Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> پاکستانی معیشت دا مندا حال، اقتصادی ٹیم نے وزیر اعظم نوں خبردار کر دتا

پاکستانی معیشت دا مندا حال، اقتصادی ٹیم نے وزیر اعظم نوں خبردار کر دتا

وچار ڈیسک
December 25th, 2010

وزیر خزانہ ڈاکٹر عبدالحفیظ پیرزادہ دی اگوائی وچ ملک دی اقتصادی ٹیم ولوں بند کمرے وچ ہون والے اجلاس وچ وزیر اعظم یوسف رضا گیلانی دے ساہمنے ملک دی معاشی حالت دی بہت ہی خطرناک تصویر پیش کیتی گئی۔ اجلاس وچ اوہناں نوں دسیا گیا پئی جے حکومت انج ہی آلکس تے بے عملی دا وکھالا کردی رہی تے 30 جون 2011 تیکر پاکستان دا مالی گھاٹا ودھ کے کل پیداوار دا 7.5 فیصد یعنی اک ہزار 284 ارب تیکر اپڑ جاوے گا۔ ایہدے توں پہلوں ایہہ ٹارگٹ صرف 4.5 فیصد تیکر متھیا گیا سی۔

جمعے نوں ہون والے اجلاس وچ رلتی اک وڈے بیوروکریٹ نے وسیلیاں نوں دسیا پئی چھیکڑلے جتناں دے طور تے اجلاس وچ ایہہ فیصلہ کیتا گیا جو حکومت ریفارمڈ جی ایس ٹی بل دے حوالے نال ساریاں جماعتاں وچ ایکا کرواؤن لئی نویں جتن شروع کرے گی تے قومی اسمبلی دی خزانے لئی قائمہ کمیٹی توں منظوری دے مگروں ایہنوں ایوان زیریں توں وی منظور کروائے گی۔

وزیر اعظم نوں دسیا گیا جو آئی ایم ایف ولوں جاری اسٹینڈ بائی پربندھ )ایس بی اے ( ہیٹھ ملن والی امداد دے پروگرام نوں ودھایا جاوے گا پر آر جی ایس ٹی دی منظوری، پاور سیکٹر وچ سدھار تے عملدرآمد تے SBP ایکٹ تے پارلیمنٹ دی منظوری تیکر پاکستان نوں 1.7 ارب ڈالراں دی قسط نہیں ملے گی۔ گیلانی حکومت دے اک وڈے عہدیدار نے دسیا پئی آئی ایم ایف پروگرام توں باہر نکلن دا تے کوئی آپشن موجود نہیں ہے۔ اوہناں نے ہور کہیا پئی جے سیاسی حکومت نے کالھی نال بدلدی ہوئی صورتحال نوں نہ سمجھیا تے ہو سکدا ہے جو ہنھیری معاشی لام تے لڑن دی تھاں پوری اقتصادی ٹیم استعفے دے دیوے۔

پاکستان دے نال جیہڑے وی مسئلے نیں اوہ مالی لام تے نیں تے آمدن وچ وادھے تے خرچیاں نوں گھٹائے بناء ملکی معیشت موجود طریقہ کار موجب نہیں چلائی جا سکدی۔ 1284 ارب روپئے دے مالی گھاٹے دی صورت وچ مہنگائی دی در 20 توں 25 فیصد ہو جاوے گی تے سود دی در وی بہت حد تیکر ودھ جاوے گی جیہدے وچ پھردول ہور ودھ جاوے گا تے چنگی معیشت دے سفنے ٹٹ جان گے۔ اجلاس نوں دسیا گیا پئی جدوں تیکر مالی تے مالیاتی پالیسیاں وچکار پورا تال میل نہیں ہوجاندا اودوں تیکر صرف مالی پالیسیاں راہیں مہنگائی نوں قابو نہیں کیتا جا سکدا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels