Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> پاک بھارت وپار دیاں بدلیاں ترجیحاں

پاک بھارت وپار دیاں بدلیاں ترجیحاں

وچار ڈیسک
April 29th, 2011

پاکستان تے ہندوستان وچکار وپار ودھاؤڻ لئی ہوڻ والے مذاکرات دے پنجویں دور نوں پاکستانی ماہر سفارتی پکھوں کامیاب متھ رہے نیں پر ایہدے سٹے وچ وپار ودھڻ بارے وپاری برادری نوں بہتیاں آساں نہیں ہیڻ۔

پاکستان اتے بھارت دے وپار دیاں وزارتاں دی سیکرٹریز نے اسلام آباد وچ دو دن گل بات دے مگروں سانجھے اعلامیے وچ کئی وپاری معاملیاں تے گوہ لئی دوہاں پاسیاں دے افسراں دے سانجھے ورکنگ گروپس بناؤڻ دا اعلان کیتا جیہناں نوں اک اُچیچے چر وچ آپڻا کم پورا کرن دی ہدایت کیتی گئی ہے۔

پاکستان دے گذریل سیکرٹری خارجہ تنویر احمد خان نے ایہناں مذاکرات نوں کامیاب آکھدیاں ہوئیاں کہیا وپار بارے چنگا طریقہ دوہاں ملکاں وچ بدلدیاں ترجیحاں دی نشانی ہے۔ ' پاکستان اتے انڈیا مذاکرات وچ سُستی دے مگروں ہڻ جیس عمل وچوں لنگھ رہے نیں اوہدے وچ اوہناں دی ترجیحاں وچ جیہڑا اک تاریخی پاڑ رہیا ہے، ایہنوں گھٹ کیتا جا رہیا ہے۔'

تنویر احمد خان نے گل کھولدیاں ہوئیاں کہیا پئی ' مثال دے طور تے پاکستان ہمیش توں کہندا رہیا ہے پئی جدوں تیکر کشمیر دے معاملے تے اگے نہ ودھیا جاوے، وپاری سانگیاں وچ گرمجوشی نہیں آوے گی جدوں کہ ہندوستان کہندا رہیا ہے پئی ات واد دے نیٹ ورک نوں مکائے بناء سانگے اگے نہیں ودھ سکدے۔'

وپار تے چنگے طریقے نال اگے ودھڻ نال ثابت ہوندا ہے پئی پاکستان تے ہندوستان دے سانگیاں دا حالے مڈھ رکھیا جا رہیا ہے جیہدے وچ پاکستان بالواسطہ طور تے من رہیا ہے پئی اقتصادی سانگیاں دی اُچیچی اُچیچتا ہے۔

گذریل سیکرٹری خارجہ نے کہیا پاکستان تے ہندوستان وچکار وپار دوہاں ملکاں وچ امن دی حمایتی طاقتور لابی نوں جنم دیوے گا جیہدے پیدا ہوڻ تے پھلڻ نال علاقے وچ امن بہتے چر لئی تے سوکھا ہو جاوے گا۔

اُنج تے پاکستان تے انڈیا وچ امن دے پیامبر دوہاں پاسے پائے جاندے نیں پر جدوں ایہناں ملکاں دے کاروباری تے صنعتی جتھیاں دے وپار توں فیدا ہووے گا تے ایہہ لوک وی امن دے سب توں وڈے حمایتیاں دے طور تے ساہمڻے آؤڻ گے۔ ایہو جہے وچ سیاستداناں تے فوجیاں لئی جنگ دی گل کرنا اوکھا ہوندا جاوے گا۔'

وپار دی سفارتی اُچیچتا آپڻی تھاں پاکستانی وپار برادری حالی تیکر ہندوستان دے پاکستانی وپاریاں ولوں دسے گئے مندے ورتارے توں خوش نہیں ہے اتے ایس ورتارے نوں آپو دے وپار دی راہ وچ سب توں وڈی اڑیچ سمجھدی ہے۔

فیڈریشن آف پاکستان چیمبر آف کامرس اینڈ انڈسٹریز دے گذریل پردھان چودھری محمد سعید نے اجوکے نویں مذاکرات بارے کہیا جو وپار ودھاؤڻ لئی قانونی تے تکنیکی اڑیچاں دا دور ہوڻا چنگی گل ہے پر ہندوستانی وپاریاں نوں پاکستانی وپاریاں دے فیدے نوں وی نظر وچ رکھڻا ہووے گا۔ صرف انج دوہاں پاسیاں دا وپار اگے ودھ سکدا ہے۔

انج کئی واری ہویا ہے پئی قانونی طور تے اجازت دے مگروں وی ہندوستان نے پاکستانی شیواں لیڻ توں نانہہ کیتی ہے۔ سیمنٹ ایہدی نویں مثال ہے پاکستان توں سیمنٹ ہندوستان کھڑیا جا رہیا سی جتھے ایہدی بے پناہ لوڑ تے مشہوری سی پر اچڻ چیتی بناء وجہ دسے تے نوٹس دتے ہندوستان نے اوہدے تے روک لا دتی۔'

چودھری سعید نے کہیا انج دی ہی اک مثال کپاہ دی ہے جدوں پاکستان وچ کپاہ دی لوڑ سی تے ہندوستان نے پج لا کے پاکستان نوں کپاہ گھلڻ توں معافی منگ لئی جیہدے لئی پاکستانی ٹیکسٹائل صنعت نوں بہت نقصان ہویا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels