Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ’’اوبر تے ’’کریم‘‘، سندھ تے پنجاب:مسئلہ چوڑ نہ کرو سگوں حل کرو

’’اوبر تے ’’کریم‘‘، سندھ تے پنجاب:مسئلہ چوڑ نہ کرو سگوں حل کرو

February 1st, 2017

سوال نرا قنون وچ انہاں کمپنیاں نوں لیاون دا نہیں سگوں ماملہ کجھ ہور وی جاپدا ہے۔ ایڈے سخت قنوناں نال لوک دوڑ جاندے نیں۔لگدا ہے بیوروکریٹاں سیاسی لوکاں نوں پٹھا سبق پڑھایا جے۔ سندھ تے پنجاب دوناں سرکاراں ایہہ کم اگے پچھے پایا ہے جس دا مطلب ایہو ہے پئی کوئی ڈاڈھا بیوروکریٹ ایس دے مگر ہے۔
میڈیا وچ ایس خبر بعدوں جیہڑی مہم چلی اوس وچ ایہو تاثر دتا گیا پئی ایہہ نرا مسلم لیگ ن دا مسئلہ ہیاتے کسی ترکی دی کمپنی نوں نواں ٹھیکا دیا ہے۔ ایہہ مہم اوہی چلا رہے سن جیہڑے اج کل پانامہ دی بند گلی وچوں نکلن دا راہ لبھ رہے نیں۔ کیہ سندھ سرکار نوں وی مسلم لیگ ن آکھیا سی؟ مسئلہ اوس ویلے چوڑ ہوندا ہے جدوں مخالفتا کرن والے وی کراہے پئے ہوندے نیں۔ سندھ پنجاب سرکاراں ایہہ آکھ رہیاں نیں پئی گڈیاں نوں کمرشل کرواؤ تے ڈیٹا شئیرکرو، روٹ شوٹ دا مسلہ وی ہے۔ پر کیہ اوہ دس سکدے نیں پئی گڈیاں نوں کمرشل کروان نال جداں گڈی دی مارکیٹ پرائس گھٹ ہوجاندی ہے تے اوس دا کیہ حل ہے؟ جتھے پبلک ٹرانسپورٹ دا نکما سسٹم چل رہیا ہے اتھے ایس نویں ٹیکسی سروس گرمیاں وچ ٹھنڈی ہوا وانگ آئی تے ہلے ایس توں لوک عادی ہی ہورہے سن کہ بیوروکریسیاں لت مار چھڈی۔ کیہ سرکار اپنے پرانے قنوناں نوں بدل نہیں سکدی؟پرانے قنون نویں سروس تے لاگو کیوں کردے ہو۔ کمپنیاں نوں پنجاب نے 15 تے سندھ نے 30 دناں دی مہلتاں دتیاں نیں۔ سرکار ٹیکس پاروں رقم تے ضرور کمائے پر اینج دا کم کرنا لوڑی دا ہے جس نال سب دا کم چلدا رہے۔
بیورو کریسی نوں عوامی مفاد نال کوئی غرضاں نہیں ہوندیاں۔ اوہ ہمیشہ نک دی سیدھ وچ پالیسیاں بناندے نیں۔ پر چونویں سرکاراں جدوں بیورو کریٹاں مگر لگن گیاں تاں فیر ایہو کجھ ہوسی۔ کیہ سرکار جاندی نہیں پئی پہلی ٹیکس سکیم ناکام ہوچکی ہے۔ پبلک ٹرانسپورٹ دا چنگا سسٹم نہیں ہے۔ قنون اوہ بناؤ جیہڑا لوکاں نوں مل چکی سہولتاں نوں اگے لیجائے۔ تاجراں تے پرائیویٹ سکولاں دے حوالے نال وی ایہو کجھ ہوندا ہے۔ یا تے قنون نظر ہی نہیں آوندا اتے جے آوندا ہے تے ایڈا سخت کہ کانڈ بچہ کوہلو ہوجاندا ہے۔ اجہی انتہاپسندیاں توں بچانا چونویں اسمبلیاں اتے انہاں دی کمیٹیاں دا کم ہے۔ مسلم لیگ ن تے پی پی پی دی پنجاب تے سندھ سرکاراں نوں چاہیدا ہے پئی اوہ وچلے راہ کڈہن۔ جے گڈیاں نوں کمرشل کرن نال انہاں دی مارکیٹ پرائس تے اثر پیندا ہے تاں فیر سرکاراں ٹیکس لین دا دوجا راہ کڈھن اتے جے قنون بدلنا ہوئے تے اوس پاسے دھیان دین۔ جے کاروباری لوک بلیک میل کردے نیں تے اسمبلیاں دی کمیٹیاں تے میڈیا وچ گل نوں چکن۔اک اندازے پاروں گڈیاں نوں کمرشل کرن نال انہاں دی مارکیٹ پرائس 30 توں 50 فیصدی گھٹ جاندی ہے۔ ایہہ سروس دنیا دے دوجے ملکاں وچ وی چل رہی ہے اتے سرکاراں نوں اوس بارے وی رپورٹ لینا چاہیدی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels