Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> افسراں دے ٹیکس گوشوارے

افسراں دے ٹیکس گوشوارے

jameel Ahmad Paul
May 29th, 2014

خزانہ وزیر نے ایس خبر دا سخت نوٹس لیا اے کہ ایف بی آر دے 1743 وچوں 200 افسراں نے اپنے ٹیکس گوشوارے جمع ای نہیں کرائے۔ اوہناں نے ہدایت کیتی اے کہ سارے معاملے دی پُن چھان کر کے نادیندڑ افسراں نوں 10جون تک ٹیکس گوشوارے جمع کران دا پابند بنایا جاوے، دوجی صورت وچ اوہناں دا کم کاری الاؤنس روک دتا جاوے۔ چیئرمین ایف بی آر نے آکھیا اے کہ ٹیکس افسر شہریاں لئی مثال ہونے چاہیدے نیں تے حکومت ایف بی آر افسراں ولوں ٹیکس چور ی بالکل برداشت نہیں کرے گی۔
پاکستان دے حوالے نال ایہہ خبر زیادہ ماڑی نہیں لگدی کیوں جے ایتھے سوائے سرکاری افسراں دے کوئی وی نہ تے پورا ٹیکس دیندا اے تے نہ ای ایہدے بارے بھرواں ریکارڈ رکھن دی کھیچل کردا اے۔ جدوں مالی سال مُکن لگدا اے ٹیکس باے حکومتی رولا ودھدا اے تاں خانہ پوری کر لئی جاندی اے۔ سرکاری افسر وی صرف ایس کارن پورا ٹیکس دیون نوں مجبور نیں کہ اوہناں دا سارا ریکارڈ حکومت کول ہوندا اے تے اوہدے وچوں ٹیکس دی کٹوتی پیشگی کر لئی جاندی اے، مالی سال مکن اُتے صرف حساب ای برابر کیتا جاندا اے۔
ملک وچ کرپشن اینی ودھ چکی اے کہ جیہڑا کرپشن نہ کردا ہووے اوہنوں بے وقوف سمجھیا جاندا اے تے مہنے دتے جاندے نیں۔ واڑھ ای کھیت نوں کھائی جا رہی اے تے لوک مطمئن نیں۔ ٹیکس نہ دیون دا اک وڈا کارن ایہہ وی اے کہ لوکاں نوں اعتبار ای نہیں کہ اوہناں دے لہو مُڑھکے دی کمائی وچوں کٹیا گیا ٹیکس اوہناں اُتے لایا وی جاوے گا۔ ایہہ اوہ قوم اے جیہڑی مذہبی ٹیکس یعنی زکوٰۃ وی دین نوں تیار نہیں ہوندی۔ جنرل ضیاء دے زمانے وچ جدوں جبری طور تے ٹیکس کٹوتی شروع کیتی گئی تاں ادھے ملک نے اپنا مسلک شعیہ بنا لیا جد کہ باقی لوک پہلی رمضان توں پہلاں اپنے بنک اکاؤنتاں وچوں پیسے غائب کر کے دو دن بعد جمع کروا دیندے ہوندے سن۔ حکومت دی تنخواہ وچوں زکوٰۃ کٹ رہی سی تے ایہدے لئی ضروری نصاب دی بجائے صرف دو ہزار دی رقم وچوں ٹیکس کٹوتی کر لئی جاندی سی۔ گویا جیہو جیہے کوہن والے اوہو جیہے کھان والے۔
جے ایف بی آر دے ستر پچھتر فیصد افسراں نے اپنے ٹیکس گوشوارے جمع نہیں کروائے تاں گوایا ایسے ریت دی پالنا کیتی اے۔ اوہ آپ حکومت نیں، حکومت جو مرضی کرے۔ جے ایہو جیہے کم کوئی ٹیکس نیٹ ورک وچ آیا ’’سزا یافتہ‘‘ کرے تاں فیر اوہنوں لازمی ایس کم دا مزا چکھنا پیندا اے۔ سرکاری افسر تے شیر وانگوں جنگل دے بادشاہ ہوندے نیں تے شیر دی مرضی اے انڈے دیوے یاں بچے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels