Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> پنجاب حکومت دا زرعی آمدڻ تے ٹیکس لاؤڻ دا فیصلہ

پنجاب حکومت دا زرعی آمدڻ تے ٹیکس لاؤڻ دا فیصلہ

وچار ڈیسک
April 9th, 2011

پنجاب حکومت نے زرعی آمدڻ تے ٹیکس لاؤڻ دا فیصلہ کیتا ہے۔زرعی سیکٹر وچ 50 ایکڑ توں بہتی زمین رکھڻ والے مالکاں تے ایہہ ٹیکس لگے گا جدوں کہ ایس حد توں گھٹ زمین رکھڻ والے مالک تے پہلوں زرعی زمین تے ٹیکس دیڻ والے ایس ٹیکس توں باہر ہوڻ گے۔ ٹیکس دے لاگو ہوڻ دا فیصلہ ڈیٹا جمع کرڻ، ایف بی آر دے فیلڈ سٹاف دی سکھلائی تے پوری تیاری دے مگروں کیتا گیا ہے۔

فیڈرل بورڈ آف ریونیو ( ایف بی آر ) دے اہلکار پنجاب دے ہر ضلعے وچ وڈے جاگیرداراں نال چھیتی رابطہ کرن گے تے اوہناں نوں ٹیکس ریٹرن فائل کرن لئی سوکھا ٹیکس فارم دیڻ گے۔ پنجاب حکومت ہڑھ مارے علاقیاں لئی پہلے ہی ٹیکس چھوٹ دے چکی ہے۔ پنجاب وچ فارمز تے ٹیکس دا نفاذ پنجاب ایگری کلچر انکم ٹیکس ایکٹ 1997 ہیٹھ کیتا گیا سی جیہدے موجب ساڈھے باراں ایکڑ تیکر زمین تے ٹیکس لاگو نہیں ہوندا۔

ساڈھے 12 توں 25 کلے زمین تے 150 روپئے فی ایکڑ جدوں کہ پنجھی ایکڑ توں بہتی زمین تے 250 روپئے ایکڑ ٹیکس لایا گیا۔ 2001 وچ ایکٹ وچ سودھ کر کے زمین تے ٹیکس دی تھاں آمدڻ تے ٹیکس دا اصول طے کیتا گیا تاں جو بارانی زمین دے مقابلے وچ زرخیز زمین رکھڻ والے کسان جیہناں دی آمدڻ وی بہتی ہے اوہناں کولوں ٹیکس لیا جاوے۔ ایکٹ دی سیکشن 3(4) موجب زمین تے ٹیکس یاں زرعی آمدڻ تے ٹیکس وچوں جیہڑا بہتا ہووے گا اوہی بھریا جاوے گا۔ پر زرعی آمدڻ تے ٹیکس دا نفاذ کدی نہیں کیتا جا سکیا۔

زرعی انکم ٹیکس بورڈ آف ریونیو دے ممبر چودھری صفدر حسین نے تصدیق کیتی پئی ان پچھاتے کارناں پاروں زمین زرعی آمدڻ تے ٹیکس نہیں لیا جا رہیا سی۔ اوہناں نے طاقتور لابی دا سدھا ساہواں ناں نہیں لیا جیہڑے پارلیمنٹ دے ایواناں وچ بیٹھ کے کئی سالاں توں ایس ٹیکس دے نفاذ وچ روک بڻے ہوئے نیں تے ملک نوں ارباں روپئے دا نقصان اپڑا رہے نیں۔ بورڈ آف ریونیو نے کیس سٹڈی لئی ڈی جی خان، رحیم یار خان، خانیوال تے سرگودھا دے چار جاگیرداں نوں چڻیا جیہناں دی زمین 476 ایکڑ ، 198 ایکڑ، 383 ایکڑ تے 780 ایکڑ سی۔ ایہناں چاراں جاگیرداراں نے آپڻی زرعی آمدن تے ترتیب وار 3 کروڑ 53 لکھ 60 ہزار روپئے،3 کروڑ 20 لکھ،43 لکھ 54 ہزار تے 2 کروڑ 50 روپئے ڈکلیئر کیتی پر ایہناں جاگیرداراں نے ترتیب وار اک لکھ19 ہزار، 42 ہزار، 91 ہزار، 42 ہزار، تے 2 لکھ 2 ہزار روپئے دا معمولی ٹیکس دتا۔

کھوج موجب ایہناں چاراں جاگیرداراں نے اک کروڑ 39 لکھ 16 ہزار روپئے دا ٹیکس چوری کیتا۔ بی او آر دے حساب موجب پنجاب وچ 50 ایکڑ توں بہتی زمین رکھن والے جاگیرداراں دی گنتی 6555 ہے جیہڑے 6 لکھ 87 ہزار 351 ایکڑ زمین دے مالک نیں۔ سینئر ممبر بورڈ آف ریونیو اخلاق تارڈ دی اجازت تے چودھری صفدر حسین نے ' دی نیوز ' نال گل بات کردیاں ہوئیاں کہیا پنجاب حکومت ایہناں وڈے جاگیرداراں توں پہلی واری زرعی آمدڻ تے ٹیکس لیڻ جا رہی ہے۔ اخلاق تارڈ دا کہڻا سی جو اسیں نکے کساناں نوں نہیں سگوں صرف وڈے جاگیرداراں نوں ٹیکس نیٹ وچ لیاؤڻا چاہوندے آں ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels