Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> نواں پنڈ: بیالی لکھ دی مسیت تے ودھدے شرابی تے نشئی

نواں پنڈ: بیالی لکھ دی مسیت تے ودھدے شرابی تے نشئی

March 5th, 2012
4 / 5 (1 Votes)

میرا پنڈ کافی حد تائیں پاکستانی سماج تے اوسدی سیاست دا لشکارا دیندا ہے۔ سیاسی پکھ توں تے ۱۹۷۰ توں لے کے ہُن تیکر  جیہڑی  پارٹی ایس پنڈ توں الیکشن جتی ہے اوہ ہی پورے پنجاب وچ اتے آئی ہے۔ مطلب ایہہ پنڈ اگردے الاراں  (رجحاناں) دا لشکارا دیندا ہے تے اوہ شاید ایس لئی جو پنڈ دی وڈھی گنتی تھوڑا بہت پڑھی لکھی ہے تے تھلڑی پدھر دے وچلے میل دی ہے۔
جدوں تیکر پیپلز پارٹی پنجاب تے چھائی رہی اوہو ایتھوں جتدی رہی تے جدوں دی مسلم لیگ (ن) دی چڑھت ہوئی ہے پیپلز پارٹی دے امیدواراں نوں ووٹ نہیں ملدے۔پچھلے الیکشن وچ پیپلز پارٹی دا امیدوار اوسے ذات دا سی جو ایس پنڈ دے لوکاں دی ہے پر اوس نوں سب توں گھٹ ووٹ ملے۔ مطلب ایتھے برادری دی تھاں سیاسی لہر بہتا کم وکھاوندی ہے۔ اینی لمی چوڑی پچھان دی گل ایس لئی کیتی جو اسیں ایس پنڈ وچ پچھلے چالیہہ سالاں توں آون والیاں ادلیاں بدلیاں توں پاکستان دے بھلک دے بارے گل کرنا چاہندے ہاں۔
پنڈ وچ ہنے ہنے بیاسی لکھ لا کے نویں نکور مسیت بنائی گئی ہے: پنڈ دی مسیت تے اینی رقم خرچ کرنا نکی جیہی گل نہیں۔ اُنج تے پنجاہ دے دہاکے وچ جدوں شہر دیاں مسیتاں وچ وی لاؤڈ سپکیر نہیں سی ہوندا ایس پنڈ وچ خبہت تے اذان لاؤڈ سپیکر تے ہوندی سی۔ ہُن تے شیعاں دی امام بارہ گاہ وی شان شاوکت وچ مسیت دا مقابلہ کردی ہے۔ مکدی گل جو مذہبی روں وچ وادھا ہویا ہے۔
پر مذہبی روں  (رجحان) دا وادھا سماجی بنتر دا اک پکھ ہے۔ بہت سارے انٹرویو تے کاہڈ نال ایہہ گل وی کُھل کے سامنے آئی جو ہُن چھڑے مرد ہی نہیں کئی درجن زنانیاں وی شراب دا شغل کردیاں ہین۔ سٹھ دے دہاکے تیکر زنانیاں دا شراب پین دا کوئی تصور ہی نہیں سی۔ زنانیاں ودھ توں ودھ حقہ پی لیندیاں سن۔ مرداں وچ کجھ دو چار ہوندے سن جیہڑے شراب، بھنگ تے افیم ورتن لئی بدنام ہوندے سن۔ ہُن صورت بڑی بدل گئی ہے۔پنڈ وچ زنانیاں دی شراب دی ورتوں سماج وچ مڈھلی بدلی دی سینت ہے۔
اہناں سماجی ادلا بدلیاں دے  معاشی کارن ہین۔ ہُن واہی بیجی دا پورا نظام مشینی ہو گیا ہے تے آپ پالن ہار (خود کفیل) پنڈ مُک گیا ہے۔ پہلاں تھوڑیاں جیہیاں شیواں نوں چھڈ کے ہر شے پنڈ وچ پیدا ہوندی تے تیار کیتی جاندی سی ہُن ہر جنس پنڈ دے ورتن لئی شہر دی منڈی لئی پیدا کیتی جاندی ہے۔ پنڈ دے ہر پیداوار شہر دی منڈی جاندی ہے تے لوڑ دی ہر شے شہر توں لیا کے پنڈ وچ وکدی ہے۔ ہُن کوئی اجیہی چیز نہیں جیہڑی لاہور وچ وکدی ہووے تے ایس پنڈ دیاں ہٹیاں تے نہ ہووے۔
زمیناں تے کم کرن والیاں تے پنڈ دے دستکاراں  دی محنت پہلاں طرحاں جنساں وچ نہیں پیسیاں وچ ادا کیتی جاندی ہے۔ فصلاں تے محنت دا پوری طرحاں پیسے دے نظام وچ آجان نال لوکاں دے آپسی سانگے وی پوری طرحاں بدل گئے ہین۔ دولت دے ایس نویں سانچے وچ  میلاں (طبقیاں) دی درجہ بندی وی بہت  اتے تھلے ہو چکی ہے۔ پچھلے واریاں دے بہت ہی غریب ٹبر ہُن کھاندے پیندے لوکاں وچ رلتی ہین تے کل دے دستکار جنہاں نوں کمی دا گھٹیا درجہ دتا جاندا سی ہُن پنڈ دے ساؤ ٹبراں وچ گنے جاندے ہین۔طبقیاں دی ایس اتھل پتھل نے سماج نوں جڑاں توں ہلا  چھڈیا ہے۔
مشینی پیداوار تے زر دے نظام دی پوری جکڑ نال جتھے سوکھ ودھی ہے اوتھے ہی دماغی بے وساہی وچ وی کئی گنا  وادھا ہویا ہے۔ اگے ودھن ، پچھے رہ جان دے ڈر تے پیسہ کماون دا سودا اینا ودھ گیا ہے جو ہُن ہر سال پنڈ دے نوجواناں وچ ہارٹ  اٹیک نال مرن والیاں دی گنتی ودھدی جا رہی ہے۔ پنڈ وچ جوان بندیاں دے مرن دا کدی سنن وچ ہی نہیں سی آیا تے اوہ وی ہارٹ اٹیک نال۔ مطلب نویں زمانے دی بے وساہی نے دماغی دبا ودھا کے جیون مرن دے مڈھلے پیمانیاں نوں وی بدل دتا ہے۔
خورے ایہو بے وساہی کجھ  لوکاں نوں مذہب تے پیراں ول وی دھک رہی ہے تے اوہناں وچوں کجھ نوں نشیاں وچ سکھ لین تے وی مجبور کر رہی ہے۔ مشینی پیداوار تے نویں پیسے دے نظام نال نجٹھن لئی سماج وچ دماغی طاقتاں تے ادارے نہیں ہین۔ ایس دی روز ورتارے وچوں مثال دنیا چاہو تے اوہ ایہہ ہے جو پنڈ وچ نویں طرز دے باتھ روم تے بن گئے ہین پر گندے پانی نوں کڈھن دا کوئی پربندھ نہیں ہے: گندہ پانی گلیاں وچ کھلوتا  بو ماردا رہندا۔ سماج تے ریاست دے پرانے ادارے کسے کم جوگ نہیں رہے تے نویں ادارے اجے بنے نہیں۔ایس دا صاف لشکارا سیاسی پدھر تے نظر آوندا جتھے فوج تے روایتی پارٹیاں پرانے بُسے ہوئے وچار ورت کے لوکاں نوں لُٹ رہیاں ہین۔


Share |


 

Depacco.com


 

 

Visitors Comments

Name:Nadir Ali
Date:5th March

Comment: Aes mazmoon vich koee aesi gal nahin jerri saaday paidu ya shehri siasi raon baray kuj dasay .
a)Saday tay tay tuhaday pind vich rehtal taqriban iko
jehi hay . Saday bahar gaey lok vadh han thorray .
b)Saday aksariat People Party nun vote pandi rehi ay
Aetki zahir hay nahin paey gi .
c)Saday pind 104 munday lok vich tay bahar ,
computer vartaday han . Oh sab Imran Khan day
hamaiti han .Imran Khan phir bhi nahin jitay ga .
Eh eaislay Fauj tay Chachay Sam day han .
d)Fauj pehli vari kuj phasi ay ,par aj ?


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels