Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ملاں دا نواں پیسہ بناؤ انٹرٹینمٹ ورگا پیشہ

ملاں دا نواں پیسہ بناؤ انٹرٹینمٹ ورگا پیشہ

February 23rd, 2012
5 / 5 (1 Votes)

بہت سارے لکھاری تے سوجھوان غلطی نال مولویاں نوں پاکستانی ریاست دا سیپی یا کمی سمجھدے ہین۔ جے گوہ نال ایکھو تے ایہہ گل پوری طرحاں ٹھیک نہیں۔ ریاست وی مولویاں نوں ورتدی تے اوہناں نوں مال کھواندی ہے پر نویں مشینی تے بیوپاری سماج وچ مولوی پیشہ وی بہتا کماؤ تے مالدار ہو گیا ہے۔ ایس لئی مذہبی تحریکاں نوں ہُن نویں ڈھنگ نال ویکھن دی لوڑ ہے تاں جو ایس پیشے بارے قانون تے اصول بنائے جا سکن۔
 مذہبی جماعتاں دے آگو تے دوجے سیانے مولوی  بہت سارے کاروباراں وچ کافی اگے ودھ گئے ہین۔ مثال دے طور تے پرانے زمانے دے نامور سیاسی مولوی جیویں مولانا مفتی محمود ، مولانا مودودی یا میاں طفیل محمد کوئی کاروباری لوک نہیں سن۔ پر اج مولانا فضل الرحمن توں لے کے قاضی حسین احمدتے لیاقت بلوچ تیکر امیر کاروباری لوک ہین۔ ایسے لئی اوہناں دا معیشت تے ریاست نال تعلق وی بدل گیا ہے۔ ہن  اوہ صرف اسلامی نظریے لئی ہی سیاست نہیں کردے سگوں اپنے کاروباراں دے ودھا لئی وی سیاسی میدان وچ لڑدے ہین۔ مذہبی پارٹیاں وچ سیاسی دوڑ صرف فرقہ پرستی پاروں ہی نہیں ہے، سگوں مولویاں  دیاں بہت ساریاں ستھاں فقہ پرستی نوں سیاسی اثر ودھاون لئی ورتدے ہین جیہڑا اوہناں دے کاروباراں وچ امداد کردا ہے۔ رپورٹاں موجب تے کراچی ورگے شہر وچ مولوی ستھاں بھتہ خوری وی کردیاں ہین۔
ساڈے سوجھواناں بدلدے زمانے وچ مذہبی لوکاں دے کردار وچ آئی بدلی تے اوس دے کارناں تے گوہ نہیں کیتا۔ کجھ تریہہ چالیہہ سال پہلاں جدوں کنک دا بوہل تیار ہوندا سی تے اوس وچوں سب کمیاں (لوہار، ترکھان، کمہار وغیرہ) دا حصہ نکلدا سی۔ اہناں کمی دستکاراں دے نال پنڈ دے مولوی دے دانے وی کڈھے جاندے سن۔ ہُن پنڈ وچ مشینی واہی بیجی تے پیسے داوتارا ہے، ہن باقی کمیاں وانگ مولوی دے دانے وی نہیں کڈھے جاندے۔ جیویں پنڈاں وچ کل دے کمی (جنہاں نوں سیپی کہیا جاندا سی) اج دے بیوپاری، ہٹی وان تے ٹیکنیشنز بن گئے ہین، انج ہی مولوی وی اجیہا پیشہ ور بن گیا ہے جیہڑا اپنی محنت ویچدا ہے تے اوسدی قیمت وصولدا  سوکھا تے امیر ہو گیاہے۔
سیپ دا نظام دوجی تریجی صدی وچ موریہ راجیاں دے زمانے وچ شروع ہویا سی۔ ایس نظام وچ ہر پنڈ وچ لازم سی جو اوہ اٹھ توں باراں دستکار رکھے  جان تے اوہناں  دی محنت چھ ماہی یا ورہے وار دتی جاوے۔ پنڈاں وچ اہناں سیپیاں لئی وکھرے محلے وی بنائے جاندے سن تے پنڈ دے نال اک اک دو دو کلے زمین وی دتی جاندی سی۔ مولوی، پنڈت یا بھائی وی اہناں سیپیاں وچوں ہوندے سن ۔ پر ایس نظام وچ واہی بیجی لکڑ دے ہل تے ڈھگیاں نال ہوندی سی تے ہر کم کراں پیراں نال کرنا پیندا سی۔
 آپو وچ لین دین وی جنس وٹاندرے نال ہی ہوندا سی۔ ایس نظام دے پیداواری اوزار ہی ایس دے سماجی ساکاں دی نیہہ (بنیاد) سن۔ جد ہل ڈھگے دی تھاں ٹریکٹر آگئے تے کراں پیراں دی تھاں مشیناں لے لئی تے سماجی ورتارا وی بدل گیا۔ جنساں دا وٹاندرا مک گیا تے ہر اک دی محنت پیسیاں وچ ادا ہونی شروع ہو گئی۔ ایہہ ہے مشین تے پیسے دا اوہ نظام جیس نے پرانے ورتارے دی تھاں لئی ہے۔ ظاہر گل ہے ایس نظام وچ مولوی دا پیشہ وی بدل گیا ہے ۔
جیویں باقی کمی سیپ توں آزاد ہوکے ترقی کردے کاروباری تے چنگے حالاں وچ ہوگئے ہین اوسے طرحاں مولوی وی  پیسے ولوں سوکھا ہو گیا ہے۔ بدلدے مشینی تے کاروباری سماج وچ نویں دولت پیدا ہوئی ہے جیہڑی اتوں تھلے تیکر گئی ہے۔ ہُن نواں دولت مند تے سوکھا طبقہ مذہبی رسماں تے ودھیر خرچ کرن لگ پیا ہے۔ پہلاں نیانے مسیت وچ مفت  قرآن پڑھن جاندے سن پر ہُن مولوی صاحبان نیانے نوں گھراں وچ  پڑھاون جاندے ہین تے چوکھی ٹیویشن وی لیندے ہین۔ ایس مد وچ ہر نکے وڈھے ملاں  نوں چنگا چوکھا روزگار مل گیا ہے تے اوہ باقیاں وانگ ہی سوکھ ہنڈان لگ پیا ہے۔
 پھیر بہت سارے کھاندے پیندے لوک (جنہاں دی گنتی کروڑاں وچ ہے) خاص موقعیاں تے مجلساں کرواندے ہین تے اک اک تقریر دے ہزاراں تے لکھاں ادا کردے ہین۔کیاں پکھاں توں مولوی وی انٹرٹینمنٹ انڈسٹری دے لوکاں طرحاں ہی ہے جیہڑے پچھلے ویہہ ورہیاں وچ  چنگے بھلے امیر ہوئے ہین۔  ایس نال مولویاں دا اک  اپنا امیر طبقہ وی جمیا ہے جیہڑا کافی وڈھا ہے تے اوس نوں اپنی کاریگری ویچن لئی کسے دی لوڑ نہیں۔ اوسدی  حیثیت ایکٹراں ، ڈائریکٹراں ، ٹاک شو ہوسٹاں تے پروڈیسراں طرحاں ہی ہے تے اوہناں جنا ہی امیر وی ہے۔


 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels