Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> مارکس سچا سی (ورلڈ اکنامک فورم، غربتاں تے ہک رپورٹ)

مارکس سچا سی (ورلڈ اکنامک فورم، غربتاں تے ہک رپورٹ)

January 27th, 2018

جتھے طاقت ہوندی اے اوتھے یُدھ وی ہوندا اے
مارکس نے کیہا سی پئی اوہ وسوں گلی سڑی ہے جس وچ اک پاسے امیری ودھی جاندی اے تے دوجے پاسے بُھکھ ننگ ہے۔
اوکسفم (OXFAM) 23.1.18) ( دی رپورٹ ایہو دس پاندی اے۔ پچھلے اک ورھے وچ جنی دولت پیدا ہوئی اوس دا 82% جگ دے اک فیصد امیراں لُٹ لیا تے ماڑیاں جوگ کجھ وی نہ بچیا۔ ایہہ رپورٹ نال ای ڈیووس وچ ورلڈ اکنامک فورم دا اکٹھ چھوہندا پیا اے�آاک امدادی ادارے دی رپورٹ وی ایہہ دس پاندی اے پئی ارب پتیاں دی دولت 2010 توں عام مزدوراں دے مقابلے وچ 141 چھ گناں ودھی اے۔ امیراں ہر دو دناں پچھوں مارچ 2016 توں2017 تیک اک ارب ڈالر بنائے۔
اوکسفم نے ایہہ رپورٹ جگ دی معاشی حالت دا نقشہ وکھان لئی بنائی اے جس وچ کجھ امیر سارا کجھ سانبھی جاندے نیں تے رہندی خلقت غریبی نال مساں ساہ پورا پیا کردی اے۔
ارب پتیاں دی چڑھتل معشیتاں دا چڑھا نہیں سگوں ایہہ معاشی بندوبست دے کوڑ ہون دی نشانی اے۔
اوکسفم نے زنانیاں دی ماڑی حالتاں تے وی زور پایا اے ’’جیہڑیاں مرداں توں گھٹ کماندیاں نیں،اکثر سبھ توں گھٹ تنخواہ لیندیاں نیں تے جیہڑیاں کدے وی مُک سکدیاں نیں۔دس امیر بندیاں وچوں نو مرد نیں۔
رپورٹ دسدی اے جگ دے پنج وڈھے چیف ایگزٹیواں چار دناں وچ اینا کمایا جو بنگلہ دیش وچ گارمنٹ دے مزدور ساری حیاتی لاکے کماندے نیں۔
’’اوہ لوک جیہڑے ساڈے کپڑے بناندے نیں،ساڈے فون تیار کردے نیں تے ساڈی خوراک اُگاندے نیں اوہناں نال دھرو کیتا جا رہیا اے تاں جو سستی خوراک آوندی رہے، اوہناں دیاں کارپوریشناں دے منافعے ودھدے رہن۔
نابرابری نال لڑن لئی،اوکسفم نے سرکاراں اُتے زور پایا اے پئی اوہ حصّے داراں تے اُچے ایگزیٹو دے منافعے گھٹ کرن ،جنساں وچکار وتکرا گھٹ کرن،جیہڑے ٹیکس چور ہن اوہناں نوں قابو کرن تے تعلیم تے صحتاں اُتے بُہتا خرچ کرن۔
ایہہ رپورٹ ایس ویلے آئی اے جد سوئٹزرلینڈ وچ ورلڈ اکنامک فورم دا اکٹھ ہوندا پیا اے۔ جس آکھیا اے پئی اوہ ایس اُتے گل کرن گے پئی کیویں اک ٹٹی بھجی دُنیا وچ اک سانجھی بھلک اُساری جا سکدی اے۔
’’ایس ویلے اک وی اجیہا وپاری یاں سیاسی آگو لبھنا اوکھا اے جو برابری بارے چنتا کرے۔
اجیہا ملنا وی اوکھا اے جیہڑا ایس بارے کجھ کر رہیا ہووے۔بوہتے ٹیکس گھٹا کے تے مزدوراں دے حق گھٹا کے شیواں نوں ہور بھیڑا کردے پئے ہن۔
جگ دے انت 10امیر لوکاں وچ اک دو بھارت دے وی ہن۔ایس ویلے بل گیٹ جیہڑا سوفٹ وئیر دا مالک اے ،سبھ توں بوہتے پیسے لوکاں دی بھلیائی لئی لا رہیا اے ۔ اوہ پچھے انڈیا آیا تے امیر بھارتیاں نوں کجھ پیسے خلقت لئی لان دا ترلا پایا، پر کسے وی حامی نہ بھری۔امریکہ دے چار سو امیراں وچ نرے 70 بل گیٹ نال رلے نیں۔ پر خیرات کرن نال پولیو تاں بھاویں مُک جاوے، غریبی نہیں مُکنی۔یوٹوپیائی شوشلسٹاں دا خیال سی امیراں دی بینتی کیتی جاوے پئی اوہ گھٹ منافع کماون ،ماڑیاں اُتے رحم کھان، رب دا خوف کرن تے اِنج خورے کوئی بدلی آ جاوے۔ پر بدلی مارکس دے وچاراں نال آئی۔ آکھیا جاندا اے بھاویں مارکس دے وچار یورپ تے امریکہ وچ کوئی اُتھل نہیں لیا سکے پر اوس دے وچاراں نے سرمائے داری نوں وی اوہ نہیں رہن دتا۔ویل فیئر ریاست دی گل تے اوس تے عمل کیمونزم دے ڈر پاروں ای ہویا۔
ہن پھیر یوٹوپیائی شوشلسٹاں ورگیاں گلاں ہو رہیا ں نیں۔ کیہ اک ہور مارکس دے جمن دا ویلا آوندا پیا اے؟فوکو(Paul-Michel Foucault) نے کیہا سی ’’ جتھے طاقت ہوندی اے اوتھے یُدھ وی ہوندا اے‘۔ یُدھ جاری رہنا چاہیدا اے۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels