Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ہندوستان دا سالانہ بجٹ: سود خوراں اتے منافع خوراں دیاں جیباں بھرن دا بجٹ

ہندوستان دا سالانہ بجٹ: سود خوراں اتے منافع خوراں دیاں جیباں بھرن دا بجٹ

March 9th, 2011

فروری ٢٨ نوں خزانے دے وزیر پرناب مکھرجی نے پارلیمینٹ وچ نویں سال دا بجٹ پیش کیتا۔ اس بجٹ وچ کل ١٢٥٧٧٢٩ کروڑ رپیئے دا خرچہ تجویز کیتا گیا ہے۔ جس وچوں لوکاں دی صحت اتے تعلیم تے اُکا ٢٠٨٦٢ کروڑ روپیہ خرچ کیتا جاوے گا جو کہ اس بجٹ دا صرف١۔٦فیصد ہی ہے۔ ایسے طرحاں کھیتی باڑی، صنعت، بجلی، ٹرانسپورٹ، مواصلات، سائنس اتے ٹیکنالوجی تے ٢٥٣٩١ کروڑ رپیئے خرچ کیتے جاڻ گے جو کہ اس کل خرچے دا ٢فیصد ہی ہے۔ فوج اتے اسحلے تے ١٦٤٤١٥ کروڑ رپیئے لائے جاڻ گے جو کہ اس بجٹ دا ١٣فیصد حصہ ہے۔

سود خوراں دے بیاج اتے مل لئی ٦٣٦٨٩٩ کروڑ رپیئے خرچ کیتے جاڻ گے جو کہ اس بجٹ دا ٥١ فیصد حصہ ہے۔ اک وار فیر اس بجٹ نال سود خوراں اتے جوکاں دی موج لگ گئی ہے۔ سرکار اس سال لوکاں توں جو کل پیسہ وصول کرے گی ایہہ اوسدا ٨٩ فیصد حصہ ہے۔ ایہہ بجٹ اک وار فیر صاف کردا ہے کہ سرکار اتے نوکرشاہی عام لوکاں توں پیسے وصول کرکے ایہناں سود خوراں دے حوالے کرن دا امیراں دے ہتھ وچ اک ہتھیار ہے۔ انگریز بستیوادیاں دے بڻائے ہوئے اس نظام اتے ڈھانچے دا ایہہ خاصہ ١٩٤٧ دے بعد ہور وی بہتا تکھا ہو گیا ہے۔ حال وچ چھپی ہوئی اک رپورٹ وچ دسیا گیا ہے کہ پچھلے دو دہاکیاں وچ ہوئے گھٹالیاں وچ امیراں اتے وڈیریاں نے انگریزاں دی ٢٠٠ سال دی لٹ نالوں وی ودھ پیسے بڻائے ہیڻ۔

اس لئی ایہہ کوئی حیرانی والی گل نہیں کہ لوکاں دے حالات ہر سیاسی پارٹی دے نعریاں اتے وعدیاں دے باوجود سدھردے نہیں۔کسانی اتے کرتیاں دا گھان ہو رہیا ہے۔ سماجی سیواواں صرف نام دیاں ہی ہین۔ ہو وی کس طرحاں سکدیاں ہیڻ جد کہ سرکار نے ٢ فی صدی توں وی گھٹ سالانہ بجٹ دا حصہ ایہناں تے خرچ کرنا ہے۔ سرکار نوں لوکاں دی صحت، تعلیم اتے خوش حالی وچ کوئی دلچسپی نہیں۔ جے ایہہ ایہناں وچ کوئی دلچسپی رکھدی تاں ایہناں تے لوڑیندا پیسہ خرچ کردی۔ سرکار اک پاسے تاں ہر روز رولا پاؤندی ہے کہ اوہ عام آدمی دے کلیان کرن لئی ہی بڻی ہے پر جیباں ایہہ سود خوراں اتے امیراں دی ہی بھردی ہے۔

من موہن سنگھ نے بجٹ بارے تقریر کردے ہوئے اک وار فیر چٹا جھوٹھ بولیا کہ اس بجٹ نال عام آدمی دی زندگی وچ بہتری آوے گی۔ بجٹ دے آنکڑے کجھ ہور ہی دسدے ہیڻ۔حاکم ٹولے دا میڈیا وی بجٹ دا ایہہ خاصہ لوکاں تو لکا کے رکھدا ہے۔ سارے چینلاں اتے اخباراں وچ ایہہ ہی رولا ہے کہ اس بجٹ نال معاشی در کس طرحاں تے ودھے گی اتے اس نال سرمایہ لاؤڻ والیاں نوں کنا کُو فائدہ ہووےگا۔ سارا میڈیا کڑ بھریا پرچار کر رہیا ہے کہ اس بجٹ نال عام لوکاں دی ترقی وچ وادھا ہووےگا۔اصلیت تاں ایہہ ہے کہ عام لوکاں دی اس وچ کوئی بھلائی نہیں ہے اتے ناں ہی اوہناں نوں اس نال مہنگائی توں کوئی سکھ دا ساہ آوے گا۔ اوہناں دے روز ورتن والیاں وستاں ہور وی منہگیاں ہو جاڻ گیاں۔ مثال دے طور تے مٹی دا تیل اتے رسوئی دی گیس دی قیمتاں وچ بہت ہی وادھا ہو جاوے گا۔ دالاں، چاول، آٹا اتے ہور چیزاں دیاں قیمتاں وچ کوئی کمی نہیں آوے گی۔ پرناب مکھرجی نے بجٹ پیش کردے آکھیا کہ مہنگائی نوں نتھ پاؤڻی سرکار دے وس نہیں۔ایہہ منافع خوراں نوں کھلی چھوٹ اتے ہری جھنڈی ہی دکھاؤڻی سی جو کہ سوچ رہے سی کہ شاید سرکار آؤڻ والیاں چوناں کرکے اس ول کجھ دھیان دیوے گی۔ ہڻ اوہناں دیاں واگاں کھلیاں ہیڻ۔ اوہ من مرضی بھاء لا سکدے ہیڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels