Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> پاکستان وچ کڻک دا پھردول، کاشتکار پریشان

پاکستان وچ کڻک دا پھردول، کاشتکار پریشان

وچار ڈیسک
May 28th, 2011

اک انج دے ویلے وچ جدوں پاکستان دے کول کڻک دے وڈے بھنڈار موجود نیں۔ کڻک دی نویں فصل دی چنگی پیداوار نے مارکیٹ وچ کڻک دیاں قیمتاں نوں گھٹا دتا ہے۔

پاکستان وچ کڻک دا پھردول جاری ہے تے ایس واری ایہہ پھردول کڻک دی تھوڑ پاروں نہیں سگوں کڻک دی بہتی پیداوار پاروں پیدا ہو رہیا ہے۔ حکومت معاشی تے سٹوریج دے مسئلیاں پاروں بہتی کڻک خریدڻ جوگی نہیں۔

کڻک دی خریداری لئی چھوہے گئے آپریشن دے پورے ہوڻ وچ کجھ دن رہ گئے نیں پر ایگری فورم پاکستان دے چیئر مین ابراہیم مغل موجب وفاقی ادارہ پاسکو تے صوبہ پنجاب دا محکمہ خوراک دوویں آپڻے ہی متھے ہوئے خریداری دے ہدفاں نوں پورا کرن وچ کامیاب نہیں ہو سکے نیں۔ اوہناں موجب ایہناں ہدفاں نوں پاؤڻ لئی ایہناں اداریاں نوں اگلے تن چار دناں وچ 17 لکھ ٹن کڻک خریدڻی پوے گی جیہڑی کہ سوکھی گل نہیں ہے۔

ضلع اوکاڑہ دے اک کاشتکار عامر حسین نے دسیا پئی سرکار 14 کلے رقبے لئی کاشتکاراں نوں صرف چار بوریاں دیندی ہے جیہدے راہیں اوہ صرف کجھ مڻ کڻک ہی حکومت نوں ویچ سکدے نیں۔ کجھ کاشتکاراں موجب ایہناں بوریاں لئی وی وڈھی چیرے توں بناء نہیں سردا۔ عامر حسین نے ہور دسیا پئی ایس صورتحال نے دلالاں تے آڑھتیاں دی چاندی کرا دتی ہے تے اوہ بناء کوئی رقم بھرے ادھار کڻک چک رہے نیں۔

کساناں ولوں آپڻی فصل اوڻے پوڻے ویچڻ پاروں مارکیٹ وچ کڻک دی قیمت حکومت دے متھے ہوئے ریٹ یعنی 950 روپئے مڻ دی تھاں کجھ علاقیاں وچ اٹھ سو روپئے مڻ تیکر ڈگ گئی ہے۔ اہم گل ایہہ ہے جو کڻک دی قیمت وچ ہوڻ والی ایس تھوڑ دا فیدا عام لوکاں نوں نہیں اپڑ رہیا۔

ہوٹلاں وچ ملڻ والی روٹی دی قیمت وچ کوئی کمی ویکھڻ وچ نہیں آئی۔ ابراہیم مغل کہندے نیں پئی پچھلے سالاں وچ فلور مل مالک اک ہزار روپئے فی مڻ دے حساب نال کڻک خرید کے ویہہ کلو دا آٹے دا تھیلا چھ سو روپئے وچ دیندے رہے نیں۔ اوہناں دا کہڻا ہے پئی ایس سال اٹھ سو یاں اٹھ سو پنجاہ روپئے مڻ کڻک خریدڻ دے مگروں وی آٹے دے ویہہ کلو دے تھیلے دی قیمت وچ مناسب حد تیکر کمی کیوں نہیں کیتی گئی۔

پنجاب دے ڈائریکٹر فوڈ عرفان الٰہی نے دسیا پئی ایہہ خیال ٹھیک نہیں ہے جو حکومت کڻک دی خریداری دے کم وچ ' سلوگو' پالیسی تے چل رہی ہے۔ اوہناں موجب حکومت اک سوچے وچارے منصوبے ہیٹھ مارکیٹ وچ آپڻی ہوند بہتے چر لئی یقینی بڻا رہی ہے تاں جو کڻک دیاں قیمتاں ہور تھلے نہ سٹ دتیاں جاڻ۔ اوہناں موجب پنجاب حکومت ہڻ تیکر 29 لکھ ٹن کڻک خرید چکی ہے۔ اوہناں دا کہڻا ہے پئی حکومت کڻک ایکسپورٹ کرنا چاہوندی ہے۔

عرفان الٰہی نے ایہہ وی دسیا پئی مکئی دیاں قیمتاں وچ وادھے پاروں فیڈ مل مالکاں نے وی کڻک دی خریداری شروع کر دتی ہے۔ اوہناں نے دعویٰ کیتا پئی کڻک دی خریداری دا کم نتارویں طریقے نال چل رہیا ہے۔

پاکستان وچ خوراک، بیجائی تے لائیو سٹاک دیاں لوڑاں لئی 2 کروڑ 20 لکھ ٹن کڻک چاہیدی ہوندی ہے جدوں کہ ایس سال دو کروڑ چالی لکھ ٹن کڻک پیدا ہوئی ہے۔ ملک دی شہری آبادیاں دی خوراک دیاں لوڑاں پورا کرن لئی 30 توں 35 لکھ ٹن کڻک چاہیدی ہوندی ہے پر آس کیتی جا رہی ہے جو ایہناں لوڑاں دے مقابلے وچ ایس سال کڻک دی خریداری دے مکڻ تے حکومت دے کول کوئی 80 لکھ ٹن کڻک موجود ہووے گی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels