Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ہندوستانی اقتصادی انقلاب دے 20 ورھے

ہندوستانی اقتصادی انقلاب دے 20 ورھے

وچار ڈیسک
July 24th, 2011

20 ورھے پہلاں ایسے ہفتے ہندوستان وچ اقتصادی سودھاں لاگو کیتیاں گئیاں سڻ۔ تد ہندوستان اک ایہو جہیا دیس سی جتھے تسیں کوکا کولا نہیں خرید سکدے سی، ٹیلی فون لائن لیڻ وچ اک ورھا لگ جاندا سی اتے سارے دیس وچ چھڑا اکو ٹی وی چینل سی۔

نویں دلی دے اک گیراج دے مالک پرمود بھیسن دسدے ہیڻ پئی اقتصادی انقلاب دا مڈھ 24 جولائی 1991 نوں منظور ہوڻ والے بجٹ دے نال ہی رکھیا گیا سی اتے ایہہ پئی اوس تاریخ دے مگروں اتے پہلاں دی جیوڻی وچ اوہناں نوں زمین اسمان دا فرق نظر آؤندا ہے۔ ''شہروں باہر فون کرن دی لوڑ پیندی سی تاں باقاعدہ کال بُک کرواؤڻی پیندی سی اتے گھنٹیاں بدھی اُڈیکڻا پیندا سی۔ ایسے طرحاں جے گھر ٹیلی فون لواؤڻا ہوندا سی تاں دفتر شاہی دے نال اک کدے نہ مُکڻ والی جنگ ہوندی سی۔''

1991 توں پہلاں ہندوستان نیڑے تیڑے ہر طرحاں دی باہرلی سرمایہ کاری دے خلاف سی۔ دیس دے آگواں دے سوشلسٹ اتے قوم پرستی دے وچاراں دے اثر ہیٹھ دیس خود کفالت دی لیہے پیڻ دے جتن کردا رہندا سی اتے بین الاقوامی برانڈ کدے کدائیں ہی نظر آؤندے سڻ۔ ایہہ پابند معیشت ہولی ہولی دیس دی معیشت نوں تباہی دی بروہے لے آئی سی۔

پرمود بھیسن، جیہڑے اج 23 اتے 18 ورھیاں دیاں عمراں دیاں فیشنی دو دھیاں دے پیو ہیڻ دسدے نیں پئی اوس زمانے وچ وستاں اتے سیواواں بہت گھٹ سڻ۔ لوک باہرلے دیساں وچ وسدے آپڻے سنگیاں ساکاں دے ترلے پاؤندے سڻ پئی اوہ آؤندے ہوئے اوہناں لئی لیوی دی جینز یاں فیر بجلی نال چلڻ والیاں شیواں لیندے آؤڻ۔ 70 دے دہاکے وچ اوہ امریکا رہے اتے اوہناں نوں پتہ سی پئی باہرلی دنیا کیہو جہی ہے۔ ایتھے ہندوستان وچ 95 فیصدی وستاں ہندوستان دیاں بڻیاں ہوندیاں سڻ اتے کجھ گڻیاں ہوئیاں تھاواں توں ہی باہرلے دیساں دیاں بڻیاں وستاں لبھدیاں سڻ۔

پہلاں ہندوستانی وسنیک کدے کدائیں ہی باہرلے دیساں نوں جاندے سڻ، اجکل رجے ہوئے ہندوستانی بنا کسے پریشانی دے ملائشیا یاں فیر تھائی لینڈ وچ چھٹیاں لنگھاؤڻ جاندے ہیڻ۔ ہڻ سدھی ساہویں غیر ملکی سرمایہ کاری توں روکاں چکیاں گئیاں ہیڻ۔ ہُڻ آپڻا کاروبار کرن والیاں نوں دفتر شاہی دیاں اڑیچاں نال وی بہتا واہ نہیں پیندا۔

کوکا کولا اتے پیپسی دے نہ ہوندیاں سنہ 1977 وچ ہندوستان وچ تھمبز اپ ناں دا مشروب آیا سی۔ 1991ء وچ منڈیاں دے بوہے کھلے تاں کوکا کولا کمپنی نے تھمبز اپ نوں خرید لیا۔ ملکی پدھر دا ایہہ مشروب اج وی کروڑاں ہندوستانیاں دی پسند ہے اتے سب توں ودھ وکدا ہے۔

ہُڻ ہندوستان دیاں سڑکاں تے ایمبیسیڈر ہی نہیں سگوں غیر ملکی برانڈاں دیاں کاراں وی چلدیاں ہیڻ جدوں کہ چھڑا دور درشن دی تھاں ٹی وی چینلاں دا ہڑھ آیا ہویا ہے۔ ہندوستانی لوکائی دی بہتی گڻتی ایس اقتصادی انقلاب نوں سلاہوندی ہے پر اوہناں دے وچار موجب ایس انقلاب نوں ایہدے توں بہت اگانہہ تیکر جاڻا چاہیدا سی۔ فیر ایہہ پئی ایس انقلاب دے موڈھی منموہن سنگھ دا وزیر اعظم دے طور تے معاشی میدان وچ اونا اثر نہیں رہیا جنا اوہناں دے وزیر خزانہ دے طور تے سی جدوں اوہناں اقتصادی سودھاں دا مڈھ بنھیا گیا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels