Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> اٹلی دی مالی حالت تے گوہ لئی یورپی یونین دا ہنگامی اجلاس

اٹلی دی مالی حالت تے گوہ لئی یورپی یونین دا ہنگامی اجلاس

وچار ڈیسک
July 11th, 2011

یورپی یونین دے صدر ہیرمان فان رومپوئے نے اٹلی دی وگڑ دی ہوئی مالی صورتحال نوں ویکھدیاں ہوئیاں یورپی نمائندیاں دا اک ہنگامی اجلاس سد لیا ہے۔ خبراں دے ادارے روئٹرز نے اُچ پدھری یورپی وسیلیاں دے حوالے نال ایس خبر دی تصدیق کیتی ہے پئی علاقے نوں پیش قرضیاں دے پھردول نال نبڑن لئی کم کرن والے آگواں نوں ایس اجلاس وچ سدیا گیا ہے۔ دسیا جا رہیا ہے پئی یورپی مرکزی بینک دے صدر ذاں کلود تریشے، یورو زون دے خزانے دے وزیراں دے جتھے دے پردھان ژاں کلود ینکر، یورپی کمیشن دے پردھان یوزے مانوئل باروسو تے اقتصادی تے مالیاتی پربندھاں دے کمشنر اولی ریہن ایس اجلاس وچ رلت کرن گے۔

یورپی یونین دے صدر دے بلارے ڈیرک بیکر دا کہڻا ہے پئی ایہہ پھردول نال نبڑن دا اجلاس نہیں سگوں رابطہ کاری بارے عام جہی بیٹھک ہے۔ اوہناں دعویٰ کیتا پئی اٹلی دی صورتحال ایجنڈے دا حصہ نہیں پر اوہناں نے ایہہ وی دسیا جو اجلاس وچ کیہڑے پربندھاں تے بحث ہووے گی۔ ایہدے الٹ دو ہور یورپی نمائندیاں نے تصدیق کیتی ہے جو یورپی یونین دی اہم رکن ریاست اٹلی دی مالی حالت تے گوہ ایس اجلاس دے ایجنڈے وچ رلتی ہے۔

ایس اجلاس دی منگ کرن توں پہلوں سٹاک مارکیٹ وچ اطالوی ریاستی اثاثیاں دی وکری وچ بڑی کالھی نظر آئی سی۔ سٹاک مارکیٹاں وچ اٹلی دے سب توں وڈے بینک Unicredit Spa دے حصص دی قیمت وچ کوئی اٹھ فیصد کمی ویکھی گئی ہے۔ اٹلی دے ذمے ریاستی قرضیاں دی در اوہدی کل قومی پیداوار توں وی ودھ ہے۔ ایس لئی ہڻ انج دے خطرے وی ودھدے جا رہے نیں پئی خورے ہڻ اٹلی وی بیل آؤٹ پیکج دا طلبگار بڻ جاوے۔

ایس حالت دی اک ہور وجہ ایہہ وی ہے پئی خورے اطالوی وزیر اعظم سلویو برلسکونی آپڻے مالی وزیر تریمونتی نوں اوہناں دے عہدے توں معطل کر دیڻ۔ تریمونتی بجٹ خسارے تے قابو پاؤن لئی سرکاری خرچیاں وچ وڈی پدھر تے کٹوتی دی وکالت کر رہے نیں۔

یورو زون وچ یونان تے آئر لینڈ توں اڈ حالی کسے تیجے ملک نے بیل آؤٹ پیکیج لئی عرضی دیڻ دا ارادہ نہیں ظاہر کیتا۔ اٹلی توں پہلوں ایس سلسلے وچ اسپین دا ناں لیا جا رہیا سی پر ہسپانوی حکومت دیاں کوششاں نال اوتھوں دی صورتحال بہت چنگی ہو رہی ہے۔ اٹلی تے اسپین دیاں معیشتاں نوں ویکھدیاں ہوئیاں ماہراں دا کہڻا ہے جے اوہناں نوں بیل آؤٹ پیکیج دی لوڑ پے گئی تے یورو زون تے موجود دباء بہت ودھ جاوے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels