Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> جیس پاسے پیسے دا روڑھ اوسے پاسے بھلک

جیس پاسے پیسے دا روڑھ اوسے پاسے بھلک

August 10th, 2012
2.5 / 5 (2 Votes)

سماج وچ ہوون والیاں ادلا بدلیاں دا مہاڑ ویکھن لئی کہیا جاندا ہے جو ایہہ ویکھو کہ پیسہ کیس پاسے جا رہیا ہے۔ جیس طرحاں پانی سدا نیویں تھاں ول وگدا ہے ایسے طرحاں دولت پیسے دی شکل وچ یا بندے دی کرت دے روپ وچ اوسے پاسے جاندی ہے جتھے لابھ ودھ ہووے۔ ایس مڈھلے اصول ول تن خبراں پڑھ کے دھیان گیا۔ اک تے ایہہ سی جو ہندوستان نے پاکستانی سرمایہ کاراں نوں اپنے ملک وچ پیسہ لاون دی اجازت دے دتی ہے ، دوجی ایہہ جو چترال دے بیروزگار نوجوان افغان نیشنل فوج وچ بھرتی ہو رہے ہین تے تریجے عمران خان دی پارٹی دا دعوی جو مسلم لیگ (ن) دے اعتراض مگروں شوکت خانم ہسپتال نوں اک دن وچ اوہنے عطیے ملے جنے تن مہینیاں وچ ملدے سن۔

اہناں تناں خبراں وچ سانجھ ول اسیں پھیر پرت کے آواں گے پہلاں پاکستانیاں دی ہندوستان وچ سرمایہ کاری تے جھات پائیے۔ ہندوستانی سرمایہ کار پاکستانیاں نالوں کئی گنا بہتے تے وڈھے ہین ، ہونا تے ایہہ چاہیدا سی جو اوہ پاکستان وچ سرمایہ کاری لئی اتاولے ہوندے۔ پاکستان دی اٹھاراں کروڑ دی مارکیٹ چوکھی وڈھی ہے۔ پر جدوں دوہاں ملکاں وچ بیوپار تے وچار اٹاندرا ہو رہیا سی تے ایہہ گل صاف ہوگئی سی جو میاں منشا دی اگوائی وچ پاکستان دے وڈھے امیر ہندوستان وچ سرمایہ کاری کرن لئی کلہہ رہے ہین۔ ایہہ وی پتہ چلیا جو حکومت نوں جنرل کیانی کولوں ہندوستان نال بیوپار کھولن دی اجازت ایس سرمایہ کار گروپ نے دوائی سی۔

تہاڈے ذہن وچ ایہہ سوال کُلبل خُلبل کر رہیا ہوے گا جو پاکستانی سرمایہ داراں کول ایناں دھن کتھوں آگیا؟ اسیں تہانوں اک شعبے دی مثال دینے ہاں۔ پچھلے دناں وچ خبر آئی سی جو پاکستان دا بینکاری دا شعبہ منافع خوری وچ دنیا وچ چوتھے نمبر تےہے۔ بھکھے پاکستان وچ بینکاری وچ اینا وادھو منافع ایس لئی ہے جو سرکار نے بینکاراں نوں لُٹ مار دی اجازت دتی ہوئی ہے۔ میاں منشا مسلم کمرشل بینک دے مالک ہین تے ظاہر ہے اوہناں نے وی ان مونہا مال کمایا ہے۔ اسیں میاں منشا دی ایویں مثال دے رہے کیوں جو اوہ ایس کم وچ کلے نہیں: ہزاراں نے وکھ وکھ شعبیاں وچ ارباں کمایا ہے۔

ہُن سوال پیدا ہوندا ہے جو پاکستان وچ جمع کیتا وادھو سرمایہ کتھے جاوے؟ جے ملک وچ بجلی گیس تے پانی نہ ہوون تے ہر پاسے انارکی ہووے تے اوس ملک وچ سرمایہ کاری کون کرے؟ نویں سرمایہ کاری دی گل چھڈو اک سروے مطابق پاکستان دی چالیہہ فیصد ٹیکسٹائل انڈسٹری پہلاں ہی بنگلہ دیش جا چکی ہے۔ پاکستان وچ ودھدے نسلی تے علاقائی پاڑیاں توں گھٹو گھٹ پنجاب دے سرمایہ دار نے ایہہ نتیجہ کڈھ لیا ہے جو پاکستان وچ گھبلے پنجاب دے ڈیڑھ درجن ضلعیاں وچ ہی ترقی ہو رہی ہے تے ایہو اوسدی پکی منڈی ہے جیہڑی کہ بڑی نکی ہے۔ دوجا ایہہ وی جو سرمایہ داراں نوں دوجیاں صوبیاں توں گیس، پ]ٹرول تے ہور خال مال تے وی اعتبار نہیں۔ اہناں پکھاں توں ویکھو تے پنجابی (شاید براستہ بمبئی کراچی والیاں لئی وی) سرمایہ دار لئی ہندوستان دی منڈی بہتی نیڑے ہے۔ جے پاکستان دا سرمایہ دار اپنی بھلک دا بچا ہندوسستان وچ لبھ رہیا تے اوسدے بڑے انوکھے سٹے نکلن گے۔

ہن چترال دے بیروزگار جواناں ول آؤ جیہڑے افغان فوج وچ بھرتی ہو رہے ہین۔ ظاہر گل ہے جو چترال دے جواناں کول منافعے لئی وافر سرمایہ تے ہے نہیں ، اوہناں کول چھڑا محنت دا سرمایہ ہے جیس نوں اوہ ویچ رہے ہین۔ جدوں ایس سرمایے دی کھپت پاکستان وچ نہیں ہوندی تے اوہ افغانستان وچ پناہ لیندا ہے۔ جے پاکستان دے حال اِنج ہی رہے تے ایہہ وی کوئی اچنبھا نہیں ہووے گا جو سرحد تے ملک دے ہور علاقیاں دے جوان افغان فوج وچ بھرتی لئی پہنچ جاون۔ اہناں دو مثالاں توں ایہہ نتر رہیا ہلے جو پاکستان دے امیراں توں لا غریباں تیکر دا پاکستان تے اعتبار نہیں رہیا۔

ہُن ایسے اصول نوں تحریک انصاف تے مسلم لیگ (ن) تے لا کےویکھو۔ امریکہ وچ ہر الیکشن توں پہلاں ایہہ ویکھیا جاندا جو کیس پارٹی یا امیدوار نوں بہتا چندہ مل رہیا۔ عام طور تے ایس دوڑ وچ جتن والا ہی الیکشن جتدا ہے۔ جے تحریک انصاف دا ایہہ دعوی سچ ہے جو مسلم لیگ دے ورودھی پراپیگنڈے مگروں شوکت خانم ہسپتال نوں اک دن وچ اونا چندہ ملیا جنا تن مہینیاں وچ ملدا سی تے ایہہ بڑی سوکھ نال کہیا جا سکدا ہے جو عمران خان دی جت بھٹو ورگی ہووے گی تے ہر پارٹی اوسدے مقابلے وچ ہارے گی۔ یاد رکھو کسے نوں ؛پیسہ دینا بڑا مشکل کم ہے تے ایہہ اوتھے ہی دتا جاندا ہے جتھے کوئی مستقبل ہووے۔ ایہہ ہندوستان دی مازرکیٹ ہووے یا شوکت خانم ہسپتال۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels