Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> پاک ہند بیوپار وچ امریکی اڑکا؟

پاک ہند بیوپار وچ امریکی اڑکا؟

May 13th, 2012
4 / 5 (1 Votes)

انج تے ایہہ کہن نوں وی عجب لگدا ہے جو امریکہ پاک ہند بیوپار وچ ڈکا لاون دے گجھے جتن کر رہیا ہے کیوں جو پچھلے کجھ چر تیکر امریکہ ٹل لا رہیا سی جو دوہاں ملکاں دے سانگے پدھرے ہوون ، پاکستانی فوجاں مشرق دی سرحد توں ویہلیاں ہوجاون تے اوہ پورا زور مغرب وچ طالبان تے القاعدہ نوں مکاون لئی لاون۔ پر ہُن لگدا ہے جو امریکہ نراس ہو چکیا تے اوس متھ لیا ہے جو کجھ وی ہو جاوے پاکستانی فوج نے حقانی نیٹ ورک تے دوجے طالبان تے القاعدہ گروپاں نوں مکاونا نہیں۔ ایس لئی امریکہ نوں ہُن نہ صرف پاک ہند ایکتا نال کوئی دلچسپی نہیں سگوں اوہ پاکستان نوں ایران طرحاں ہور اکلیاں کرکے اوسدا معاشی ساہ گھٹنا چاہندا ہے۔

جدوں صدر زرداری دے دورے توں کجھ دن پہلاں امریکیاں حافظ سعید دے سر دا مُل لایا تے اوسدا اعلان وی ہندوستان توں کیتا تے گل سمجھ نہیں سی آئی جو امریکہ ایہہ کیوں کر رہیا ہے۔ پر ہُن جدوں دوہاں ملکاں وچ بیوپار کھلن دے لاگے ہے تے امریکی وزیر خارجہ نے ہندوستان دے دورے وچ پاک ہند ودھدے بیوپار نوں باالکل سلاہیا نہیں ۔ سگوں اوہناں رج کے پاکستان تے ٹوکاں ماریاں تے اک طرحاں ہندوستان نوں ہُچھکایا جو اوہ حافظ سعید والے جھیڑے دے مُکن توں پہلاں پاکستان نال سانگے پدھرے نہ کرے۔

پاکستان نوں وی جد تیکر امریکہ ہندوستان نال سانگے پدھرے کرن دا آکھدا رہیا اوس نے نہیں کیتے۔ جدوں امریکہ نال وگاڑ ودھیا، معاشی ناکہ بندی ہونی شروع ہو گئی تے پاکستان نے یک دم ہندوستان نوں موسٹ فیورڈ نیشن دا درجہ دے دتا، بیوپار لئی نویں گیٹ کھول دتے تے ہندوستانی وستاں توں سال دے اخیر تیکر روکاں چُکن دا اعلان کر دتا۔ ظاہر گل ہے جو پاکستان نے ایہہ فیصلے ایس لئی وی کیتے جو جے امریکہ تے نیٹو دے کئی درجن ملک اوس تے روکاں لا دیون تے اوس کول بیوپار دے دوجے راہ ہوون جنہاں وچوں سب توں ودھ ہندوستان ہے۔ پاکستان دے سرمایہ داراں دی ایہہ منگ سی پر اوہناں دی تے ایہہ منگ پرانی سی جیہڑی امریکہ نال پھڈا پین توں مگروں پوری کیتی گئی۔

امریکیاں اندروں پاکستان نال بڑی خار کھاہدی ہوئی ہے، وچوں عام امریکی تے کانگرس۔ سینٹ پاکستان نوں دشمن ملک سمجھدے ہین جیس نے اوسامہ نوں لکائی رکھیا تے جیہڑا امریکی دشمن حقانی نیٹ ورک نوں پناہ دتی بیٹھا ہے۔ اوس دا ڈروناں دے خلاف شرط لاونا وی امریکیاں دی نظر وچ طالبان نوں وزیرستان وچ بچاون والی گل ہے۔ پاکستان نے نیٹو دی سپلائی بند کرکے اپنے ملک وچ امریکیاں دا رہندا کھوہندا لابھ وی مکا دتا۔ امریکی پاکستان نال سانگے کنک تے چاول خریدن لئی نہیں بناوندے سن، ایہہ پاکستان دی زمین تے اوس دے رستیاں نوں ورتن لئی کردے سن۔ تے جے پاکستان امریکہ نوں رستہ وی نہ دیوے تے امریکیاں پاکستان دی یاری توں کیہہ لینا؟ سگوں اوہ پاکستان نوں اپنا دشمن منے گا جیہڑا اوس نوں افغانستان وچ ہراون دا سبب بن رہیا ہے۔

کوئی اک سال توں امریکیاں پاکستان نوں سجن سمجھنا بند کردتا ہویا اے تے اوہ پاکستان نوں کوڑا سبق سکھاون دی راہ لبھ رہے ہین۔ ایسے لئی امریکہ نے نہ تے سلالسہ حملے تے معافی منگی تے نہ ہی ڈرون حملے بند کیتے۔ ہُن نیٹو نے وی اعلان کر دتا ہے جو اوہ پاکستان نوں شکاگو وچ افغانستان وچ ہوون والی کانفرنس وچ نہیں بلا رہی ہے۔ مطلب نیٹو تے امریکہ نے پاکستان نوں افغانستان دے مسئلے دے حل توں باہر کڈھ دتا ہے۔ جیس دا مطلب ہے جو ہُن امریکہ تے نیٹو پاکستان نوں سجن گھٹ تے دشمن بہتا سمجھدے ہین۔ جے ایہہ گل انج ہی ہے تے ایہہ اتحادی پاکستان دا کنج نقصان کر سکدے ہین؟

ظاہر گل ہے امریکہ تے نیٹو تھوڑی کیتے پاکستان تے حملہ تے کر نہیں سکدے، اوہ اوس دی ایران طرحاں معاشی ناکہ بندی کرن دے جتن کر سکدے ہین۔ امریکی پاکستان دی ناکہ بندی ایران دی وجہ توں وی کرن دا سوچ سکدے ہین کیوں جو پاکستان ایران نال بیوپار سانگے ودھا رہیا ہے۔ ایسے ہی طرحاں امریکہ تے نیٹو پاکستان نوں ہندوستان نال بیوپار ودھا کے ناکہ بندی توڑن دے خلاف ہوون گے۔ جے پاکستان اگلے کجھ دناں وچ نیٹو سپلائی نہیں کھولدا تے پھیر امریکی تے نیٹو کھل کھلا کے پاک ہند بیوپار وچ اڑکے پاون دے جتن ودھا دیون گے۔

ایس دا ایہہ مطلب نہیں جو ہندوستان اوہناں دی من وی لوے گا کیوں جو ہندوستان اپنیاں پالیسیاں بناون وچ کجھ کجھ آزاد ہے۔ پر ہندوستان پاکستان کولوں ہور ودھیرے منگاں کرے گا تے ہو سکدا ہے جو پاکستان نوں حافظ سعید دی قربانی دینی پے جاوے۔ پر پاکستان نوں کجھ نہ کجھ وکھرا کرنا پوے گا۔۔صرف ہندوستان نوں موسٹ فیورڈ نیشن دا درجہ دے کے اوہ امریکہ تے نیٹو دی کیتی معاشی ناکہ بندی نہیں توڑ سکدا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels