Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> فرانسیسی صدر چین وچ:افریقہ،موسمیاتی وٹاندرے تے تجارتاں۔سانجھا ایجنڈا یوریشیا

فرانسیسی صدر چین وچ:افریقہ،موسمیاتی وٹاندرے تے تجارتاں۔سانجھا ایجنڈا یوریشیا

January 9th, 2018

دنیا کتھوں کتھے جارہی ہے اتے کل تیک چین خلاف گلاں چکن والا فرانس ہن چین دے وی نیڑے آ چکیا ہے اتے یورپی یونین وچ وی چین دا بھار ودھ چکیا ہے۔ایہہ بدلدی ہوئی دنیا دا بوتھا ہے پر ساڈے کول اندونی لڑائیاں توں ویہل نہیں کیونجے28 جولائی بعدوں انتشاری ڈرامہ ہور اگے ودھ گیا ہے۔میڈیا وی پاکستانیاں نوں کراہے پاون دا کم کر رہیا ہے اتے کدی عمرانی شادیاں تے کدی بلوچستان اسمبلی۔
فرانس دے صدر اعمانیول میکرون ہوری اجکل ترے دناں لئی چین اپڑے ہوئے نیں اتے اوہ بہوں سار مسلیاں وچ چین دی مدد چاہندے نیں۔ ایس وچ چین تے فرانس وچ تجارتاں دا بیلنس وی رلتی ہے،افریقہ دی سیکورٹی دی وی فکراں نیں اتے موسمیاتی وٹاندرے(Cliamate Change) دی گل وی رلتی ہے۔جداں دا برطانیہ بریگسٹ وچ پھسیا ہے اوس توں بعدوںیورپ دے فیصلیاں وچ جرمنی تے فرانس دا بھار بہوں ودھ چکیا ہے اتے چین ایس پاروں یورپ نال تگڑے سانگے بنا چکیا ہے۔فرانس پچھلے کجھ ویلے وچ سفارتکاریاں نوں ودھایا ہے اتے اک پاسے اوس لبنانی وزیراعظم دے بحراناں نوں حل کیتا اتے امریکہ، اسرائیل، ایران جھیڑیاں نوں وی مٹھا کیتا۔پرانے فرانسیسی صدراں توں ہٹ کے میکرون ہوری عالمی پدر تے فرانس دا رول ودھا رہے نیں اتے انہاں دا چین دا دورہ وی ایسے دا لشکارا ہے۔ چیتے رہے پئی فرانس اک لمیرے چر توں امریکہ دا اتحادی ہے پر ہن ٹرمپ دی پالیسیاں پاروں اوس دا الار چین ول وادھو۔ چین ول فرانسیسی اتے جرمن اْلار دی ہک وڈی وجہ موسمیاتی وٹاندرہ وی ہے کہ پیرس معاہدے تے چین بربر اگے ودھ رہیا ہے۔کولے پاروں ہون والی آلودگیاں وچ چین دا حصہ وادھو ہوندا سی کہ چین ایس تے قابو پاون لئی بہوں کم کیتے نیں جس وچ صنعتاں نوں ایل این جی ول لیجانا اتے کولے تے ڈیزل توں جان چھڈانا رلتی ہے۔میکرون یورپ تے چین وچ نویں سانگیاں دی گل کر رہے نیں اتے ایس پاروں یوریشیا دا پرانا ایجنڈا نظر آرہیا جس نوں برطانیہ عالمی طاقت بنن توں بعدوں 19ویں صدی وچ رگیدیا سی۔ہورے ٹرمپ دا ایران تے پاکستان ول ودھدا غصہ وی تاں مارے ہے پئی ٹرمپ ہن پاکستان، افغانستان تے ایران دی رلدی ملدی سرحدی تھاواں وچ کجھ کرن ول ودھ سکدا ہے۔
پیر والے دن میکرون نوں چین دے اوس قدیمی شہر لیجایا گیا جیہڑا ستویں صدی دی ٹانگ پادشاہتاں دا مڈھلا شہر سی۔ایہہ شمال مشرقی تھاواں ول جے اتے اتھے ہی مشہور زمانی ریشمی رستہ یعنی سلک روٹ مکدا سی۔ایہہ چینی سفارتکاریاں دا وڈا لشکارا کہ فرانسیسی صدر نوں چینیاں نے یوریشیا دا بھلیا سبق چیتے کرایا۔ایس موقعہ تے چینی صدر آکھیا پئی فرانس یورپ وچ اوہ پہلا ملک سی جس انقلاب بعدوں بینی سرکار نوں تسلیم کیتا۔1964 اوہ سال جداں چیرمین ماؤ زے تنگ تے چارلس ڈیگال تریخی معاہدے کیتے سن۔چین تے فرانس رل مل جنج پہلے دنیا دا بوتھا بدلیا سی اینج ہی ہن فیر اوہ تواریخ بدلن گے۔اساں فرانس دی مدد نال انہاں افریقی تھاواں وچ رل مل بہوں کم کر سکدے ہاں جتھے نوآبادیاتی دور وچ فرانسیسی رہے سن۔فرانس ایس سب کرن لئی تیار ہے اتے بدلے وچ فرانس تے چین وچ 36ارب ڈالر دے ٹریڈDeficitخسارے نوں تیزیاں نال گھٹانا چاہندا ہے۔ایس پاروں اوس نون چین دی مارکیٹ وچ ورنا ہے تے میکرون تاں مارے چین وچ نیں۔فرانس دے خزانے دا وزیر پہلاں ہی روس تے چین نال سرمایہ کاریاں دے نویں رستیاں بارے امیداں دواں چکے نیں۔اپنی گل بات وچ فرانسیسی صدر چین دے ودھ چکے کردار دا حوالہ دتا اتے پیرس معاہدے پاروں چین دے رول نوں مثالی آکھیا۔ چیتے رہے، امریکی صدر ٹرمپ دے پیرس معاہدے توں نکلن دے اؑ لان نے ایس معاہدے نوں دھچکہ لایا سی پر چین نے ایس معاہدے دا ساتھ دتا تے ایس نون بچا لتا۔میکرون ایہہ وی آکھیا ہے پئی اساں چین نال رل کے وسطی افریقہ وچ سیکورٹی پاروں G-5 بناون وچ اکٹھے ہاں۔
دنیا تے تیزیاں نال بدل رہی ہے پر پاکستانی پردھان، پرائیوٹ اتے اآزاد میڈیا اپنے لوکاں نوں شادیاں، طلاقاں وچ ہی رکھنا چاہندا ہے۔ایہہ ہشیار ایجنڈا کیہہ بدلدی سیاستاں تون لوکاں نون پراں رکھن دا بوتھا ہے، تساں آپ سوچو۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels