Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> تاریخ وچ پہلی واری امریکہ دی کریڈٹ ریٹنگ گھٹا دتی گئی

تاریخ وچ پہلی واری امریکہ دی کریڈٹ ریٹنگ گھٹا دتی گئی

وچار ڈیسک
August 6th, 2011

کھرباں ڈالر دے ریاستی قرضیاں دے بھار تھلے امریکہ دی عالمی پدھر تے قرضے موڑن دی خوبی یاں درجہ بندی پہلی واری سب توں چنگی AAA توں گھٹا کے AA پلس کر دتی گئی ہے۔

سٹینڈرڈ اینڈ پورز ناں دی ریٹنگ ایجنسی نے امریکہ دی کریڈٹ ریٹنگ گھٹائی ہے۔ جھبدے ایہدے اثر ایہہ پیڻ گے پئی امریکی حکومت، کمپڻیاں تے عام ورتڻ والیاں نوں ہڻ پہلوں دے مقابلے وچ بہتی سود دی دُر تے قرضے ملڻ گے۔ ایس فیصلے نال چین وچ وی خطرے ابھر سکدے نیں، جیہڑا امریکی ریاستی قرضے دے اک ٹریلین ڈالر دا مالک ہے۔

اوباما پربندھی ایس کریڈٹ ریٹنگ ایجنسی توں بہتے خوش نہیں تے تے ایہدے تے ہدف بدلڻ دا الزام لاؤندی ہے۔ کریڈٹ ریٹنگ وچ کمی پاروں امریکی ریاستی قرضے وچ سو ارب ڈالر دا وادھا ہوسکدا ہے۔

پچھلے ہفتے وچ امریکی سیاستداناں نے لمی مکالمتی سلسلے دے مگروں اک سمجھوتے ہیٹھ ریاستی قرضیاں دی پہلوں توں موجود حد وچ دو اعشاریہ چار ٹریلین ڈالر دا وادھا کیتا سی۔ انج ایہدی حد 14 اعشاریہ 3 ٹریلین ڈالر تیکر ودھا دتی گئی سی۔

S&B ولوں جاری کیتے گئے اعلامیے وچ کہیا گیا ہے پئی امریکہ حکومت تے کانگریس جیہڑے منصوبے تے اک ہوئے نیں اوہ آساں موجب نہیں۔ کہیا جارہیا ہے پئی مڈٹرم مڈھ تے ریاستی قرضیاں دے معاملے نال نبڑن لئی ایس منصوبے وچ لوڑ موجب کاروائیاں نہیں دسیاں گئیاں۔

امریکی کانگریس وچ حکومتی خرچیاں وچ کمی تے محصول ودھاؤڻ بارے گرما گرم سیاسی کاروائیاں جاری نیں۔ امریکی صدر باراک اوباما ایس مہینے اک انج دے قانون دے مسودے تے دستخط کر چکے نیں، جیہدے راہیں اگلے دس سال وچ ریاستی قرضے وچ دو اعشاریہ اک ٹریلین ڈالر دی کمی ہوسکے گی۔ ایہدے الٹ S&B نے حکومتی خرچیاں وچ گھٹو گھٹ چار ٹریلین ڈالر دی بچت دی لوڑ ظاہر کیتی سی۔

وائٹ ہاؤس ولوں ایس نویں پیشرفت تے کوئی جواب حالی ظاہر نہیں کیتا گیا۔ امریکی پربندھیاں ولوں ایس لمے مالی مسئلے تے قابو نہ پا سکن پاروں پچھلے ہفتے بازار حصص وچ ریکارڈ مندی ویکھی گئی۔ ڈوؤ جونز انڈیکس وچ جمعے نوں یعنی کاروباری ہفتے دے چھیکڑلے دیہاڑے کل پنج اعشاریہ پچھتہر فیصد دی گراوٹ ویکھی گئی۔

ایس توں پہلوں جمعرات نوں انڈیکس وچ ریکارڈ چار اعشاریہ تن فیصد دی گراوٹ نوٹ کیتی گئی سی پر جمعے نوں امریکہ وچ نوکریاں بارے حساب دی چنگی خبر نے صورتحال نوں اک حد تیکر سنبھالیا۔ امریکی لیبر ڈیپارٹمنٹ موجب جولائی وچ نوکری دے اک لکھ توں بہتے موقعے پیدا کیتے گئے نیں۔ یورپ وچ وی صورتحال امریکہ ورگی ہی رہی۔ فرینکفرٹ تے لندن دے بازار حصص جمعہ نوں دو اعشاریہ ست فیصد دی گراوٹ تے بند ہوئے۔ یورو زون دے یورو سٹاکس چ تن اعشاریہ تن فیصد دی گراوٹ ویکھی گئی۔ پچھلے ہفتے وچ یورپی بازار حصص توں نیڑے ادھ ٹریلین ڈالر کڈھ لئے گئے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels