Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پاکستان تے کوڑ بیانیئے:پنجاب توڑو تے جمہوریت تگڑی ہوئے گی۔دوجی لڑی

پاکستان تے کوڑ بیانیئے:پنجاب توڑو تے جمہوریت تگڑی ہوئے گی۔دوجی لڑی

February 4th, 2018

پنجاب نوں سیاستاں پاروں قربان کرن والے اکثر ایکسپوز ہوئے نیں کہ ایس وچ نرے غیر پنجابی ہی رلتی نہیں سگوں کوڑ مفاداں لئی بہوں سارے اپنے وی رلتی رہے نیں تے اج وی انہاں دی گنتری گھٹ نہیں۔چولا انہاں کجھ وی پایا ہوئے، پر بیانیے توں سب کجھ سامنے آ جاندا ہے۔کوڑ بیانیئے وادھو نیں تاں مارے پنجاب تے پنجابیاں بارے پھیلائیاں گمراہیاں بارے گل ہو سی کیونجے ایہہ جھوٹ ایڈا پھیل چکیا ہے کہ کجھ پنجابی وی ایس نوں سچ من چکے نیں۔اکثر ٹی وی پروگراماں تے کانفرنساں وچ، کالماں وچ اجہے جھوٹ سنن تے پڑھن بعدوں ہی ایہہ لڑی وارسلسلہ لکھن دا آہر کیتا ہے۔تساں اخیر وچ دتے ای میل تے آپدے خیالاں نوں سانجھا کر سکدے ہو۔
اساں پہلی لڑی وچ کجھ مڈھلی گلاں کیتیاں سن اتے ہن پنجابیاں دی جمہوری تے نوآبادیاتی قبضیاں خلاف لہراں اتے رلت بارے گل چھواں گے۔کجھ گلاں انگریزاں توں پہلاں دی تواریخ بارے کیتیاں جان گیاں، کجھ برٹش پنجاب بارے پر زیادہ گل پاکستان بنن بعدوں دی سیاستاں بارے ہی ہوئے گی۔
پہلی لڑی دا لنک ایہہ ہے
http://www.wichaar.com/news/119/ARTICLE/33766/2017-12-24.html
کجھ گلاں تے پکی حقیقتاں ہوندیاں تے کجھ تبصرے، ویروا وی۔ پئی پکی حقیقتاں نوں گڈ مڈ اوہی کردے نیں جیہڑے انہاں توں جان چھڈانا چاہندے نیں۔ ہن انگریزاں 29 مارچ1849 نوں پنجاب سنے لہور دربار دی ہور تھاواں قابو کیتیاں سن، ایس پکی گل توں انکار نہیں کیتا جا سکدا۔ترے جون1947نوں پنڈت نہرو، محمد علی جناح، بلدیو سنگھ،سردار پٹیل، عبدالرب نشتر، لیاقت علی خان، اچاریہ کرپلانی تے ماؤنٹ بیٹن دو نویں ملک بناون تے دستخطی ہوئے سن ایہہ وی ہک پکی گل ہے۔اینج ہی11 ستمبر1803وچ دلی دے تخت دی لڑائی مرہٹیاں تے جنرل لیک ہوراں وچ ہوئی سی جیہڑی ہمائیوں دے مقبرے نیڑے جمنا یا یمنا دریا کنڈے لڑی گئی سی اتے اوس وچ انگریزاں دلی تے مل مار لتی سی۔کوڑ تریخ لکھن والے مغلاں دی راج گدی تے قبضے نوں1857تیک جڈا مرضی کھچ لین پر مرہٹیاں دے تھلے لگ چکی مغلاں دی تل چھٹ دا کانڈ بچہ کوہلو تے انگریزاں چڑھدی 19ویں صدی دے تیجے سال9/11نوں کر دتا سی۔اینج دی ہی ہک ہور پکی گل ایہہ سی پئی اکلے انگریز ہی نہیں ایتھے مل مارن آئے سن سگوں پرتگالیاں تے ڈچاں توں اڈ فرانسیسی وی مل مارن وچ رجھے سن پر کرناٹک ، بنگال توں میسور تیک انگریزاں نے فرانسیسیاں نوں وی کٹ چاڑھی سی۔جیہڑی یورپی طاقتاں ہار گیاں اوہ وی تے ساڈے سجن نہیں سن۔اک ہور پکی گل وی چیتے رکھو پئی اخیری مغل پادشاہ اورنگ زیب بعدوں(1707) پورے ہند سندھ وچ تھاں تھاں دلی دی ٹیک توں بغیر سرکاراں بنیاں ۔حیدر آباد دے نظام وکھری ٹہانی اساری، بنگالی نواباں وکھرا کم پایا،بھوسلیاں دے شیواجی تے اوس دے پچھلگاں مہاراشٹر پاروں تگڑی ٹہانیاں بنایاں اتے اینج ہی پنجاب وچ مثلاں دا راج وی چلیا، سہہ حاکمان لہور وی آئے تے رنجیت سنگھ دا لہور دربار وی پورے50ورہے چلیا۔لہور دربار اخیری ٹہانی سی جیہڑی برٹش یعنی انگریزاں نال لڑدی رہی ۔جداں ایس ٹہانی نوں ڈھا لتا گیا تاں برٹش انڈیا بناون ول گل ٹری۔لہور دربار دی ٹہانی وچ مسلمان پنجابیاں دی گنتری بہوں وادھو سی ۔ دھرمی ونڈ پاروں ایس وچ مسلماناں توں اڈ ہندو تے سکھ وی رلتی سن اتے قومیتی ونڈ پاروں لہور دبار وچ پنجابیاں دے نال نال کشمیری، بلتی تے پٹھان وی رلتی سن۔دلی توں ستلج دریا تیک دی تھاواں1809دے معاہدے پاروں انگریزی راج وچ سن۔پرلے بنے سندھ، بلوچستان دی تھاواں سن کہ سندھ دے کلہوڑیاں، پنجاب دی تھاں ڈی جی خان دے تالپوراں نوں جانگلی بلوچاں نال نبڑن لئی سدھیا تے اخیر کلہوڑیاں تے تالپوراں وچ لڑائیاں ہوئیاں جس دا فیدہ انگریزاں چکیا اتے سندھ وی 19ویں صدی دے چڑھدے دہاکے وچ انگریزاں دے تھلے لگ چکیا سی۔نادر شاہ ایرانی تے احمد شاہ ابدالی 18ویں صدی وچ خراسان، قندہار، کابل، پنجاب تے دلی تے مل مارن آئے پر نادرے بعدوں خراسان اپنی وکھری ٹہانی بنائی تے قندہار تے ابدالی پادشاہ بنیا۔ ابدالی سدوذئی پٹھان سی تے اوس بعدوں سدوذئیاں تے بارک ذئیاں دی لڑائیاں پاروں احمد شاہ ابدالی دے ترے پوتے وار و وار لہور دربار وچ پناہ گیر ہوئے۔1799 وچ رنجیت سنگھ پادشاہ بنیا تے اوس دی بنائی سرکار لہور دربار1849تیک رہی۔ جنہاں تھاواں تے لہور دربار دی حکمرانیاں سن اتھے کیونجے پنجابی، کشمیری، بلتی،پٹھان مسلماناں دی گنتری وادھو سی اتے حاکم سکھ سی تاں مارے انگریزاں سکھ مسلم دھرے نوں پاڑ پاون لئی ورتیا تے ہک جہاد وی ہشیاریاں نال ہون دتا کہ ایہہ سب پکیاں گلاں نیں تے انہاں نوں کوئی تریخ پڑھن والا منن توں انکاری نہیں ہو سکدا۔ انہاں پکیاں حقیقتاں بارے انگریز، فرانسیسی، امریکی لکھاریاں دی لکھتاں وی نیں تے مقامی لکھتاں وی۔
لہور دربار تے مل مارن لئی انگریزاں پہلے بمبئی پریذیڈنسی دے ناں توں صوبہ بنایا تے سندھ نوں اوس وچ رلتی کردے ہوئے سندھ دا رخ پنجاب توں بمبئی ول موڑدتا۔ ایہو نہیں ایس صوبے وچ یمن دی بندر گاہ عدن وی رلتی سی اتے یمن تے ساڈی ساحلی تھاواں وچکار ’’گھڑیا مڑیا جزیرے‘‘(Khuriya Muriya Islands) وی ۔سندھ جیہڑا ساڈی دریائی تجارتاں دا سمندراں ول کھلدا متھا سی اتے جس دے سمندراں ول کھلدے منہ دا نقشہ برنیز کولوں انگریزاں1830دے دہاکے وچ بنوایا سی نوں کیوں بمبئی ول کیتیا تے ایس نال سندھی ہندواں تے ایرانوں لیائے پارسیاں،بوہریاں وغیرہ دا مفاد کنج جوڑیا ایہہ اوہ کہانی جس نوں ہلے سندھیاں وی نہیں لکھیا۔پر ایہہ سب اوہ پکیاں گلاں نے جس توں کوئی انکاری تے نہیں پر ایس دی تشریحاں وکھو وکھ۔ ایہہ انگریز دے پنجاب تے مل مارن توں پہلے دی گلاں نیں تے اگلی لڑی وچ اگے دی گل آئے گی۔

تساں جے ایس بارے لکھنا چاہندے ہو تاں تھلے دتی ای میل تے لکھو
aamirriaz1966@gmail.com



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels