Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ساڈا دشمن کون؟ باہرلے یا اندرلے؟

ساڈا دشمن کون؟ باہرلے یا اندرلے؟

August 16th, 2011
5 / 5 (2 Votes)

مشرق وسطی دے حاکماں وانگ ساڈی وی وچلی تے اصلی سرکارلوکاں  دا دھیان بھیڑے راج، سیاسی پھردول، تے سیاسی سماجی ٹٹ بھج توں ہٹاون لئی کسے باہر والی طاقت  مطلب امریکہ دے خلاف  چکدی رہندی ہے۔ پر جدوں تیونس، مصر، شام تے انج دیاں ملکاں دے لوک جاگ پین تے پھیر اوہناں دیاں اکھاں توں  کھوپے  (یا پردے)لتھ جاندے ہین۔ پاکستان وچ  ہوندی ٹٹ بھج نوں ویکھ کے لگدا ہے جو اوہ ویلا چھیتی آون والا ہے۔
ایہہ جاچن تے نکھیڑ کرن والی گل ہے جو اسیں ویکھئیے جو پاکستان دے گھروکے مسلیاں وچ باہرلیاں دا کنا اک ہتھ ہے۔ ایس لئی اسیں تھلے پاکستان دے  سب توں وڈے تے موٹے موٹے مسلیاں دا خلاصہ دے رہے ہاں تے ویکھنا ہے جو اہناں دا باہر نال کوئی سانگا ہے یا نہیں؟
اک: پاکستان وچ گھروکی قرضے دا ڈھیر پہاڑ جیڈا ہو گیا ہے، ایس قرضے لئی سٹیٹ بینک نے نوٹ چھاپے تے ہر شے دیاں قیمتاں اسمان نال جا لگیاں۔ اہناں قیمتاں نے معیشت دے ہر سیکٹر دا بیڑا ڈوبیا ہویا ہے۔
دو۔ اک تے پاکستان وچ بجلی، پٹرول ڈیزل ، گیس تے پانی انج ہی ملدا نہیں تے جے مل وی جاوے تے بہت مہنگا۔ ایس نال پاکستانی صنعتاں وچ  دی پیداواری لاگت اینی ودھ گئی ہے جو اوہ جگت منڈی وچ دوجیاں ملکاں دا مقابلہ ہی نہیں کر سکدیاں۔ ایس نال بیروزگاری تے غربت دنوں دن ودھ رہی ہے۔
تن۔ پاکستان دی آبادی  دا وادھا دنیا بھر وچ چوٹی تے ہے۔ چالیاں سالاں وچ آبادی چار گنا ہو گئی ہے۔ ایس دے نال نال شہراں ول نسن والیاں دی گنتی ست سو فیصد ہے جدوں شہراں وچ  سڑکاں تے ہور سہولتاں وچ کوئی خاص وادھا نہیں ہوئیا۔
چار۔ جہاد، مارا ماری، لا قانونی، وڈھی ، ٹبرپالی تے سیاسی انارکی سخراں تے ہین۔ سیاست کجھ ٹبراں دے مافیاواں دا  دھندا رہ گیا ہے تے ایہہ سب کجھ فوج دی رلتی نال ہو رہیا ہے
پنج۔ پاکستان دی ریاست شہریاں نوں مڈھلیاں سہولتاں (علاج، تعلیم)وی نہیں دے سکدی۔ سگوں گندے پانی نال بیماریاں  پھیلر رہیاں نیں تے  چھتالی فیصد لوک ہیپا ٹائس دے روگی ہین۔
کسے ملک نوں تباہ کرن وچ اہناں پنجاں پکھاں وچوں اک وی کافی ہوندا۔ اہناں پنجاں وچ ہی باہرلیاں ہتھ نہیں ہو سکدا۔ پر اسیں پھیر وی اہناں پنج پکھاں دے پچھے کارناں تے چانن پاکے ویکھنے چاہنے آں جے ایتھے باہرلیاں دا کوئی حصہ ہے یا ایہہ بلاواں اسیں آپے ہی پالیاں ہویاں نیں۔
اک۔ پاکستان وچ گھروکی تے باہر دے قرضے دا پہاڑ لوڑوں ودھ کھلے خرچے کرکے ودھیا جدوں کہ ریاست دی اونی آمدن نہیں۔ اہناں قرضیاں وچوں سب توں وڈھا ہتھ بنا لوڑیندا فوجی بجٹ ، حاکماں دے عیش، تے وڈھی چیرا ہے۔ اہناں نال ایہہ وی جو ملک دے سب توں اچی آمدن والے دس فیصد لوک انکم ٹیکس ہی نہیں دیندے۔ ہر ملک لوکاں دے ٹیکساں نال چلدا تے ایہہ مڈھلا قانون ہے۔ سو کیہہ اسیں اپنے اہناں قرضیاں لئی کسے باہرلے نوں مندا کہہ سکنے ہاں؟
ملک وچ ودھدی مہنگائی دی اک وجہ اوہ معاشی ماڈل وی ہے جو جنرل مشرف دے معاشی پربندھکاں ایہہ سوچ کے لایا جو ترقی منگاں ودھا کے ہو سکدی ہے  تے اوس لئی بینکاں نوں کہیا انھے واہ قرضے دئی جاؤ۔ نوٹ چھاپ چھاپ کے ڈھیر لا دتے جان تے پھیر مہنگائی نہیں ودھے گی تے کیہہ ہووے گا؟

دو۔ لوڑ دیاں مڈھلیاں شیواں دی تھوڑ، بھیڑے راج، ٹبر پالی تے آبادی دے وادھے نال  پیدا ہوئی ہے۔ جے سرکار وی نالائق ہووے  تے ابی سو ستر دی چھ کروڑ دی آبادی دو ہزار گیاراں وچ انّی کروڑ ہوجاوے  تے تھوڑاں نہیں ودھن گیا تے ہور کیہہ ہووے گا؟ کیہہ اسیں سرکار دی نالائقی تے آبادی دے ہڑ دی ذمے واری کسے ہور تے پا دئیے؟

تن۔آبادی دا ہڑ فوج دے مذہبی مڈھ پرستی ودھان نال آیا ہے۔ ہر سرکاراں ملوٹیاں نوں خوش رکھن لئی ایس مسئلے تے دڑ وٹ لیندی ہے۔ اسیں ایتھے سعودی عرب توں آئی وہابیت نوں ملزم بنا سکنے ہاں پر گل جچدی نہیں۔

چار۔  مارا ماری وچ مرن والیاں دی ودیری گنتی دے اک حصے لئی اسیں امریکہ تے ملبہ پا سکنے ہاں۔ پر جے گوہ نال ویکھیا جاوے تے کراچی تے ملک دے دوجیاں حصیاں وچ  جنے بندے مارا ماری وچ ،ردے ہیں اونے تے نہ  پاک افغان سرحد تے وی نہیں مردے جتھے دی جنگ دا رولا سارے جہان وچ ہے۔فرقہ پرستی، آدر لئی مارنا تے بے قانونی پاروں مرن والیاں نوں وچ جوڑ لوو تے دہشت گردی دی جنگ وچ مرن والیاں گنتی دانیاں دے ڈھیر وچ اک پھکا ہووے گی۔ مجمعے ہتھوں مارے جانا (توہین رسالت پاروں) سیکورٹی ایجنسیاں تے  حملے وی ایسے کھتے وچ رلاؤ۔ تے آپ ہتیا وی مارا ماری دے خانے وچ ہی آوندی ہے  فرق اینا ہے جو ایتھے مارن والی غریبی ہوندی ہے۔  ایس کرکے جے امریکہ تے مرن دا مدعا پا وی دیوئیے تے اوہ بس اک نکا جیہا پکھ ہی ہووے گا۔
پنج۔ لوکاں نوں پڑھائی تے علاج جہیاں سہولتاں نہ ملن دا وی باہرلیاں نال کوئی سانگا نہیں۔ ایہہ حاکم میل تے ایجنڈے تے ہی نہیں۔ ادھے ملک نوں ہیپاٹاٹئس ہویا اے پر گندے پانی دے کڈھن ول کوئی دھیان نہیں دیندا؟ ایہہ وی ساڈے لئی امریکی، چینی یا روسی کرن؟
ننگا مُنگا سچ ایہہ ہے جو پاکستان دیاں اوکھتاں دا کارن اوہدے اپنے کرتوت ہین تے اہناں دا یہود و ہنود و جن بھوت نال کوئی لینا دینا نہیں۔ ایہہ سب سچ پر ساڈے وچاروان، میڈیا تے سیاسی استاکار جتن کردے ہین جو ساڈا دھیان باہر رہوے۔ ایسے لئی امریکہ ساڈے ول مُنہ کرکے چھک وی مار دیوے  تے ساڈے سارے ٹاک شو اوس پچھے نس پیندے ہین تے جے اک دن وچ ویہہ بندے وی آپ ہتیا کرلین تے کوئی کُسکدا نہیں۔
پاکستان دے وچاروان خواباں دے دیس وچ رہندے نیں  جتھے اوہ ہر برائی دی جڑ باہرلے ملکاں نوں دس کے اپنے سماج دے اندر وں پیدا ہوندیاں بیماریاں دھیان جوگ ہی نہیں منندے۔ جنوبی کوریا ساڈے نالوں ودھ امریکہ دے  تھلے لگا ہویا کیوں جو اوتھے تے امریکی فوجاں بیٹھیاں ہویا نیں  پر پھیر وی اوہ اک صنعتی ملک بن گیا ہے۔ ساڈے تے کوریا وچ فرق اینا ہے جو اوہناں پیندی سٹے جاگیرداری مکا دتی تے اپنے ملک نوں اندروں ترقی دیون تے دھیان دتا۔ سگوں مشرقی ایشیا دے بہتے ملکاں ایہو کجھ ہی کیتا ہے تے صنعتی میداں وچ اگے ودھ گئے ہین۔ ویلا آگیا جو اسیں مسلیاں نوں سدھا ویکھئیے نہیں تے معاملے ہور خراب ہو جاون گے۔


Share |


 

Depacco.com


 

 

Visitors Comments

Name:Rizwan Khaliq
Date:16th August

Comment: تھوڑی جی اوکھی پنجابی لکھی اے پر گل سچی اے :-) ا


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels