Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> زمینی تجارتاں اتے درّے:شمالی وزیرستان توں افغانستان جاون والا درّہ کھولن دا اعلان

زمینی تجارتاں اتے درّے:شمالی وزیرستان توں افغانستان جاون والا درّہ کھولن دا اعلان

وچار ڈیسک
June 22nd, 2017

دوست محمد خان دے پتر شیر علی خان نوں دوجی انگریز افغان جنگ(1878-80) وچ قتل کرن تے افغان اشرافیہ کولوں گندمک معاہدہ منوان بعدوں پہلے افغانستان تے فیر فاٹا بنایا گیا اتے زمینی تجارتاں دے درّے بند کردتے گئے سن اتے ایس بندوبست نوں پکا کرن لئی پنجاب دے ضلعیاں نوں پٹھاناں دی تھاواں نال ملا کے صوبہ سرحد 1901وچ بنایا گیا۔ہن جداں چینی سرمایہ کاریاں پاروں تجارتاں نوں وادھا مل رہیا ہے تاں انہاں بند دریاں نوں کھولن دا آہر کیتا جا رہیا ہے۔وائس آف امریکہ دی خبر تھلے چھاپ رہے ہاں اتے ایہہ پڑھن نال جے تہانوں درّے بند کرن دی تریخ وی یاد ہوئے تاں ساری کہانی سمجھ آ جا سی۔
 
عید دے فوراً بعد پاکستان تے افغانستان دے درمیان شمالی وزیرستان دے علاقے غلام خان نیڑے درّے نوں تجارتاں تے معاشی سرگرمیاں لئی کھول دتا جائے گا۔ شمالی وزیرستان دی انتظامیہ نے عید بعدوں افغانستان تے پاکستان دے درمیان اہم درے "غلام خان" نوں دو طرفہ تجارت لئی دوبارہ کھولن دا اعلان کیتا ہے۔ شمالی وزیرستان دے پولیٹیکل ایجنٹ کامران آفریدی نے منگل نوں صحافیاں نوں دسیا کہ ایجنسی وچ امن و امان دی صورتِ حال کافی بہتر ہوئی ہے تے ہن ایتھے ملک دے دوجے علاقیاں دی طراں تجارتی تے معاشی سرگرمیاں شروع ہوگئیاں نیں۔ پاکستان تے افغانستان دے درمیان سانجھی تجارتاں تے صنعت وحرفت دے ادارے دے نائب چیئرمین ضیا الحق سرحدی نے وائس آف امریکہ دے نال گل بات دے دوران ایس اعلان دا خیرمقدم کردے ہوئے آکھیا کہ ایس توں نہ صرف علاقے وچ تجارتی سرگرمیاں دوبارہ شروع ہون گیاں سگوں پاکستان دی افغانستان دے نال تجارت دے حجم تے برآمداں وچ وی اضافہ ہوئے گا۔ ضیا الحق سرحدی نے وفاقی تے صوبائی حکومتاں نوں مشورہ دتا کہ افغانستان دے نال باہمی تجارتاں نوں وادھا دین لئی علاقے وچ امن و امان دی صورتِ حال نوں مزید بہتر بنایا جائے۔ انہاں نے آکھیا کہ افغانستان دے نال دوطرفہ تجارتاں نال ہزاراں خاندان وابستہ نیں لہذا ایس توں دوناں ملکاں دے لوکاں نوں فیدہ پہنچے گا۔ کرم ایجنسی وچ واقع افغانستان دے نال دو اہم سرحدی درے خرلاچی تے بڑکی نوں تجارتی سرگرمیاں لئی پہلے ہی کھولیا جاچکیا ہے۔ کرم ایجنسی دے قبائل نے حکومت دے ایس فیصلے دا خیرمقدم کیتا ہے۔ دوجے پاسے روایتی قبائلی جرگے منعقدکرکے ایس فیصلے تے خوشی دا اظہار وی کیتا جارہیا ہے۔ شمالی وزیرستان تے افغانستان دے صوبے خوست نوں ملان والے غلام خان دے مقام تے واقع سرحدی گزرگاہ یعنی درے نوں 15 جون 2014ء دے دن عسکریت پسنداں دے خلاف فوجی کاروائی 'ضرب عضب' دے شروع ہوندے ہی ہرقسم دی تجارتی تے معاشی سرگرمیاں لئی بند کردتا گیا سی۔ فوجی کاروائی دے دوران حکومت نے بنوں توں میران شاہ تے میران شاہ توں غلام خان تک عالمی معیاراں پاروں سڑل مڑ بنائی ہے۔ غلام خان دے مقام تے کسٹم، ٹرانسپورٹ تے دوجے وفاقی ادریاں دے دفاتروی قائم کردتے نیں۔ ذرائع دے مطابق حکومت نے فیصلہ کیتا ہے کہ افغانستان تے وسط ایشیائی ملکاں دے نال علاقائی تجارت نوں ودھان لئی شمالی وزیرستان وچ اک وسیع و عریض صنعتی بستی وی قائم کیتی جائے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels