Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> دُنیا دی 11وڈی معیشت؟

دُنیا دی 11وڈی معیشت؟

جمیل احمد پال
November 10th, 2013

پرائیویٹ چینل نال گل کردیاں وزیر خزانہ اسحق ڈار ہوراں پاکستانیاں نوں خواب وکھایا اے کہ اسیں چھیتی ای دُنیا دی 11وِیں وڈی معیشت بن جاواں گے۔ اوہناں نے دسیا کہ حکومت معاشی پکیرتا لئی موثر اقدامات کر رہی اے تے عالمی ریٹنگ ایجنسیاں پاکستان نوں معاشی طور اُتے مثبت قرار دے رہیاں نیں۔ سرکار دا حِصّہ ہوون پاروں ڈار ہوراں حقِ نمک ادا کردے ہویاں دسیا کہ موجودہ حکومت سادگی تے کفایت شعاری دی پالیسی اُتے عمل پیرا اے۔وزیر اعظم دے صوابدیدی فنڈ مکا کے خرچیاں وچ کمی وی کیتی گئی اے۔ قوم اُتے احسان فرماندے ہوئیاں اوہناں نے ایہہ وی دسیا کہ حکومت بجلی دے گھروکے ورتیندڑاں نوں ارباں رُپئے دی سبسڈی دے رہی اے۔ 200 یونٹ استعمال کرن والے ورتیندڑاں نوں بجلی دِیاں نویاں قیمتاں توں مستثنہ قرار دِتا گیااے۔ اوہناں دے مطابق ملکی معیشت بحالی ول جا رہی اے۔ پچھلے مہینے 33 بنیادی شیواں دیاں قیمتاں وچ استحکام رہیا۔ ست شیواں دِیاں قیمتاں گھٹ ہوئیاں جد کہ 13 شیواں دیاں قیمتاں وچ ودھاہویا۔
اسحق ڈار ہوراں نوں ملکی معیشت دی بہتری تے خشحالی دے چھچھڑیاں دے جیہڑے سفنے آوندے نیں، پتا نہیں اوہ باقی پوری قوم نوں کیوں نہیں آ رہے۔ قوم نوں تے اینا پتا اے کہ انکم ٹیکس دا نشانہ پورا نہیں ہو سکیا، پٹرول دے مُل ہر مہینے ودھ رہے نیں، آٹا تے ہور بنیادی چیزاں دے مُل اسمان نوں چھالاں مار گئے نیں، پیاز تے آلو سو رُپئے فی کلو وِک گیا اے تے ٹماٹر دا مُل دو سو نوں ہتھ لا کے پرتیا اے۔ بجلی اُتے جیہڑی سب سڈی دا احسان حکومت ولوں وار وار جَتایا جاندا اے، اوہ سچ سہی پر کنے گھر نیں جتھے دو سو یونٹ بجلی بلدی اے؟ اج کل روز دے ودھیرے کم بجلی نال ای ہوندے نیں تے لوکاں نوں اوہ جیہڑے بھا پے رہی اے، اسحق ڈار نالوں عام بندے نوں اوہدا مُل بہُتا پتا اے۔ اسحق ڈار دی ایس بحال ہوندی معیشت وچ عام بندا دن بدن ہور بھُکھا، ہور پریشان، ہور تباہ حال ہو رہیا اے۔
حکومتی ترجمان لوکاں نوں اینا بے وقوف کیوں سمجھدے نیں کہ ڈُبدی کشتی نوں تارو وکھا کے اپنی سیانپ دی دس پاندے نیں۔ آئی ایم ایف دے قرضے دی خیرات دی اک قسط مل جاون واسطے سانوں کنا کجھ کرنا پیندا اے تے لوکاں نوں کنی اذیت دینی پیندی اے، ایہدا اسحق ڈار نوں کوئی احساس نہیں۔ نرا لفظاں دی جادوگری نال معیشت کویں تاری جا سکدی اے؟ ملکی آبادی اک خاص جانور دی آبادی نالوں وی تیزی نال ودھدی جا رہی اے تے سیانے حکمراناں نوں کوئی فکر ای نہیں۔ گلیں باتیں تاں ایس ملک دی معیشت یارھویں تاں کیہ پہلے نمبر اُتے وی وکھائی جا سکدی اے۔ خیالی پُلاء پکانا ہووے تاں گرم مسالا جِنامرضی پا لوو، کسے نوں کیہ اعتراض اے؟


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels