Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> معیشت خراب، مہنگائی تے قرضے ودھ گئے: اقتصادی سروے

معیشت خراب، مہنگائی تے قرضے ودھ گئے: اقتصادی سروے

وچار ڈیسک
June 3rd, 2011
4 / 5 (1 Votes)

سرکار نے مالی سال 2010-11 دا اقتصادی سروے جاری کر دتا ہے جیہدے وچ منیا گیا پئی معیشت دی صورتحال خراب رہی، مہنگائی تے قرضے ودھ گئے تے ایس مالی سال دے بہتے بجٹ ہدف نہیں پائے جاسکے۔ پچھلے سال دے مینہ تے ہڑھ ، عالمی مارکیٹ وچ پٹرولیم وستاں دیاں قیمتاں وچ وادھا تے سیکورٹی دی صورتحال پاروں ملکی معیشت نوں وادھو دبا دا ساہمڻا کرنا پیا۔

ایہہ اقتصادی سروے وزیر خزانہ عبدالحفیظ شیخ نے جمعرات دی شام اک نیوز بریفنگ وچ پیش کیتا۔ اوہناں اقتصادی پرکھ دی رپورٹ جاری کردیاں ہوئیاں کہیا ہے پئی ہڑھ تے سیکورٹی دے پاروں معیشت نوں بہت دھکا لگیا ہے تے صرف ہڑھ پاروں 10 ارب ڈالر یعنی 850 ارب روپئے دا گھاٹا پیا ہے۔ اوہناں آکھیا 10 ارب ڈالر دے گھاٹے دی جھبدے تلافی یاں ایہدا بھار جھلڻا پاکستان ورگے ملک دے وس دا روگ نہیں۔

خزانے دے وزیر نے دسیا پئی مہنگائی دی دُر 14 فیصد رہی تے ایہدا وڈا کارن تیل تے طاقت دیاں قیمتاں وچ وادھا ہے۔ غربت تے بے روزگاری دی نویں دُر بارے اوہناں کہیا جو ایس بارے نویں گڻتی نہیں ملی۔

پر خزانے دے سیکرٹری ڈاکٹر وقار مسعود نے دسیا جو سن 2005 تے 2006 دے اک سروے موجب غریبی دی دُر 31 فیصد تے سن 2008تے 2009 دے لیبر سروے موجب بے روزگاری دی دُر کوئی 6 فیصد رہی ہے۔

نیوز بریفنگ وچ خزانے دے وزیر تے بڑے اوکھے سوال ہوئے پر اوہناں وی اپڻا ذاتی انکم ٹیکس تے دفاعی بجٹ وچ وادھو دا حساب نہیں دسیا۔ اوہناں آکھیا حکومت نے کفایت شعاری دی مہم نال خرچے گھٹائے جدوں کہ ایوان صدر، وزیر اعظم ہاؤس تے ساریاں وزارتاں اپنے متھے گئے بجٹ تیکر ہی محدود رہیاں۔ اوہناں موجب محدود وسیلیاں دے مگروں وی غریب لوکاں دی مدد لئی کئی سیفٹی نیٹ ورکس راہیں 32 ارب روپئے ونڈھے گئے۔

خزانے دے وزیر نے دسیا پئی اوہناں نوں بڑا ہرکھ ہے جو 100 روپئے سالانہ ترقیاتی خرچیاں وچ کمی کیتی گئی تے 2 سال وچ بجلی دیاں قیمتاں وچ وادھے نوں روکن لئی 5 کھرب روپئے سبسڈی دتی گئی۔حفیظ شیخ نے دسیا پئی اقتصادی ترقی دی دُر 2.4فیصد رہی۔ اوہناں موجب کل زرعی شعبے وچ ترقی دی دُر 1.2 فیصد رہی پر وڈیاں فصلاں دی پیداواری دُرمنفی 4 ریکارڈ کیتی گئی۔ جیہدے وچ چاول تے کپاہ وی رلتی نیں۔ پر اوہناں موجب کنک دی فصل پچھلے سال توں واہوا چنگی ہوئی ہے۔

خزانے دے وزیر نے دسیا پئی اک بندے دی آمدڻ پچھلے سال نالوں 1ہزار73 ڈالر توں ودھ کے 1254 ڈالر ہو گئی ہے۔ ظاہر وچ تے اک بندے دی آمدڻ 181 دا وادھا ہویا ہے پر ماہر کہندے نیں جے مہنگائی دی دُر نوں ویکھیا جاوے تے ایہہ آمدڻ وچ ماڑا موٹا ہی وادھا لگدا ہے۔

خزانے دے وزیر نے دسیا پئی ایس مالی سال وچ اقتصادی ترقی دی دُر وچ وادھے نوں تن وڈے چیلنجاں دا ساہمڻا رہیا۔ پہلا ہڑھ جیہدے پاروں سولاں لکھ خانداناں تے اثر پیا تے 10 ارب ڈالر دا گھاٹا پیا، دوجا سیکورٹی ، جیہدے پاروں سرمایا کاری تے اثر پیا تے تیجا عالمی منڈی وچ تیل دیاں قیمتاں وچ وادھا، جیہدے پاروں حکومت نوں 50 ارب روپئے دا گھاٹا کھانا پیا۔

اوہناں دسیا سرکار نے بینکاں توں قرضہ لیڻ دی گھٹ توں گھٹ کوشش کیتی پر اوہناں منیا پئی ایہدے مگروں وی ایس سال سرکاری قرضیاں وچ 544 ارب روپئے دا وادھا ہویا جیہڑا پچھلے سال نالوں 16 ارب روپئے بہتا ہے۔

وزیر خزانہ نے دسیا پئی غیر ملکی قرضیاں وچ جون 2010 توں مارچ 2011 تیکر ساڈھے تیراں ارب ڈالر دا وادھا ہویا تے باہرلے قرضے ساڈھے 59ارب ڈالر ہو گئے نیں۔ اوہناں موجب ایہہ وادھا چھ اعشاریہ چار فیصد ہے جیہڑا پچھلے پنج سال وچ کسے وی سالانہ وادھے توں گھٹ ہے۔

اقتصادی سروے وچ دسیا گیا ہے جو پاکستان دی آبادی وچ سالانہ وادھے دی دُر ہڻ وی دو فیصد توں ودھ ہے تے کل ملکی آبادی پونے اٹھاراں کروڑ ہے۔ سروے موجب شہری آبادی ودھی ہے جیہڑی کہ63 فیصد ہو گئی ہے تے پنڈاں دی آبادی 37 فیصد رہ گئی ہے۔ شہری آبادی وچ حدوں بہتے وادھے دے کارن انفراسٹرکچر تے کرڑا دبا ہے تے ماحولیاتی مسئلے وی ودھ گئے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels