Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> معاشی لبِرل پالیسی

معاشی لبِرل پالیسی

الیاس عباسی
May 26th, 2013

عالمی تعلقات دے ماہراں دا آکھن اے کہ اج دنیا وچ کوئی وی ملک کِسے دوجے ملک دا دوست نہیں ہوندا سگوں اوہ مفاد ہوندے نیں جیہناں راہیں ایہہ ملک جڑے ہوندے نیں پاکستان چین دی دوستی بارے بہت کجھ کہیا جاندا اے سگوں دوہاں حکومتاں تاں ایہو جیہے نعرے لاندیاں نیں کہ ایہناں دوستی شہد توں ودھ مٹھی تے پہاڑاں توں اُچی اے ایہہ دوستی دوہاں دیساں دی حکومتاں وچکار اے لوکائی نال ایہہ جڑت نہ ہون برابر اے۔ 1949 توں اج تائیں چینیاں دا اِکو مقصد اے کہ کسراں اوہ عالمی معاشی طاقت بن سکدا اے جیس لئی اوہناں ٹارگٹ وی رکھے نیں جیہدے نال اوہناں اپنی معاشی رفتار Per Capita Income نوں آن والے دس سالاں تیک دُگنا کرنا اے ایہو کارن اے کہ اوہناں ہندستان نال تجارتی سمبندھ ودھائے تے ہُن اوہ اپنے تجارتی تے معاشی معاہدیاں نُوں وی مستقبل وچ دُگنا کرنا چاہندے نیں۔ معاشیات اِک اجہیا ہتھیار اے جیہدے راہیں چین نے ہانگ کانگ نُوں نپیا۔ عالمی سیاست وچ اوہدا کردار بھرواں اے تے چینی جذبات دی اکھ نال عالمی حالات نُوں نہیں ویکھدے سگوں اوہناں لئی سبھ توں پہلاں تے وڈا مقصد معاشی فائدہ ہوندا اے۔ ساڈے لئی سوچن والی گل اے کہ اسیں ہندستان نال اپنی تجارت نہیں ودھا سکے اج وی ایتھے بھارت نُوں من پسند تجارتی ملک (MFN) دا درجا دِتے جان خلاف احتجاج ہوندے نیں جد کہ دوجے پاسے ساڈا سبھ توں وڈا تے اعتماد والا دوست چین اوہناں نال تجارت نُوں کئی گنا ودھان دا جتن کر رہیا اے۔ پچھلے کئی ورھیاں توں چین نے ازاد یعنی لبِرل معاشی پالیسی اختیار کیتی ایہو وجہ اے اج اوہدی معشیت دا پہیہ چل رہیا اے لاطینی امریکا توں افریقہ تائیں‘ ایشیا توں امریکا تائیں‘ ہر پاسے چینی معیشت دا کھلار نظر آوندا اے ایہناں پالیسیاں دا سِٹا اے کہ اج چین دنیا دی دوجی وڈی اکانومی بن کے اُبھریا اے۔
ساڈی پچھلی حکومت پنجاب ولوں لاہور وچ میٹرو بس دا تجربہ کامیاب رہیا تے ایہہ پراجیکٹ ترکی دی اِک مشہور کمپنی نُوں دِتا گیا اے تے ایسے کمپنی دے وڈے افسر اج کل لاہور آئے ہوئے نیں تے اِک رپورٹ مطابق اوہناں سابق وزیر اعلیٰ پنجاب شہباز شریف ہوراں نال ملاقات کیتی تے اوہناں نُوں الیکشن دی کامیابی اُتے مبارکباد دِتی اے تے نال ای اوہ ایہہ آس لائی بیٹھے نیں کہ آن والی فیر ایہہ شریف حکومت اوہناں نُوں ٹھیکے دیوے گی تے اِنج پاک ترک دوستی اگے ودھے گی تے پاکستان اسلامی ملک ہون پاروں اوہناں لئی بھرویں تجارتی کھِچ رکھدا اے۔
جے اسیں گوہ کریے تاں یورپ دی وِگڑدی معاشی حالت اندر ترکی حکومت نے ہشیاری وکھاندیاں کئی اسلامی مکھاں نال تجارتی سمبندھ کیتے مذہب دا نعرہ لا کے‘ مذہبی سانجھ دا وکھالا کردیاں ترکی کمپنیاں نُوں اسلامی ملکاں دی صورت وچ اوہ مارکیٹ ہتھ آ گئی اے جیہدے راہیں اوہ اپنی ڈِگدی معیشت نُوں سنبھالا دے سکدے نیں۔
پاکستانی جذباتی قوم نیں جیہڑے مذہب دے ناں اُتے اپنی معیشت تاں کیہ اپنا سبھ کجھ دے دیون۔
اجیہیاں کمپنیاں نُوں ٹھیکے دین توں پہلاں سانوں اپنے فائدیاں نُوں ویکھنا پوے گا۔ جدوں اسیں لبرل معاشی پالیسی تے عمل کراں گے تے فیر ایسں ملک اندر حقیقی سرمایا کاری باہروں آوے گی۔ ایہدا فائدہ ملک نُوں پہنچے گا کِسے اک کمپنی نُوں حکومت ولوں نوازنا یاں جذباتی ہو کے اکھاں بند کر لین نال فائدہ نہیں ہوندا سگوں نقصان ہوندا اے ملکی معیشت وچ مقابلے دی فضا مُک جاندی اے جیہڑی لبِرل معاشی پالیسی دی نفی ہوندی اے۔
دنیا دیاں وڈیاں معیشتاں نے معاشی لبِرل پالیسی نُوں اختیار کیتی رکھیا تے اوہدے راہیں اوہناں معاشی ترقی وی کیتی تے ٹیکنالوجی دا حصول وی اسان بنایا۔ سانوں سبھ توں پہلاں معاشی قلعہ بنناہووے گا اپنی اقتصادی حالت نُوں سُدھارنا پوے گا پہلاں اپنے گھر نُوں سُدھاریے ایس ملک نُوں پیَراں اُتے کھلونا پوے گا تے فیر اسیں دوجیاں لئی کجھ کرن دے قابل ہو سکاں گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels