریڈیو دوربیناں لا کے اک وڈا پروجیکٹ شروع کیتا ہے۔ اوہناں نوں آس ہے پئی اوہناں راہیں کائنات دے شروع تے دوجے سیاریاں وچ کسے ذہین مخلوق دے ہون دی کھوج لاؤن وچ مدد مل سکے گی۔

پورٹس متھ، آکسفورڈ تے ساؤتھ ہمپٹن یونیورسٹیاں ایس وڈے پراجیکٹ تے سانجھیاں کم کر رہیاں نیں۔ پہلے پڑاء وچ ایس ہفتے ہیمشائر دے نیڑے اینڈور دے خلائی کاہڈو اڈے وچ گھٹ فریکونسی والے ریڈیو دے 96 نشریاتی کھمبے لائے جان گے۔

جدوں کہ ایہدے مگروں نیدر لینڈز، جرمنی، فرانس، سویڈن، تے پولینڈ وچ انج دے ہور پنج ہزار انٹینے لائے جان گے۔ یونیورسٹی آف پورٹس متھ دے خلائی کھوج بارے شعبے دے پروفیسر یوب نکول دا کہنا پئی گھٹ فریکونسی دیاں ایہناں ریڈیو دوربیناں نال فیدے مند جانکاری مل سکے گی جیہناں دی مدد نال سورج، کائنات دی موسمی بدلی تے اُچیچا دوجے سیاریاں وچ کسے ذہین مخلوق دی موجودگی دا کھوج لاؤن وچ مدد مل سکے گی۔

اوہ کہندے نیں ایس نویں ریڈیو ٹیلی سکوپ راہیں ہو سکدا ہے پئی اسیں ایس پرانے تے کئی واری پچھے جان والے سوال دا جواب دین جوگے ہوسکیے پئی ایس پوری کائنات وچ اسیں اکلی ذہین مخلوق آں۔

یورپ وچ لائے جان والی گھٹ فریکونسی دی ایہہ ریڈیو دوربیناں، بہت ایف ایم فریکونسی تے کم کرن گیاں۔ تے اوہ اک دوجے دے نال ہائی سپیڈ انٹرنیٹ دے اک نیٹ ورک نال جڑیاں ہون گئیاں جیہناںنوں نیدر لینڈز وچ لگے اک سپر کمپیوٹر وچ گھلیا جاوے گا جتھے سائنسدان ایس جانکاری دا تجزیہ کرن گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels