Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> چٹی قوم پرستی

چٹی قوم پرستی

March 9th, 2017

ولادمیر لینن نے کہیا سی جو سامراجیت سرمایہ داری دی انتم (اخیرلی) منزل ہوندی ہے۔ ایس دی تفسیر کجھ انج کیتی جاندی سی جو جدوں سرمایے دا اپنے ملکاں وچ منافع گھٹنا شروع ہوندا ہے تے اوہ باہر دنیا دے ہور ملکاں وچ جاکے منافع ودھاندا ہے۔ نوآبادیاتی نظام نوں انج ہی سمجھیا گیا سی جو وادھو سرمایے نے دنیا تے جا کے مل مار لئی تے ماڑیاں ملکاں تے قبضہ کرکے اوہناں دے وسیلیاں دی لٹ مار کیتی۔ پھیر جدوں دوجی وڈھی جنگ توں مگروں بہتے ملک آزاد ہو گئے تے باہرلے سرمایے نے مقامی گماشتہ سرمایہ داراں نال مل کے لُٹ مار دا نظام جاری رکھیا، ایس طرحاں دے بندوبست نوں سامراجیت کہیا گیا۔ پر سرمایہ جیویں وہوویں صدی دے اخیر وچ ماڑیاں ملکاں وچ گیا اوہدی پہلاں کوئی مثال نہیں ملدی۔ امریکہ تے یورپ دے سرمایہ داراں نے چین، ہندوستان، جنوبی کوریا تے ہور اجیہے گھٹ ترقی والے ملکاں وچ سرمایہ لایا کیوں جے اہناں ملکاں وچ پیداواری لاگت بہت گھٹ سی۔ گھٹ پیداواری لاگت نال چیزاں بنا کے صنعتی ملکاں وچ ویچیاں گیاں جیہدے نال سرمایے تے منافع دی شرح بہت ودھ گئی۔ اہناں ادلا بدلیاں نال ساری دنیا دا معاشی، سیاسی تے سماجی نظام بدل گیا ہے۔ایس نویں نظام نوں ہی گلوبلائزیشن کہیا جاندا ہے۔

گلوبلائزیشن دے عمل وچ بہت ساری نویں دولت وی پیدا ہوئی ہے تے دولت دی نویں ونڈ وی ہوئی ہے۔ ایہہ گلوبلائزیشن نویں ٹیکنالوجی تے خاص کرکے انفارمیشن ٹیکنالوجی دی وجہ توں ممکن ہو سکی ہے۔ ایس نویں زمانے وچ آوا جاوی تے گل بات دے وسیلے اینے ودھ گئے ہین جو دنیا سونگڑ کے نکی ہو گئی ہے۔ ہن دنیا دے سرمایہ دار سوکھ نال اوہناں ملکاں وچ گھٹ لاگت تے چیزاں بنا کے مہنگیاں منڈیاں وچ ویچ سکدے ہین۔ ایسے کارن امریکہ دیاں بہت ساریاں صنعتاں چین ہندوستان تے ہور اجیہے ملکاں وچ ٹرگیاں ہین ایس نال اک پاسے تے ماڑیاں ملکاں وچ صنعتی انقلاب آئے ہین تے دوجے پاسے وڈھے سرمایہ دار ملکاں وچ مزدوراں دی کمائی تے پٹھا اثر ہویا ہے۔

اٹھارویں صدی وچ یورپی سرمایہ دار ملکاں نے ماڑیاں ملکاں تے قبضہ کرکے نوآبادیاتی نظام شروع کیتا۔ ایہہ ماڑیاں ملکاں دی سدھی لٹ سی، پر ایس لٹ لئی ہندوستان ورگے ملکاں وچ ریلوے تے ہور لہندے دے ادارے وی وجود وچ آئے۔ نو آبادکاراں دے قبضے نال تقریباً ہر تھاں تے وچلا طبقہ پیدا ہویا جیس نے تھاں تھاں تے آزادی دیاں جنگاں دا مڈھ رکھیا۔ سو ایس زمانے وچ قوم پرست تحریکاں غلام ملکاں وچ چلیاں۔ نویں آزاد ہوون والے ملکاں دی آزادی ادھی پچدی سی کیوں جے سامراجی نظام ہیٹھ نویں آزاد ملکاں دے لوکاں دی لٹ مار جاری رہی۔ پر ویہویں صدی دے اخیر تے جیویں سرمایہ ماڑے ملکاں وچ گیا ہے تے سرمایہ دار ملکاں وچ صنعتاں مک جان نال جیویں مزدور طبقے نوں نقصان ہویا ہے اوس نال ہن تگڑے سرمایہ دار تے سامراجی ملکاں وچ قوم پرستی دیاں تحریکاں اٹھ رہیاں ہین۔ امریکہ وچ ڈونلڈ ٹڑمپ دی جت تے برطانیہ دی یورپی یونین وچوں نکلن دی تحریک اہناں ملکاں وچ قوم پرستی دا وکھالا ہین۔ چٹیاں دیاں اہناں قوم پرست تحریکاں وچ نسل پرستی وی رلی ہوئی ہے۔ ایہہ تحریکاں اہناں ملکاں دے گئے زمانیاں دی وڈیائی نوں موڑ لیاون دے جتن ہین۔ مطلب یہہ ہے بئی ایہہ تحریکاں اہناں ملکاں دے نوآباکاری تے سامراجی چڑھتل دے ویلیاں نوں پھیر توں دنیا وچ نافذ کرنا چاہندیاں ہین ۔ ایس کرکے ایہہ پچھونہیاں تحریکاں ہین جنہاں دا کوئی سٹہ نہیں نکلنا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels