Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> مالی سال 2011-12 لئی 27 کھرب 67 ارب روپئے دا بجٹ پیش

مالی سال 2011-12 لئی 27 کھرب 67 ارب روپئے دا بجٹ پیش

وچار ڈیسک
June 3rd, 2011

قومی اسمبلی وچ مالی سال 2011-12 لئی 27 کھرب 67 ارب روپئے دا بجٹ پیش کر دتا گیا۔ وزیر خزانہ ڈاکٹر عبدالحفیظ شیخ نے جمعے دی شام قومی اسمبلی وچ بجٹ پیش کردیاں ہوئیاں کہیا پئی اجوکی حکومت نے مالیاتی گھاٹا گھٹایا تے ملک نوں وڈے وڈے مسئلیاں دے مگروں وی مالیاتی استحکام ول ودھایا ہے اوہناں نے کہیا کل 27 کھرب 67 ارب روپئے دے مالیاتی تخمینے دی صلاح ہے۔

اوہناں نے کہیا پئی حکومت دیاں پالیسیاں پاروں برآمداں وچ 28 فیصد وادھا ہویا زرمبادلہ دے ذخیرے 17 ارب 3 کروڑ ڈالر دی ریکارڈ پدھر تے اپڑ گئے اوہناں کہیا سیکورٹی پاروں ساڈا ملک مسلسل اوکڑاں دا شکار ہے، معاشی پالیسیاں دے تسلسل دی لوڑ ہے ، معاشی استحکام دا تسلسل پہلی ترجیح ہے۔

اگلے سال معیشت تے بھار گھٹ ہووے گا، وزیر خزانہ نے کہیا نویاں نوکریاں تے شرح نمو وچ وادھے دی نویں قومی پالیسی بڻائی ہے ،روپئے دے کھلار نوں 9 فیصد توں گھٹایا جاوے گا۔ ایس موقعے تے وزیر خزانہ نے کہیا قائد ملت لیاقت علی خان تے ذوالفقار علی بھٹو دے مگروں وزیر اعظم گیلانی نوں سب توں بہتے چر تیکر وزیر اعظم رہڻ دا آدر ملیا ہے جیہڑا اک وڈی کامیابی ہے تے اوہدا کریڈٹ ساریاں وڈیاں سیاسی جماعتاں دی اگوائی نوں جاندا ہے۔

اجوکی حکومت نے وفاق نوں مضبوط بڻایا ۔ اوہناں نے صدر آصف علی زرداری نوں سلاہندیاں ہوئیاں کہیا پئی صدر نے اپنے اختیار پارلیمنٹ نوں دتے، وزیر خزانہ نے کہیا پاکستان دی تاریخ وچ پہلی واری اپوزیشن لیڈر پبلک اکاؤنٹس کمیٹی دے پردھان وی نیں، پارلیمانی کمیٹیاں حکومتی کارکردگی دی راکھی تے محاسبہ کر رہیاں نیں اجوکی حکومت نے آئین بحال کیتا تے صوبیاں نوں اختیار دتے عدلیہ تے میڈیا پورے آزاد نیں اوہناں کہیا حکومتی کوششاں نال روپئے دا کھلار گھٹیا ہے۔

وزیر خزانہ نے کہیا ایس سال سرکاری نوکراں دیاں تنخواہواں وچ پندراں فیصد وادھے دی صلاح ہے اسیں پچھلے مالی سال تنخواہواں وچ 50 فیصد وادھا کیتا سی وزیر خزانہ نے کہیا پنشن پندراں توں ویہہ فیصد ودھ جاوے گی۔ گریڈ اک توں پندراں تیکر دے ملازماں دے کئی الاؤنسز وچ وادھے دی صلاح وی ہے۔ اوہناں کہیا ہڑھ پاروں معیشت تے بھیڑے اثر پئے پر آس مند آں جو ساڈیاں اوکڑاں گھٹڻ گئیاں حکومت نے ہڑھ مارے علاقیاں توں ٹیکس نہیں لیا اسیں اوکڑاں دے مگروں وی انج دیاں کاروائیاں کیتیاں نیں پئی مہنگائی وچ کمی آئی حکومت توانائی دے شعبے وچ سدھاراں تے بھرویں توجہ دے رہی ہے سیلز ٹیکس نظام توں ٹیکس چھوٹ تے زرو ریٹنگ نوں مکایا گیا ہے اوہناں کہیا لوڑ موجب اداریاں دی نجکاری دے جرات مند فیصلے کرنے ہوڻ گے جدوں کہ توانائی دیاں قیمتاں گھٹاؤڻ لئی 500 ارب روپئے کڈھڻے ہوڻ گے۔

وزیر خزانہ نے کہیا بینظیر انکم سپورٹ پروگرام دے تحت غریباں وچ 35 ارب روپئے ونڈھے اوہناں نے دسیا پئی اگلے سال پنڈاں تھاواں دی معیشت توں 400 ارب روپئے ملڻ گے، اسٹیٹ بینک توں قرضے نہ لیڻ دا وعدہ پورا کر دتا، کڻک کھنڈ ورگیاں وستاں دی اپڑ یقینی بڻائی جاوے گی۔ قومی ترقیاتی پروگرام لئی 720 ارب روپئے رکھے گئے نیں۔

وزیر خزانہ نے کہیا گلگت بلتستان تے آزاد کشمیر لئی 28 ارب روپئے دیڻ دی صلاح ہے اوہناں نے سمندر پار وسنیک پاکستانیاں نوں سلاہندیاں ہوئیاں کہیا پئی اوہناں ولوں گھلیاں جاڻ والیاں ترسیلاں نال بڑے چنگے اثر پئے نیں، قومی ترقیاتی پروگرام وچ انفراسٹرکچر پانی اپڑاؤڻ دے منصوبیاں نوں ترجیح دتی جارہی ہے اوہناں نے کہیا صرف پندراں لکھ لوک ٹیکس گوشوارے جمع کراؤندے نیں جدوں کہ 23 لکھ بندیاں نوں ٹیکس نیٹ وچ لیاندا جارہیا ہے۔71 ہزار بندیاں نوں ٹیکس دے نوٹسز جاری کیتے گئے نیں۔ ایس موقعے تے وزیر خزانہ نے کہیا جی ایس ٹی وچ اک فیصد کمی کر کے اوہنوں 17 توں 16 فیصد کرڻ دی صلاح ہے۔ اوہناں کہیا تعلیم تے صحت لئی چالی ارب روپئے رکھے گئے نیں۔ اگلے سال محصولاں دا ہدف 19 کھرب 52 ارب روپئے متھیا گیا ہے۔

سارے فیڈرل ایکسائز ڈیوٹیز نوں اگلے دو سال وچ مکاؤڻ دی صلاح ہے جدوں کہ 392 ریگولیٹری ڈیوٹیز مکاؤڻ دی صلاح ہے۔ تنخواہ دار میل لئی ٹیکس دی حد تن توں ودھا کے ساڈھے تن لکھ روپیے کر دتی گئی۔ بجٹ دا کل حجم 27 کھرب 67 ارب روپئے ہے۔ خسارہ جی ڈی پی دا چار فیصد ہووے گا۔ سارے اسپیشل ایکسایز ڈیوٹیز نوں مکا دتا گیا۔ کیش کڈھواڻ تے لگی ود ہولڈنگ ٹیکس 0.3 فیصد توں گھٹا کے 0.2 فیصد کیتا جاوے گا۔

سیمنٹ تے فیڈرل ایکسائز ڈیوٹی 700 توں گھٹا کے 500 روپئے فی میٹرک ٹن رکھ دتا۔ تن سال وچ ڈیوٹیز نوں مکا دتا جاوے گا۔پہلی جولائی دو ہزار نو تیکر دتے گئے سارے ایڈہاک الاؤنسز مڈھلی تنخواہ وچ ضم کرڻ دی صلاح۔ اگلے مہینے وچ ست لکھ تگڑے بندیاں نوں ٹیکس نوٹس دتے جان گے۔ کل مالیاتی خسارہ 850 ارب روپئے ہووے گا۔ گھاٹا جی ڈی پی دا 4 فیصد ہووے گا۔ گڈیاں، سیگرٹ، چھالیہ، سینیٹر یوئیر، اسلحے تے ٹائلز تے ریگولیٹری ڈیوٹی برقرار۔ مشروبات تے فیڈریل ایکسائز ڈیوٹی گھٹا کے چھ فیصد کر دتی گئی۔ ٹیکس دی آمدنی قومی پیداوار دا 9.3 فیصد کر دتی گئی۔ بجٹ وچ ایچ ای سی لئی 40 ارب روپئے رکھے گئے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels