Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ارباں ڈالر دی امریکی امداد: گپ بہتی تے سچ تھوڑا

ارباں ڈالر دی امریکی امداد: گپ بہتی تے سچ تھوڑا

وچار ڈیسک
April 20th, 2011

ریمنڈ ڈیوس والا رولا مُکڻ مگروں امریکا اتے پاکستان نے دو پاسڑ سانگیاں نوں سدھارڻ لئی اُچی پدھر تے رابطے تیز کر دتے ہیڻ۔ ہُڻ تیکر ہوڻ والیاں بیٹھکاں وچ پاکستان دا دورہ کرن والے امریکی پربندھکاں نے گھڑی گھڑی آپڻے ایس نیڑلے سنگی نوں ات واد مگروں معیشت اتے توانائی دے پھردول ورگے مسئلیاں نال نبڑن وچ واہ لگدے نوں پوری ہتھ ونڈائی دا پک کروایا ہے پر دوہاں دیساں دے عہدے داراں دا منڻا ہے پئی حالات نوں سدھارڻ اتے مُڑ کے بھروسہ بنڻ وچ ویلا لگے گا۔

ایس بے بھروسگی دا وکھالا واشنگٹن دا دورہ کرن والے پاکستان دے وفاقی وزیر خزانہ عبدالحفیظ شیخ نے سوموار دے دیہاڑے 'ووڈور ولسن سینٹر' وچ اک اکٹھ وچ گل کردیاں کیتا جتھے اوہناں آکھیا پئی امریکیاں وچ عام طور تے ایہہ پایا جاندا وچار ٹھیک نہیں ہے پئی اوہناں دا دیس پاکستان نوں ارباں ڈالر امداد دے رہیا ہے۔ ایہدے وچ گپ بہتی اتے سچ تھوڑا ہے۔

اوہناں دسیا پئی امریکی سرکار نے کیری لوگر برمن قانون ہیٹھ پاکستان نوں اگلے 5 ورھیاں وچ 7.5 ارب ڈالر سول امداد دیڻ تے ایکا کیتا سی اتے پاکستان نوں ہر ورھے 1.5 ارب ڈالر دی رقم ملنی سی۔ پر ایس ورھے پاکستان نوں بڑا اوکھیاں ہو کے 30 کروڑ ڈالر ہی دتے گئے ہیڻ۔

فروری 2008ء دیاں چوڻاں دے سٹے وچ بنڻ والی پیپلز پارٹی دی رلی ملی سرکار پہلے دیہاڑے توں ہی پاکستان نوں امداد دیڻ والے دیساں تے زور دیندی آئی ہے پئی اوہ مالی امداد دیڻ دی تھاں آپڻیاں تجارتی منڈیاں تیکر پاکستانی مال نوں اپڑن دی اجازت دیڻ۔ پر ایہہ منگ اوس ویلے کیتی جا رہی ہے جدوں دیس وچ پیداواری شعبہ اچیچا کپڑے دی صنعت مندے حالاں وچ ہے اتے صنعت کاراں دا آکھڻا ہے پئی لمے لمے چراں لئی بجلی بند ہوڻ پاروں اوہ آپڻے برآمدی ٹیچے پورے نہیں کر پا رہے۔

2007ء دے ادھ توں پاکستان دے سیاسی منظر ناویں وچ بدلی اتے دیس وچ توانائی دے وڈے پھردول مگروں پاکستانی معیشت اوکڑاں وچ پھاتی ہے اتے سرکار نے ایہنوں سہارا دیڻ لئی آئی ایم ایف نال کرڑیاں شرطاں تے 11 ارب توں ودھ دے قرضے دا معاہدہ کیتا ہویا ہے۔ ایس رقم وچوں 7 ارب ڈالر توں ودھ پاکستان نوں مل چکے ہین پر اقتصادی سودھاں بارے متھے ہوئے ٹیچے پورے نہ کرن پاروں آئی ایم ایف قرضے دی چھیویں قسط دیڻ توں ولا رہی ہے۔

مقامی میڈیا دیاں اطلاعواں موجب واشنگٹن وچ وزیر خزانہ حفیظ شیخ اتے آئی ایم ایف دے عہدے داراں وچکار ہوڻ والی گل بات وچ حالے اگے نہیں ودھیا جا رہیا۔ باقی رقم دی وصولی وچ سب توں وڈا ڈکا پاکستان وچ سدھارے ہوئے جنرل سیلز ٹیکس دا لاگو ہوڻا ہے جیہدی مخالفت اپوزیشن سڻے آپوں حاکم جماعت دیاں بانہہ بیلی جماعتاں وی کر رہیاں ہیڻ۔

نکھیدی کرن والیاں دی رائے موجب پیپلز پارٹی آپڻیاں سیاسی کمزوریاں پاروں پاکستان وچ معاشی استحکام لئی لوڑیندے اوہ پیر پٹڻ وچ ناکام نظر آؤندی ہے جیہناں دی امریکا توں اڈ ہور دیس اتے ادارے وی منگ کر رہے ہیڻ۔

پاکستان ولوں باہروں لئے ہوئے قرضے 58 ارب ڈالر تیکر اپڑ گئے ہیڻ جدوں کہ مقامی پدھر تے لئے گئے قرضے 70 ارب ڈالر دے ہیڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels